Nzila ye Kumbani ye Isa kwa Tukuluho

HAKI ba bañata ba ba na ni ngana ba ba kanana kuli pupo kamukana i zamaiswa ka milao ya ka taho. Yona milao yeo i zamaisa lika kaufela ku kalela kwa ma-atom a manyinyani ku isa kwa milalambinda ye mituna-tuna ye na ni linaleli ze eza bolule ba likiti-kiti. Kabe ne ku si cwalo, ne ku si ke kwa ba ni ku singanyekwa kwa lika mi ne ku si ke kwa ba ni kutwisiso; bupilo bona tota ne bu si ke bwa ba teñi. Ka ku utwisisa milao ya ka taho ni ku sebelisana ni yona, mutu u konile ku peta likezo ze mbwetukisa, ze cwale ka ku zamaya fa kweli ni ku nongisa maswaniso a mibala ku zwelela kwa sibaka sifi kamba sifi fa lifasi-mubu kamba nihaiba kwa buse bwa mbyumbyulu ya lifasi-mubu ku a fitisa fa televishini mwa mandu a luna.

Kono ku cwañi ka za milao ya muzamao? Kana ku kumalela ku yona ki ko ku tusa ni ko ku tisa siselo ka nzila ye swana? Ba bañata ba bonahala ku ikutwa kuli ha ku na milao ya muzamao mi ba keta tuto ya muhupulo wa butu ya mutakafululele kamba bulapeli bo bu lumelelana ni litakazo za bona tota.

Nihakulicwalo, ku na ni ba bañwi ba ba keta nzila ye ñwi, ‘nzila ye kumbani ye isa kwa bupilo’ sina ka mo i taluselizwe mwa Bibele. Ha lu swaneli ku komoka kuli yeo ki keto ya ba banyinyani fela, kakuli Jesu n’a bulezi ka za nzila ye sisani kuli: “Ki ba banyinyani ba ba i fumana.” (Mateu 7:14) Ki kabakalañi ha ba li ba banyinyani fela?

Ki ka libaka la kuli nzila ye kumbani i na ni likaniso za milao ni likuka za Mulimu. I konwa ku latiwa fela ki mutu ya lakaza ka buniti ku tahisa bupilo bwa hae mwa ku lumelelana ni lipimo za Mulimu. Ka ku fapahana hahulu ni nzila ye atami, ye fa ponahalo ye puma ya tukuluho kono ka buniti fela ili ye beya mwa butanga, nzila ye kumbani, ye bonahala ku ba ni likaniso ze ñata, i lukulula mutu ka nzila ye ñwi ni ye ñwi ya butokwa. Maciñekelo ao i fa a tomilwe ki “Mulao o petehile, ona Mulao wa tukuluho.”—Jakobo 1:25.

Ka Mo I Lukululela Nzila ye Kumbani

Ki niti, haki ko ku bunolo kamita ku ba mwa nzila ye kumbani. Mutu ya pila kaufela hasi ka petahala mi u hozize tengamo ya bufosi. Kacwalo mutu n’a kana a tengamela fa ku yauluka hanyinyani. Nihakulicwalo, lituso za ku kumalela mwa ‘nzila ye sisani’ li swanelwa ki buikalimelo kamba licinceho lifi kamba lifi ze tokwiwa, kakuli Mulimu ‘u lu luta se si lu swanela.’—Isaya 48:17; Maroma 3:23.

Ka ku fa swanisezo: Bashemi ba ba butali ba lukiseza bana ba bona ‘nzila ye sisani’ ya micelo. Seo ka linako ze ñwi si ama kuli bashemi ba tiye ka linako za sico. Kono bana ha ba hula, ba ka itebuha kalimelo ye lilato ya bashemi ba bona. Ha ba se ba hulile, ba ka be ba tahisize lilato la ku lata lico ze fa buikangulo bo bunde. Mi ku ata kwa lico ze fepa ze fitana-fitana ku ka tibela maikuto a ku ba mwatas’a likaniso ze ñata.

Ka nzila ya kwa moya, Mulimu u eza nto ye swana ku bao ba ba mwa nzila ye kumbani ye isa kwa bupilo. U hulisa ku ba ba ishuwa litakazo ze na ni susuezo ye nde ili ze isa kwa tabo ni tukuluho ya niti. U eza seo ka ku fa Linzwi la hae, Bibele. Fahalimu a seo, u lu mema kuli lu lapelele moya wa hae kuli u lu tuse, mi u lu laela kuli lu swalisane ni Bakreste sina luna, ba ba kona ku lu susueza ku zwelapili mwa nzila ye kumbani. (Maheberu 10:24, 25) Ee, Mulimu u lilato, mi kona kalemeno kao ka ka tuna hahulu ka ba mutomo wa milelo ya hae ni miezezo ya hae kaufela.—1 Joani 4:8.

