Liñolo Labubeli Makorinte
6 Haiba yomuñwi ku mina unani taba ni yomuñwi,+ kana ubanga ni bundume bwa kumuisa kwa kuta fapilaa babasika luka, mwa sibaka sa kumuisa fapilaa babakenile? 2 Kamba kana hamuzibi kuli babakenile bakaatula lifasi?+ Mi haiba lifasi likaatulwa ki mina, kana hamukoni kuatula litaba zenyinyani hahulu? 3 Kana hamuzibi kuli lukaatula mangeloi?+ Cwale lukapalelwa cwañi kuatula litaba za bupilo bo? 4 Cwale hamunani litaba za bupilo bo zetokwa kuatulwa,+ kana muketa batu babanyazisezwa mwa puteho kuli babe bona baatuli? 5 Nibulela cwana kuli muswabe. Kana hakuna yanani butali ku mina yakakona kuatula taba yemwahalaa mizwale bahae? 6 Kono muzwale uisa muzwale yomuñwi kwa kuta, mi ueza cwalo fapilaa babasa lumeli!
7 Kaniti mutuzwi kale hamuisana kwa kuta kuyo zekisana. Kiñi hamusa lumeli kufosezwa ki babañwi?+ Kiñi hamusa lumeli kuputelelwa? 8 Kono mina mwafoseza babañwi ni kubaputelela, mi mane mueza cwalo mizwale bamina!
9 Kana hamuzibi kuli batu babasika luka habana kuyola saanda sa Mubuso wa Mulimu?+ Musike mwaipuma.* Batu babapila ka muzamao wa buhule,*+ babalapela milimu ya maswaniso,+ babuki,+ baana babalumela kuezwa basali,+ baana babalobala ni baana ka bona,+ 10 masholi, ba mukwañuli,+ macakolwa,+ kamba ba matapa,* ni babukuli habana kuyola saanda sa Mubuso wa Mulimu.+ 11 Mi niteñi ki mona mone bainezi babañwi ku mina cwalo. Kono mutapisizwe mi mukenile;+ mukenisizwe;+ mubeilwe babalukile+ ka libizo la Mulenaa luna Jesu Kreste ni ka moya wa Mulimu waluna.
12 Lika kaufela lilumelelizwe ku na, kono haki lika kaufela zetusa.+ Lika kaufela lilumelelizwe ku na, kono hanina kulumela kuzamaiswa ki sesiñwi. 13 Lico ki za mba, mi mba ki ya lico, kono Mulimu ukafelisa bubeli bwazona.+ Mubili haki wa muzamao wa buhule,* kono ki wa Mulena,+ mi Mulena ki wa mubili. 14 Kono Mulimu naazusize Mulena+ mi ni luna uka luzusa kwa bafu+ ka maata ahae.+
15 Kana hamuzibi kuli mibili yamina ki lilama za Kreste?+ Cwale kana nikazwisa lilama za Kreste ni kulikopanya ku lihule? Kutokwa nihanyinyani! 16 Kana hamuzibi kuli yakopanyizwe ku lihule ufetuha mubili ulimuñwi ni lona? Kakuli Mulimu uli: “Bubeli bwabona bakaba nama iliñwi.”+ 17 Kono mutu kaufela yakopanyizwe ku Mulena ufetuha alimuñwi ni yena ka moya.+ 18 Musabe kwa muzamao wa buhule!*+ Sibi kaufela saeza mutu si kwande a mubili wahae, kono mutu kaufela yapila ka muzamao wa buhule ufoseza mubili wahae.+ 19 Kana hamuzibi kuli mubili wamina ki tempele+ ya moya okenile oliteñi ku mina, omufilwe ki Mulimu?+ Hape hamuituwi mina bañi,+ 20 kakuli nemulekilwe ka teko yetuna.+ Ka mukwa ocwalo, mukanyise Mulimu+ mwa mubili wamina.+