Mo mu Swanela ku Pilela

“Cwale linto zeo kaufela sina ha li na ni ku fela, ni li, mu lukela ku pila ka mizamao ye kenile hahulu, ni ka bulapeli.”—2 PIT. 3:11.

1. Ki kabakalañi Bakreste ba mwa miteñi ya Pitrosi ha ne ba tokwa hahulu likelezo za naa ba ñolezi mwa liñolo la hae la bubeli?

MUAPOSITOLA Pitrosi ha naa ñozi liñolo la hae la bubeli ka susumezo ya moya o kenile, puteho ya Sikreste ne se i nyandisizwe hahulu, kono nyandiso yeo ne i si ka fukuza kwa tukufalelo ya yona kamba ku i palelwisa ku hula. Kacwalo Diabulosi a itusisa mukwa o muñwi o no sebelize hahulu mwa linako za kwamulaho. Sina mwa naa boniselize Pitrosi, Satani naa likile ku silafaza batu ba Mulimu ka ku itusisa baluti ba buhata be ne ba na ni ‘meeto a tezi buhule’ ni ‘pilu ye talifezi ku bata bufumu.’ (2 Pit. 2:1-3, 14; Juda 4) Kacwalo, liñolo la Pitrosi la bubeli li susueza Bakreste ku zwelepili ku sepahala.

2. Kauhanyo ya 3 ya liñolo la Pitrosi la bubeli i bulelañi, mi lu swanela ku ipuza lipuzo lifi?

² Pitrosi naa ñozi kuli: “Ni hupula kuli ha ni nze ni pila mwa munganda wo, ni lukela ku mi zusa ka ku mi hupulisa litaba, inze ni ziba kuli ni na ni ku siya kapili munganda wo . . . Mane ni ka pihelela, kuli ha ni se ni tokwahalile, mu be ni se si ka mi hupulisa litaba zeo.” (2 Pit. 1:13-15) Kaniti, Pitrosi naa ziba kuli naa tuha a shwa, kono naa bata kuli likupuliso za hae za ka bunako li zwelepili ku hupulwa. Mi mane likupuliso zeo li ñozwi mwa Bibele mi kaufelaa luna lwa kona ku ipalela zona kacenu. Kauhanyo ya 3 ya liñolo la Pitrosi la bubeli ki ya butokwa hahulu ku luna kakuli i bulela za “mazazi a maungulelo” a lifasi la kacenu ni za ku sinyiwa kwa lihalimu la swanisezo ni lifasi la swanisezo. (2 Pit. 3:3, 7, 10) Ki lifi likelezo za lu fa Pitrosi? Ku utwa likelezo zeo ku ka lu tusa cwañi kuli lu katelwe ki Jehova?

3, 4. (a) Pitrosi naa buleziñi, mi naa file temuso mañi? (b) Ki lifi lisupo ze talu ze lu ka nyakisisa?

³ Hamulaho wa ku bulela ka za ku feliswa kwa lifasi la Satani, Pitrosi naa ize: “Mu lukela ku pila ka mizamao ye kenile hahulu, ni ka bulapeli.” (2 Pit. 3:11, 12) Pitrosi naa ziba kuli batu ba ba eza tato ya Jehova ni ba ba bonisa tulemeno to tu mu tabisa ki bona feela ba ba ka piliswa mwa “lizazi la ka likanyisa batu Mulimu.” (Isa. 61:2) Kacwalo muapositola Pitrosi naa ekelize kuli: “Haili mina balatiwa, ha mu lemusizwe litaba zeo pili, mu tone; kakuli ha mu ka hohiwa ni mina ki bupumi bwa ba ba maswe bao, mu ka suhana mwa wa mwa ku tiya kwa mina.”—2 Pit. 3:17.

⁴ Bakeñisa kuli Pitrosi naa li yo muñwi wa batu be ne ba “lemusizwe litaba zeo pili,” naa ziba kuli mwa mazazi a maungulo Bakreste ne ba ka tokwa ku tokomela hahulu kuli ba zwelepili ku sepahala. Mi hasamulaho muapositola Joani naa talusize libaka. Naa bonezi cimo kuli Satani naa ka lundulwa kwa lihalimu ni kuli naa ka ba ya “halifile maswe” kabakala “ba ba buluka milao ya Mulimu, ni ba ba sweli bupaki bwa Jesu.” (Sin. 12:9, 12, 17) Batanga ba Mulimu ba ba tozizwe ili ba ba sepahala hamohocwalo ni “lingu ze ñwi” ze sepahala ba ka tula. (Joa. 10:16) Luna bo ka butu? Kana lu ka zwelapili ku sepahala? Lu ka tusiwa ku eza cwalo haiba lu ikataza ku ba ni (1) tulemeno to tu tabisa Mulimu, (2) mizamao ni bulapeli ze si na litiba kamba se si nyazahala, ni (3) mubonelo o munde wa miliko. Ha lu nyakisiseñi lisupo zeo.