Lilato, kozo, bunde, buiswalo, ni miselo ye miñwi ya moya wa Mulimu ha i ba teñi, nzila ye kumbani ha i bonahali ku ba ye na ni likaniso. Sina ka mo li bulelela liñolo, “ha ku na mulao o hana ze cwalo.” (Magalata 5:22, 23) “Fo ku na ni moya wa [Jehova, NW], ku inzi tukuluho.” (2 Makorinte 3:17) Mane ni cwale, Bakreste ba ba buniti ba sweli ku tamuna tukuluho yeo. Ba lukuluhile kwa lisabo ze ñata ze kataza batu kacenu, ze cwale ka sabo ya ku saba linako za kwapili ni sabo ya tumelo ya mioya ili ya ku saba lifu. Ki nto ye nyangumuna hakalo ku nahana ka za nako ya kwapili muta “lifasi li ka tala zibo ya [Jehova, NW], sina mezi mw’a kwahelezi liwate”! (Isaya 11:9) Ka nako yeo, nihaiba sabo ya ku saba bukebenga ha i sa na ku ba teñi. Likulukulu ni mikwalelo li ka ba siyo ku ya ku ile. B’ote ba ka ikutwa ku lukuluha ni ku silelezwa—musihali ni busihu, fa ndu ni kwande. Yeo ikaba tukuluho luli!

Lu Filwe Buniti bwa Tuso ya Mulimu

Ki niti, ku pila ka lipimo za Mulimu ku tokwa buikatazo, kono “litaelo za hae ha li na bukiti,” mane ni kwa batu ba ba si ka petahala. (1 Joani 5:3) Ha lu nze lu twaela nzila ye kumbani ni ku utwa lituso za ku zamaya ku yona, lu tahisa sitoyo se si sweli ku hula kwa neku la linzila ni munahano wa bao ba ba mwa nzila ye atami. (Samu 97:10) Ku ipeya ku utwa mulao wa Mulimu ki nto ye latiwa ki lizwalo le linde ku luna kaufela. Mwa sibaka sa ‘ku lobeha lipilu’ ni ‘ku nyanda’ ze fumanwa ku ba bañata, Mulimu u sepisa kuli: “Batanga ba ka ba ka opela, lipilu inze li tabile.” Ee, pilu ye lutilwe ki Jehova ki ye tabile ni ye lukuluhile.—Isaya 65:14.

Jesu n’a shwile kuli a lu konise ku ba ni tukuluho luli. Bibele i bulela kuli: “Mulimu u latile lifasi hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Cwale, ka ku ba Mulena wa Mubuso wa Mulimu wa kwa lihalimu, Jesu u sweli ku fitisa lituso za sitabelo seo. Hañihañi, hamulaho wa “ñalelwa ye tuna,” nzila ye atami ni ba ba ku yona ha li ka feliswa, ka pilu-telele u ka kalisa ku etelela mufuta wa mutu o ipeya ku utwa mwa silengo se si siyezi sa nzila ye kumbani ku yo fita cwalo kwa mafelelezo a yona, bupetehi bwa butu. (Sinulo 7:14-17; Mateu 24:21, 29-31) Kwa nalulelule lu ka bona ku talelezwa kwa sepiso ye tuna ye li: “Ze bupilwe li ka lukululwa kwa butanga bwa ku bola, kuli li fiwe tukuluho ya kanya ya bana ba Mulimu.” Yona tukuluho yeo ye fiwa ki Mulimu ha i konwi ku teulwa. Mane nihaiba lifu li ka feliswa.—Maroma 8:21; Sinulo 21:3, 4.

