Kana Mulimu wa ni Tokomela?

Likalabo ze zibahala hahulu:

▪ “Mulimu ki ya pahami hahulu, haa na taba ni matata e ni kopana ni ona.”

▪ “Ha ni sepi kuli wa ni tokomela.”

Jesu naa buleziñi?

▪ “Litaha liketalizoho, ha ni li, li leka mapenny a mabeli? Nihakubacwalo Mulimu h’a libali i liñwi ya zona. Mane ni milili ya litoho za mina i balilwe kaufela. Mu si ke mwa saba: mu ba butokwa ku fita litaha ze ñata.” (Luka 12:6, 7) Ku si na ku kakanya, Jesu naa lutile kuli Mulimu wa lu tokomela.

▪ “Mu si ke mwa bilaela, inze mu li: Lu ka cañi? kamba, Lu ka nwañi? kamba, Lu ka apalañi? Kakuli linto zeo kaufela li batwa ki bahedeni; kono Ndat’a mina ya kwa lihalimu u ziba kuli mwa li tokwa kamukana.” (Mateu 6:31, 32) Jesu naa ziba hande kuli Mulimu wa ziba ze lu tokwa.

BIBELE kaniti i bulela kuli Mulimu wa lu tokomela. (Samu 55:22; 1 Pitrosi 5:7) Haiba ki cwalo, ki kabakalañi he ha lu kopana ni matata a mañata hahulu kacenu? Haiba Mulimu u lilato mi u na ni maata a matuna, ki kabakalañi ha sa felisi manyando?

Kalabo i ama niti ye ba sa zibi batu ba bañata ya kuli Satani Diabulosi ki yena mubusi wa lifasi le li maswe le. Satani ha naa lika Jesu, naa mu bonisize mibuso kaufela ya lifasi ni ku mu taluseza kuli: “Ni ka ku fa bulena bo kaufela, ni ku bubana kwa mibuso yeo; kakuli zeo ni li filwe; mi ni li fa ye ni lata.”—Luka 4:5-7.

Ki mañi ya naa ketile Satani kuli a be mubusi wa lifasi? Bashemi ba luna ba pili, bo Adama ni Eva ha ne ba utwile Satani ni ku kwenuhela Mulimu, se ne ba ezize luli neeli ku keta Satani kuli a be mubusi wa bona. Ku zwelela feela fa bukwenuheli bo, Jehova Mulimu u bile ni pilu-telele ka ku fitisa nako kuli a bonise kuli puso ya Satani i palezwi luli. Jehova a li ku ba a hapeleze batu ku mu sebeleza, kono u lu file kolo ya kuli lu kone ku kutela ku yena.—Maroma 5:10.

Bakeñisa kuli Mulimu wa lu tokomela, u ezize litukiso za kuli Jesu a lu yangwele kwa puso ya Satani. Mwa nako ye kwapilinyana, Jesu u ka ‘felisa ya sweli mubuso wa lifu mwa mata a hae, yena Diabulosi.’ (Maheberu 2:14) Ka ku eza cwalo, u ka ‘felisa misebezi ya Diabulosi.’—1 Joani 3:8.

Paradaisi i ka kutisezwa sinca fa lifasi le. Ka nako yeo, Mulimu “u ka takula miyoko kaufela kwa meto a [batu]; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.”—Sinulo 21:4, 5.a

[Litaluso za kwatasi]

[Manzwi a fa likepe 8]

Paradaisi i ka kutisezwa sinca fa lifasi le