Mu be ni Tulemeno to tu Tabisa Mulimu

5, 6. Ki tulemeno tufi to lu swanela ku ba ni tona, mi ki kabakalañi ha lu swanela ‘ku ikataza hahulu’ ku ba ni tona?

⁵ Kwa makalelo a liñolo la hae la bubeli, Pitrosi naa ñozi kuli: “Mu ikataze hahulu kuli kwa tumelo ya mina mu ekeze maata; kwa maata mu ekeze zibo; kwa zibo mu ekeze buiswalo; kwa buiswalo mu ekeze ku itiisa; kwa ku itiisa mu ekeze bulapeli; kwa bulapeli mu ekeze ku latana, mane ku lata batu kaufela. Kakuli zeo ha li li teñi ku mina, mi ili ka buñata, li ka mi tokwisa buzwa ni ku palelwa, mwa ku beya miselo mwa zibo ya Mulenaa luna Jesu Kreste.”—2 Pit. 1:5-8.

⁶ Kaniti, lu tokwa ‘ku ikataza hahulu’ ku eza misebezi ye lu tusa ku ba ni tulemeno to tu tabisa Mulimu. Ka mutala, lu tokwa ku ikataza ku fumanehanga kwa mikopano kaufela ya Sikreste, ku balanga Bibele zazi ni zazi, ni ku banga ni tuto ye nde ya ka butu. Mi lu tokwa ku sebeza ka taata ni ku lelanga hande kuli lu bange ni Nako ya ku Lapela Sina Lubasi ye nde, ye tabisa, ili ya kamita. Ha lu se lu twaezi ku ezanga cwalo, ku ka lu bela bunolo ku ba ni mikwa ye minde—sihulu ha se lu iponezi bunde bwa ku ba ni mikwa yeo.

7, 8. (a) Batu ba bañwi ba buleziñi ka za Nako ya ku Lapela Sina Lubasi? (b) Mu sweli ku tusiwa cwañi ki Nako ya ku Lapela Sina Lubasi?

⁷ Kaizeli yo muñwi naa ñozi cwana ka za Nako ya ku Lapela Sina Lubasi: “I lu konisa ku ituta litaba ze ñata.” Mi yo muñwi u li: “Ku bulela feela niti, ne ni sa lati kuli tuto ya buka i feliswe. Ki wona mukopano o ne ni lata hahulu. Kono cwale ha se lu banga ni Nako ya ku Lapela Sina Lubasi, ni lemuhile kuli Jehova wa ziba se lu tokwa ni nako ye lu si tokwa.” Toho ya lubasi yo muñwi u talusa kuli: “Nako ya ku Lapela Sina Lubasi i lu tusa hahulu. Ku banga ni mukopano mo lu nyakisisanga litaba ze lu ama ni musalaa ka ki nto ye nde luli! Lu ikutwa kuli lu sweli lwa eza zwelopili mwa ku bonisa muselo wa moya o kenile, mi lu fumana tabo ye tuna mwa bukombwa bwa luna.” Mi toho ya lubasi yo muñwi u bulela kuli: “Banana ba ezanga lipatisiso za bona mi ba itutanga lika ze ñata—mi ba ikolanga ku eza cwalo. Tukiso ye i lu tusa ku ba ni buikolwiso bwa kuli Jehova wa ziba lipilaelo za luna mi wa alabanga litapelo za luna.” Kana ni mina mu na ni maikuto a swana ka za tukiso yeo ye zwa ku Mulimu?

