Lu Swanela ku ba ni Pilu-telele Mwa Bukombwa Bwa Luna
1. Jehova u bonisize cwañi pilu-telele kwa batu?
1 Mulimu u sebelisana ni batu ka pilu-telele. (Ex. 34:6; Samu 106:41-45; 2 Pit. 3:9) Musebezi wa ku kutaza taba ye nde ya Mubuso mwa lifasi kaufela ki wo muñwi wa mitala ye mituna ye bonisa kuli Mulimu u na ni pilu-telele ni lilato. Jehova saa sebelisani ni batu ka lilimo ze batoo ba 2,000, mi u zwelapili ku hohela ku yena batu ba ba tabela ku ba ni silikani ni yena. (Joa. 6:44) Ka ku swana ni Jehova, lu kona ku bonisa cwañi pilu-telele mwa bukombwa bwa luna?
2. Lu kona ku bonisa cwañi pilu-telele ha lu li mwa simu?
2 Bukombwa Bwa fa Ndu ni Ndu: Lu likanyisa pilu-telele ya Jehova ka ku kutaza ka ku sa “lisela” mwa libaka mo ku fumaneha batu ba ba si ka bonisa kale kuli ba tabela niti kamba kutokwa. (Lik. 5:42) Nihaike kuli lu kopananga ni batu ba ba sa tabeli niti, ba ba lu nyefulanga ni ku lu lwanisa mwa bukombwa bwa luna, lu zwelapili ku tiyela matata ao ka pilu-telele. (Mare. 13:12, 13) Hape lu bonisa pilu-telele ka ku tundamena mwa buikatazo bwa luna bwa ku selaela peu ya niti niha ku li taata ku fumana batu ba ba tabela ku utwa taba ye nde ya mubuso.
3. Ki kabakalañi ha lu tokwa ku ba ni pilu-telele ha lu eza misipili ya makutisezo ni ha lu zamaisa lituto za Bibele?
3 Lituto za Bibele: Ku hulisa simela ku tokwa pilu-telele. Nihaike kuli lwa kona ku si babalela, ha lu koni ku si akufisa kuli si hule ka bubebe. (Jak. 5:7) Ka mukwa wo swana, ku hula kwa luna kwa moya ku ezahalanga hanyinyani-hanyinyani. (Mare. 4:28) Batu be lu ituta ni bona ba kana ba fumana butata ku tuhela litumelo za bulapeli bwa buhata kamba lizo ze si za ka mañolo. Ha lu swaneli ku akufisa zwelopili ya baituti ba luna ka ku ba hapeleza kuli ba eze licinceho mwa bupilo bwa bona. Kono lu tokwa ku ba bonisa pilu telele kakuli moya wa Mulimu u tokwa nako ye ñata kuli u sebeze mwa pilu ya muituti wa luna.—1 Makor. 3:6, 7
4. Pilu-telele i kona ku lu tusa cwañi ku fa bupaki hande ku bahabo luna ba ba si balumeli?
4 Bahabo Luna ba ba si Balumeli: Nihaike kuli lu tabela kuli bahabo luna ba itute niti, lu bonisa pilu-telele ka ku libelela nako ye swanela ya ku ba taluseza litumelo za luna, ni ku tokomela kuli ha lu ba imezi ka litaba ze ñata. (Muek. 3:1, 7) Ka nako ya cwale, likezo za luna li ka ba fa bupaki bo bunde ka za niti ye lu itutile, mi lu ka zwelapili ku ba ba ba itukiselize ku taluseza ba bañwi tumelo ya luna ka musa ni ka likute. (1 Pit. 3:1, 15) Kaniti, haiba lu ba ni pilu-telele, lu ka kondisa mwa bukombwa bwa luna mi mane lu ka tabisa Ndataa luna wa kwa lihalimu.