Jakobo ni Isau Bakutisana Lipilu

Jehova naasepisize Jakobo kuli naaka musileleza sina feela mwanaasilelelize Abrahama ni Isaka. Jakobo naaizo ina mwa sibaka sesibizwa Harani, ili kwanaanyalezi, naanani lubasi lolutuna, mi naafumile hahulu.

Hamulaho wa nako, Jehova ali ku Jakobo: ‘Kutela kwa naha yahabo wena.’ Kacwalo, Jakobo ni lubasi lwahae batama musipili omutelele kukutela habo yena. Hane banze bazamaya, batu babañwi bataha ku Jakobo, mi bali: ‘Muhulwanaa hao Isau wataha, mi utaha ni baana ba 400!’ Jakobo naaikalezwi kuli mwendi Isau naabata kumulwanisa ni lubasi lwahae. Alapela ku Jehova kuli: ‘Unilamulele kuli muhulwanaka asike anilwanisa.’ Fa lizazi lene litatami, Jakobo alumela Isau limpo zeñata ili lingu, lipuli, likomu, likamele, ni limbongolo.

Jakobo anaasiyezi anosi busihu, abona lingeloi! Lingeloi lakala kumangana ni yena. Mi bamangana kuisa kakusasana. Nihaike kuli Jakobo naaholofezi, naasika zwafa. Lingeloi kihaa lili: ‘Nituhele niye.’ Kono Jakobo kihaa li: ‘Batili, hanina kukutuhela kufitela unifuyola.’

Kwa mafelelezo, lingeloi lafuyola Jakobo. Mi Jakobo aba ni buikolwiso bwa kuli Jehova naasike atuhelela Isau kumulwanisa.

Zazi leo kakusasana, Jakobo abona Isau kwahule inze ataha ni baana ba 400. Jakobo aya kwapilaa lubasi lwahae mi akubama fafasi ha 7. Isau amatela Jakobo mi amukumbata. Jakobo ni Isau balila hahulu mi bakutisana lipilu. Munahana kuli Jehova naaikutwile cwañi, Jakobo hanaangile muhato wa kukutisana pilu ni muhulwanaa hae?

Hasamulaho, Isau akutela kwa naha yahabo yena, mi Jakobo ni yena azwelapili kuya kwa sibaka kwanaaya. Jakobo naanani bana babashimani ba 12. Mabizo abona neli, Rubeni, Simioni, Livi, Juda, Dani, Nafetali, Gadi, Asere, Isakare, Zabuloni, Josefa, ni Benjamine. Mi yomuñwi kwa bana bao ili Josefa naaitusisizwe ki Jehova kuli apilise batu bahae. Kana mwaziba mwanaaezelize? Halunyakisiseñi ka za teñi.