⁸ Mu si ke mwa lumeleza lika ze nyinyani ku lyanganisa tukiso ya mina ya ku lapela sina lubasi. Batu ba bañwi ba ba nyalani ne ba ize: “Mwa lisunda zee ne ze felile, ne ku na ni nto ye ne ezahalanga mwa lubasi lwa luna la Bune ni la Bune manzibwana ye ne batile ku lu palelwisa ku itutanga, kono ne lu si ka lumeleza nto yeo ku lu lyanganisa.” Ki niti kuli ka linako ze ñwi mwa kona ku cinca tomahanyo ya mina. Nihakulicwalo, mu bone teñi kuli ha mu shuti Nako ya ku Lapela Sina Lubasi nihaiba ka sunda iliñwi!

9. Jehova naa tiisize cwañi Jeremia, mi lu kona ku itutañi kwa mutala wa hae?

⁹ Mupolofita Jeremia naa lu tomezi mutala o munde. Naa tokwa ku tiiswa ki Jehova mi naa itumezi hahulu kwa tuso yeo. Tiiso yeo ne i mu tusize ku kutaza ka ku tundamena kwa batu be ne ba sa lati ku utwa. Naa bulezi kuli: “Linzwi la Muñaa Bupilo [ne li] swana sina mulilo o ni cisa, o kenyizwe mwa masapo a ka.” (Jer. 20:8, 9) Hape ne li mu tusize ku itiisa mwa linako ze taata ze ne zwezipili ku fitela Jerusalema i sinyiwa. Kacenu lu na ni Linzwi la Mulimu le li ñozwi ili le li kwanile. Ha lu ikataza ku ituta lona ni ku bona lika mwa li bonela Mulimu sina mwa naa ezelize Jeremia, lu ka itiisa ka tabo mwa bukombwa, lu ka sepahala ha lu likiwa, mi lu ka ba ni mizamao ye kenile ni ku lapela Mulimu ka nzila ye kenile.—Jak. 5:10.

Mu Zwelepili ku ba ba ba “si na Litiba Kamba se si Nyazahala”

10, 11. Ki kabakalañi ha lu swanela ku eza ka maata kuli lu zwelepili ku ba ba ba “si na litiba kamba se si nyazahala,” mi lu tokwa ku ezañi?

¹⁰ Ka ku ba Bakreste lwa ziba kuli lu pila mwa mazazi a maungulo. Kacwalo, ha lu komokiswi ki batu ba lifasi ba ba lata hahulu lika za toile Jehova, ze cwale ka mukwañuli, muzamao o maswe wa buhule, ni lindwa. Ka bukuswani lu kona ku bulela kuli mulelo wa Satani ki wa kuli: ‘Haiba batanga ba Mulimu ha ba konwi ku sabiswa, mwendi ba konwa ku silafazwa.’ (Sin. 2:13, 14) Kacwalo lu swanela ku utwa kelezo ya Pitrosi, ye li: “Mu eze ka maata kuli mu fumanwe ki Yena mu na ni kozo, mu si na litiba kamba se si nyazahala.”—2 Pit. 3:14.

¹¹ Pulelo ya kuli “mu eze ka maata” ibato swana ni susuezo ya naa file Pitrosi pili ya kuli “mu ikataze hahulu.” Kaniti, Jehova, yena ya naa susuelize Pitrosi ku bulela manzwi ao, wa ziba kuli lu tokwa ku ikataza ku zwelapili ku ba ba ba “si na litiba kamba se si nyazahala,” ili ku sa silafazwa ki lifasi la Satani. Ku ikataza ku kopanyeleza ku bukeleza pilu ya luna kuli i si ke ya lakaza lika ze maswe. (Mu bale Liproverbia 4:23; Jakobo 1:14, 15.) Hape lu tokwa ku itiisa kuli lu si ke lwa fokoliswa ki ba ba komoka mupilelo wa Bakreste ni ba “ba [lu] bulela maswe.”—1 Pit. 4:4.

12. Liñolo la Luka 11:13 li lu kolwisa ka zañi?

¹² Bakeñisa kuli ha lu si ka petahala, ku banga taata ku eza se si lukile. (Maro. 7:21-25) Lu kona ku ba ni sepo ya kuli lu ka tula mifokolo ya luna haiba feela lu lapela ku Jehova, ya fanga moya o kenile ku ba ba u kupa ku yena. (Luka 11:13) Mi moya wo u ka lu tusa ku ba ni tulemeno to tu tabisa Mulimu mi u ka lu tusa ku tiyela miliko ili ye kona ku ekezeha lizazi la Jehova ha li nze li sutelela.