Ka ku bona ni ku utwisisa hande ko i liba nzila ye kumbani, mutu u kona ku keta hande nzila yeo ni ku zwelapili ku zamaya ku yona. Sihulu ba banca ba tusiwa kuli ba si ke ba bonela fakaufi mi ba si ke ba halifiswa ki se b’a nga kuli ki likaniso ze fiwa ki lipimo za Mulimu. Ba ituta ku bona zona zeo sina bupaki bwa lilato la Mulimu ni tebe ye ba sileleza kwa bumaswe bwa nzila ye atami. (Maheberu 12:5, 6) Ka mo ku inezi fela, mutu u tokwa ku ba ni pilu-telele, a nze a hupula kuli ku tokwahala nako kuli a tahise tulemeno ni litakazo za silumeli, sina ha ku tokwahala nako kuli kota ya litolwana i beye litolwana ze nde. Kono kota yeo i ka beya zeo haiba i huliswa ni ku selaelwa.

Kacwalo mu itute Linzwi la Mulimu, mu swalisane ni Bakreste ba bañwi, mi “mu lapele ka ku sa lisela” ili ku kupa moya o kenile. (1 Matesalonika 5:17) Mu sepe Mulimu kuli a mi tuse ku ‘lukisa linzila za mina.’(Liproverbia 3:5, 6) Kono kana zeo kaufela ki ze kona ku sebeza? Kana za sebeza luli? Ee, ne li sebelize ku Tom hamohocwalo ni ku Mary, ba ba bulezwi mwa taba ye felile.

Ne Ba Tuhezi ku Zamaya mwa Nzila ye Atami

Tom u ñola kuli: “Mwahal’a lilimo za fahal’a ma-1970, ne lu bonani ni Lipaki za Jehova yo muñwi wa bona ha n’a t’o potela ndu ya luna. Puhisano ne i isize kwa tuto ya Bibele. Hañihañi na kalisa ku twekisa bupilo bwa ka. Ne ni kolobelizwe ka 1982 mi cwale ni sebeza mwa puteho ya fa sibaka. Mwan’a luna wa mushimani ni yena cwale u kolobelizwe. Ni itumela ku musal’a ka ka ku ba ni pilu-telele ku na mwa lilimo kaufela z’ani pili ni si ka ituta kale niti. Mi fahalimu a zeo kaufela ni itumela ku Jehova ni Mwan’a hae, Kreste Jesu, ka ze ba lu file kaufela ni ka za sepo ye lu na ni yona cwale ya mwa linako za kwapili.”

Mi ku cwañi ka za Mary? Kihona, n’a ikutwile kuli Mulimu n’a si ke a mu swalela ni kamuta, kono n’a bata ku ituta ka za Hae kabakala bana ba hae. Ha n’a utwile kuli Lipaki za Jehova ne ba luta muyahwa ni yena Bibele, ni yena a kupa tuso. Nihakulicwalo, mikwa ya hae ye maswe ye ne i mu kombelezi ne i ezisize zwelopili ku ba ye t’ata. Tuto ne i fita mwa miinelo ya ku eza zwelopili ni ya ku kutela mwamulaho. Nihakulicwalo, mwan’a hae wa musizana yo munyinyani ili wa lilimo za buhulu ze supile n’a mu susuezanga. “Ha mu itiise, Ima. Mwa kona ku ituta!” ki mwa n’a bulelela. F’o Mary n’a lika ka t’ata ni ku fita.

Munn’a hae wa mwa linyalo la ka sizo, y’o ni yena n’a itusisa maswe milyani ye kola, ha n’a kutile kwa hae, ni yena a kena mwa tuto yeo. Kwa nalulelule bubeli bwa bona ne ba tulile mikwa ya bona ye maswe. Cwale, hamulaho wa ku catisa linyalo la bona ni ku kolobezwa, ne ba bile ni tabo ye tuna mi lwa pili ne ba ikutwile inge lubasi luli. Ka bumai, AIDS kwa nalulelule ne i bulaile Mary, kono n’a shwile pilu ya hae i tomile fa sepiso ya Bibele ya zuho ni bupilo fa lifasi-mubu le li li paradaisi, le li kenisizwe kwa tutowati tufi ni tufi twa nzila ye atami ye isa kwa lifu.

Ee, kwa konahala ku zwa mwa nzila ye atami ili ye na ni sibaka se situna ye isa kwa sinyeho. Kreste Jesu n’a ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Kacwalo, ki kabakalañi ha mu sa ikatuleli ku zamaya mwa nzila ye kumbani ye isa kwa bupilo? Ka ku ikungela mwa pilu ni ku sebelisa se mu ituta mwa Linzwi la Mulimu, mina ka butu ne mu kana mwa iponela sepiso ya Bibele ye tabisa pilu ili ye li: “Mu ka ziba niti, mi niti i ka mi lukulula.”—Joani 8:32.