Mu Itute Linzwi la Mulimu

Mu Kona ku Ziba Cwañi Bulapeli Bwa Niti?

Taba ye i nyakisisa lipuzo ze ne mu kana mu ipuzize mi i bonisa ko mu kona ku fumana likalabo mwa Bibele ya mina. Lipaki za Jehova ba ka tabela ku nyakisisa ni mina likalabo ze.

1. Kana bulapeli bwa niti ki bu li buñwi feela?

Jesu naa lutile balateleli ba hae bulapeli bwa niti bu li buñwi feela. Bulapeli bo, bu swana feela sina nzila ye isa kwa bupilo. Jesu naa ize ka za nzila yeo: “Ki ba banyinyani ba ba i fumana.” (Mateu 7:14) Mulimu u amuhela feela bulapeli bo bu tomile fa Linzwi la hae la niti. Balapeli ba niti kaufela ba swalisani mwa tumelo i liñwi.—Mu bale Joani 4:23, 24; 14:6; Maefese 4:4, 5.

2. Ki kabakalañi bulapeli bo buñata bo bu shutana-shutana ha bu ipapata ku ba bwa Sikreste?

Bapolofita ba buhata ba silafalize Bukreste mi ba itusisize Bukreste kuli ba zwisezepili litakazo za bona. Sina mwa naa polofitezi Jesu, bapolofita ba buhata ba iponahaza sina ‘lingu’ za Jesu kono likezo za bona li swana sina za litongwani ze lapile. (Mateu 7:13-15, 21, 23) Bukreste bwa buhata ne bu hulile sihulu hamulaho wa lifu la baapositola ba Jesu.—Mu bale Likezo 20:29, 30.

3. Ki lika mañi ze swanela ku fumaneha mwa bulapeli bwa niti?

Balapeli ba niti ba kuteka Bibele sina Linzwi la Mulimu. Ba lika ka taata ku pila ka ku lumelelana ni likuka za Bibele. Kacwalo bulapeli bwa niti bwa shutana ni bulapeli bo bu tomile fa mihupulo ya butu. (Mateu 15:7-9) Balapeli ba niti ba latelela ze ba kutazanga.—Mu bale Joani 17:17; 2 Timotea 3:16, 17.

Bulapeli bwa niti bu kuteka libizo la Mulimu lona la Jehova. Jesu naa zibahalize libizo la Mulimu. Naa tusize batu ku ziba Mulimu mi naa ba lutile ku lapela kuli libizo la Mulimu li be le li kenile. (Mateu 6:9) Mwa silalanda sa mina, ki bulapeli bufi bo bu susueza batu ku itusisa libizo la Mulimu?—Mu bale Joani 17:26; Maroma 10:13, 14.

4. Mu kona ku ziba cwañi balapeli ba niti?

Bakreste ba niti ba kutazanga ka za Mubuso wa Mulimu. Mulimu naa lumile Jesu ku to kutaza za Mubuso. Mubuso wa Mulimu ki wona feela wo ka tahiseza batu lika ze nde. Jesu naa zwezipili ku bulela ka za Mubuso wo ku to fita fa lizazi la naa timezi. (Luka 4:43; 8:1; 23:42, 43) Naa bulelezi balateleli ba hae kuli ba kutazange ka za Mubuso wa Mulimu. Haiba mutu a mi atumela ku to ambola ni mina ka za Mubuso wa Mulimu, mu ka li ki wa bulapeli mañi?—Mu bale Mateu 10:7; 24:14.

Balateleli ba Jesu haki ba lifasi le li maswe le. Ha ba ikenyi mwa litaba za puso ya naha kamba mwa mifilifili ya mwa silalanda. (Joani 17:16) Hape ha ba likanyisi likezo ni mibonelo ye maswe za mwa lifasi le.—Mu bale Jakobo 1:27; 4:4.

5. Ki sifi sisupo sa butokwa hahulu se si zibahaza Bukreste bwa niti?

Bakreste ba niti ba latana hahulu. Ka ku bala Linzwi la Mulimu, ba itutile ku kuteka batu ba mishobo kaufela. Nihaike kuli bulapeli bwa buhata hañata se bu yemezi lindwa za macaba, balapeli ba niti ba hananga ku ikenya mwa lindwa zeo. (Mika 4:1-4) Ka ku shutana, balapeli ba niti ba itusisa nako ni maluwo a bona kwa ku tusa ni ku susueza batu ba bañwi.—Mu bale Joani 13:34, 35; 1 Joani 4:20, 21.

Ki sikwata sifi sa balapeli se si tomile lituto kaufela fa Linzwi la Mulimu, se si kuteka libizo la Mulimu, ni ku kutaza kuli Mubuso wa Mulimu ki wona feela wo ka tahiseza batu lika ze nde? Ki sikwata sifi se si bonisa lilato ni ku sa yemela lindwa? Bupaki kaufela bu bonisa kuli ki Lipaki za Jehova.—1 Joani 3:10-12.

Kuli mu bale litaba ze ñata ka za taba ye, mu bone kauhanyo 15 ya buka ye, ye hatisizwe ki Lipaki za Jehova.

[Siswaniso se si fa likepe 16]

“Ka mulomo ba li ba ziba Mulimu; kono ka misebezi ya bona ba mu latula.”—Tite 1:16