Mu Tiiswe ki Miliko

13. Ki lika mañi ze ka lu tusa ku itiisa ha lu talimana ni miliko mwa bupilo?

¹³ Lu ka na lu talimana ni miliko ye fapahana-fapahana ha lu nze lu pila mwa lifasi la kale le. Kono mwa sibaka sa ku lembwaliswa ki miliko yeo, mu swanela ku i nga sina kolo ya ku bonisa lilato la mina ku Mulimu ni ku tiisa tumelo ya mina ku yena ni mwa Linzwi la hae. Mulutiwa Jakobo naa ñozi kuli: “Banabahesu, mu talime kuli ki tabo feela ha mu tahelwa ki miliko ye miñata, inze mu ziba kuli ku likwa kwa tumelo ya mina ku tahisa ku itiisa.” (Jak. 1:2-4) Hape mu hupule kuli Jehova “u ziba ku lamulela batu ba balapeli kwa miliko.”—2 Pit. 2:9.

14. Mutala wa Josefa u mi susueza cwañi?

¹⁴ Mu nyakisise mutala wa Josefa mwanaa Jakobo, ya naa lekisizwe mwa butanga ki bahulwani ba hae tota. (Gen. 37:23-28; 42:21) Kana Josefa naa felezwi ki tumelo bakeñisa lunya lo lu cwalo? Kana naa nyemezi Mulimu ka ku lumeleza nto ye maswe yeo ku mu ezahalela? Linzwi la Mulimu li alaba ka ku utwahala hande kuli batili! Mi yeo ne si yona tiko ya mafelelezo ya naa talimani ni yona Josefa. Hasamulaho naa tamelelizwe taba ya kuli naa batile ku swala musali likalala mi naa lengilwe mwa tolongo. Ni fo hape naa si ka tuhela ku sepahala ku Mulimu. (Gen. 39:9-21) Kono naa itiisize mwa miliko, mi kabakaleo naa fuyozwi hahulu.

15. Lu kona ku itutañi kwa mutala wa Naomi?

¹⁵ Ki niti kuli miliko ya kona ku lu swabisa kamba mane ku lu lembwalisa. Mwendi Josefa naa ikutwanga cwalo fokuñwi. Batanga ba Mulimu ba ba sepahala ba bañwi ne ba ikutwanga cwalo. Ha mu nyakisise mutala wa Naomi, ya naa shwezwi ki muunaa hae ni bana ba hae ba babeli. Naa ize: “Mu si ke mwa ni biza Naomi (Ya Tabisa); kono mu ni bize Mara (Ku baba), kakuli Ya-Maata-Kaufela u ni ezize ka mukwa o babisa hahulu.” (Ruti 1:20, 21) Naomi naa ikutwile sina mwa naa ka ikutwela mutu ufi kamba ufi. Kono sina Josefa, Naomi naa si ka latehelwa ki tumelo ya hae ku Mulimu ni bulikani bwa hae ni yena, mi naa si ka tuhela ku sepahala. Mi Jehova naa fuyozi musali ya butokwa yo. (Ruti 4:13-17, 22) Mwa Paradaisi ya fa lifasi ye taha Jehova u ka felisa bumaswe kaufela bwa tahiseze Satani ni lifasi la hae le li maswe. “Za kale ha li sa na ku hupulwa, nihaiba ku kutela mwa minahano.”—Isa. 65:17.

16. Lu swanela ku nga cwañi tapelo, mi ki kabakalañi?

¹⁶ Ku si na taba ni miliko ye lu kona ku kopana ni yona, ku ziba kuli Mulimu wa lu lata kamita, ku ka lu tusa ku itiisa. (Mu bale Maroma 8:35-39.) Satani ha na ku tuhela ku lika ku lu zwafisa, kono u ka palelwa haiba lu zwelapili ku pila “ka ku iswala ni ku tona, kuli [lu] kone ku lapela.” (1 Pit. 4:7) Jesu naa ize: “Mu tone mi mu lapele kamita, kuli mu kone ku banduka ku zeo kaufela ze ka bonahala, ni ku yema fapilaa Mwanaa mutu.” (Luka 21:36) Mwa puo ya Sigerike, Jesu naa itusisize linzwi le li talusa ku lapela ka taata. Ka ku lu eleza ku lapela ka taata, Jesu naa koñomekile kuli ye haki yona nako ya ku keshebisa mayemo a luna fapilaa hae ni Ndatahe. Batu ba ba lumelelwa ki Jehova ki bona feela ba ba ka piliswa ka lizazi la hae.

