Kupituluka mu Bijila
10 “Mu kine kitatyi’kya Yehova waunena’mba, ‘Sōnga bipāpo bibidi bya mabwe pamo na byobya bibajinji,+ ebiya ukande kuno ku lūlu; kadi ukalonga ne sanduku wa mityi. 2 Nami nkalemba pa bipāpo’bya binenwa byadi pa bipāpo bibajinji, byowavingakenye’bya, nobe ukebitūla mu sanduku.’ 3 Penepo nalonga sanduku wa mutyi wa akashia, nasōnga ne bipāpo bibidi bya mabwe pamo bwa byobya bibajinji, ebiya nakanda ku lūlu na bipāpo bibidi mu makasa ami.+ 4 Ebiya walemba pa bipāpo’bya binenwa byawalembele dibajinji,+ ke Mbila Dikumi*+ kadi, yesambile nenu Yehova ku lūlu mu mudilo+ mu difuku dya kitango;*+ penepa Yehova waumpa’byo. 5 Kupwa naalamuka kentūka ku lūlu,+ natūla bipāpo’bya mu sanduku onalongele, mobikidi ne pano, monka mwansoñaninye Yehova.
6 “Penepo bene Isalela batamba ku Belote Bene-Yakane baenda ku Mosela. Alone wafwidile kwine’kwa wajīkwa konka,+ wandi mwana Eleaza waanza kwingila bu kitobo pa kyandi kyaba.+ 7 Batamba kwine’kwa baenda ku Ngudekoda, batamba ku Ngudekoda baenda ku Yotebata,+ ntanda ikuka tuminonga twa mema.*
8 “Mu kine kitatyi’kya Yehova wapandula kisaka kya Levi+ mwanda wa kusela sanduku wa kipwano kya Yehova,+ kwimana ku meso a Yehova mwanda wa kumwingidila, ne kwesela bantu mu dyandi dijina,+ na mobalongela dyalelo. 9 O mwanda Levi kapelwepo kipindi nansha bupyani pamo na banababo. Yehova bo bupyani bwandi, monka mwamunenene Yehova Leza obe.+ 10 Amiwa nashele mu lūlu na monalongele musunsa mubajinji, mafuku 40 dyuba ne bufuku,+ kadi ne pano pene Yehova waungivwene.+ Yehova kasakilepo kadi kukonakanya. 11 Penepo Yehova waunena’mba, ‘Tangidila bantu kumeso, witeakanye mwa kwendela, amba batwele bayate ntanda yonatyipīle bakulutuba babo kwibapa’yo.’+
12 “Shi ke pano, a Isalela, le i kika kikulomba Yehova Leza obe?+ I enka kino’ki: kutyina Yehova Leza obe,+ kunanga mu mashinda andi onso,+ kumusanswa, kwingidila Yehova Leza obe na mutyima obe onso ne na muya* obe onso,+ 13 ne kulama mbila ne bitungo bya Yehova byonkusoñanya dyalelo dino’di amba wikale biyampe.+ 14 Tala’po, madiulu i a Yehova Leza obe, enka ne madiulu a madiulu,* ne ntanda ne byonso bidi’mo.+ 15 Ino Yehova wafwenene enka kudi bakulutuba bobe ne kwibasanswa, kadi wakutongele abewa, lutundu lwabo,+ mu bantu bonso, na momwikadile dyalelo. 16 Nanshi mufwaninwe kutōkeja* mityima yenu+ ne kuleka kwikala na mutwe mūmu* nankyo.+ 17 Mwanda Yehova Leza wenu i Leza wa baleza+ ne Mfumwandya bamfumu, Leza mukatampe, mukomokomo, kadi ulenga nzuba, kalongelangapo muntu bintu na mboloji+ kadi ketabijangapo kutyibwa milomo. 18 Utyibanga mambo a mwana wampikwa shandi* ne a mukaji wa kishala,+ kadi usenswe mweni wa kibundi,+ umupa byakudya ne bivwalwa. 19 Banwe nenu mufwaninwe kusanswa mweni wa kibundi, mwanda mwaikele beni ba kibundi mu ntanda ya Edipito.+
20 “Ukatyina Yehova Leza obe, ukamwingidila,+ ukamulamata, kadi ukatyipa mu dijina dyandi. 21 I aye ofwaninwe kutendela.+ Aye i Leza obe, wakulongēle bino bintu byonso bikatampe kadi bilenga nzuba byamwene meso obe.+ 22 Bakulutuba bobe batūkīle mu Edipito+ na bantu* 70, pano Yehova Leza obe wakuvudija pamo bwa ñenyenye ya mūlu.+