Liñolo Lapili Kwa Matesalonika
4 Ka kufeza mizwale, sina hane muamuhezi taelo yezwa ku luna ya za momuswanela kuzamaela kuli mutabise Mulimu,+ sina mane hamuzamaya cwalo, lwamikupa ni kumilapela ka Mulena Jesu kuli muzwelepili kueza cwalo ka kutala. 2 Kakuli mwaziba litaelo zene lumifile ka Mulena Jesu.
3 Kakuli tato ya Mulimu kikuli mube babakenile+ mi muambuke muzamao wa buhule.*+ 4 Yomuñwi ni yomuñwi wamina uswanela kuziba mwakuzamaiseza mubili wahae+ ka bukeni+ ni ka likute, 5 isiñi ka litakazo za kulobala ni mutu zetulile tikanyo+ zetiswa ki moya wa mukwañuli sina mobaezeza batu babasa zibi Mulimu.+ 6 Hakuna yaswanela kutula tikanyo ni kueza maswe muzwale wahae mwa taba ye, kakuli Jehova* ufa koto batu kabakala lika zeo kaufela, sina hane lumitaluselize cimo ni hane lumilemusize. 7 Kakuli Mulimu naasika lubizeza kuli lube babamasila, kono kuli lube babakenile.+ 8 Hakulicwalo, mutu yanyaziseza taba ye, hanyazisezi mutu, kono unyaziseza Mulimu,+ yena yamifa moya wahae okenile.+
9 Kono ka za kulatana ni mizwale bamina,+ hamutokwi kuli lumiñolele, kakuli mina kasibili mulutiwa ki Mulimu kuli mulatane.+ 10 Mane ki momuezeza cwalo kwa mizwale kamukana ba mwa Masedonia kaufela. Kono lwamieleza mizwale, kuli muzwelepili kueza cwalo ka kutala. 11 Mueze ka taata kuli mupile mwa kozo+ ni kusaikenya mwa litaba za babañwi+ mi musebeze ka mazoho amina,+ sina mone lumilaelezi, 12 kuli muzamaye ka mukwa okutekeha fapilaa batu baba kwande+ mi musike mwatokwa sesiñwi.
13 Hape mizwale, halulati kuli musike mwaba babasina zibo ka za babaitobalezi ka lifu,+ ilikuli musike mwaswaba sina mobaswabela babañwi kaufela babasina sepo.+ 14 Kakuli haiba lunani tumelo ya kuli Jesu naashwile mi hape naazuhile,+ uzibe ni bona babaitobalezi ka lifu ku Jesu, Mulimu uka bakutiseza kwa bupilo kuli babe hamoho ni Jesu.+ 15 Kakuli se ki sona selu mibulelela ka linzwi la Jehova,* kuli luna babasiyalezi babaka pila mwa nako ya kubateñi kwa Mulena hakuna moluka lakela babaitobalezi ka lifu; 16 kakuli Mulena kasibili ukashetumuka kuzwa kwa lihalimu ka muhuwo wa taelo, ka linzwi la nduna wa mangeloi+ ni ka tolombita ya Mulimu, mi babashwile ka kuswalisana ni Kreste bakazuha pili.+ 17 Hasamulaho, luna babapila babasiyalezi, lukaangelwa mwa malu+ hamoho ni bona, kuyo katanyeza Mulena+ mwa mbyumbyulu; mi ka mukwa ocwalo lukaba ni Mulena kamita.+ 18 Cwale muzwelepili kuomba-ombana ka ona manzwi a.