Mu Tukufalelwe Mwa Sebelezo ya Jehova

17. Haiba kalulo ya mina ya simu i taata, mu kona ku tusiwa cwañi ki mutala o munde wa bapolofita ba kwaikale?

¹⁷ Ku eza misebezi ye ama bulapeli bwa luna kwa lu katulusa. Nto yeo i lu hupulisa manzwi a Pitrosi, a li: “Mu lukela ku pila ka mizamao ye kenile hahulu, ni ka bulapeli.” (2 Pit. 3:11) Nzila ya butokwa ye lu kona ku pila cwalo ka yona ki ka ku shaela taba ye nde. (Mat. 24:14) Ki niti kuli mwa libaka ze ñwi ku kona ku ba taata ku kutaza, mi mwendi mabaka ha ku li cwalo kikuli batu ha ba tabeli taba ye nde kamba ba lu lwanisa kamba ba patehisizwe hahulu ki ku bata za bupilo. Batanga ba Jehova ba kwaikale ne ba talimananga ni matata a cwalo. Nihakulicwalo, ne ba si ka itulela, kono ne ba zwezipili ku bulelela batu manzwi a Mulimu “ka zazi ni zazi.” (Mu bale Jeremia 7:24-26; 2 Makol. 36:15, 16) Ne ba konile cwañi ku itiisa? Ne ba nga musebezi wa bona sina mwa naa u ngela Jehova, isiñi mo ne ba u ngela batu mwa lifasi. Hape ne ba nga kuli ki litohonolo le lituna ku bizwa ka libizo la Mulimu.—Jer. 15:16.

18. Musebezi wa ku kutaza Mubuso u ka ama cwañi ku bubaniswa kwa libizo la Mulimu kwapili?

¹⁸ Ni luna lu na ni tohonolo ya ku zibahaza libizo la Jehova ni mulelo wa hae. Mu nahane ka za taba ye: Bakeñisa musebezi wa luna wa ku kutaza, lila za Mulimu ha li na ku bulela kuli ne li si ka talusezwa ka za hae ni mulelo wa hae ha ka tahisa lizazi la hae le lituna. Kaniti, ka ku swana sina Faro wa kwaikale, lila zeo li ka ziba kuli Jehova ki yena ya li lwanisa. (Ex. 8:1, 20; 14:25) Ka nako ye swana, Jehova u ka kuteka batanga ba hae ba ba sepahala ka ku bonisa patalaza kuli ne ba li bayemeli ba hae luli.—Mu bale Ezekiele 2:5; 33:33.

19. Lu kona ku bonisa cwañi kuli lwa itebuha ku iswala kwa Jehova?

¹⁹ Kwa mafelelezo a liñolo la hae la bubeli, Pitrosi naa ñolezi balumeli ka yena kuli: “Mu lemuhe kuli, ku iswala kwa Mulena, ki ku piliswa kwa batu.” (2 Pit. 3:15) Kacwalo, ha lu zweleñipili ku itebuha ku iswala kwa Jehova. Ka mukwa ufi? Ka ku ba ni tulemeno to tu mu tabisa, ka ku zwelapili ku ba ba ba “si na litiba kamba se si nyazahala,” ka ku ba ni mubonelo o munde wa miliko, ni ka ku tukufalelwa mwa sebelezo ya Mubuso. Ka ku eza cwalo, lu ka fiwa limbuyoti za kamita ze ka ba teñi muta ku ba ni “lihalimu le linca, ni lifasi le linca.”—2 Pit. 3:13.

Kana Mwa Hupula?

• Lu kona cwañi ku ba ni tulemeno to tu tabisa Mulimu?

• Lu kona cwañi ku zwelapili ku ba ba ba “si na litiba kamba se si nyazahala”?

• Lu kona ku itutañi ku Josefa ni Naomi?

• Ki kabakalañi ku eza musebezi wa ku kutaza ha ku li tohonolo ye tuna?

[Siswaniso se si fa likepe 9]

Ki nto mañi ye ka tusa mina baana ni lubasi lwa mina ku ba ni tulemeno to tu tabisa Mulimu?

[Maswaniso fa likepe 10]

Lu kona ku itutañi ku Josefa ka mwa naa talimanezi ni miliko?