Kupituluka mu Bijila
23 “Muntu ense mutungulwe, musonsakanibwe miningi yandi nansha uketelwe ngitu ya bwana-bulume kabwanyapo kutwela mu kipwilo kya Yehova.+
2 “Mwana ense wa kamabula kabwanyapo kutwela mu kipwilo kya Yehova.+ Nansha ke ku lukongo lwa dikumi, kekukekalapo nansha umo wa ku lutundu lwandi ubwanya kutwela mu kipwilo kya Yehova.
3 “Mwine Amone ense nansha mwine Moabu kabwanyapo kutwela mu kipwilo kya Yehova.+ Nansha ke ku lukongo lwa dikumi, kekukekalapo nansha umo wa ku lutundu lwabo ubwanya kutwela mu kipwilo kya Yehova nansha dimo, 4 mwanda kebailepo kukukwasha na byakudya ne mema powadi mu dishinda utamba ku Edipito,+ kadi mwanda bakakulobēle Balame mwanā Beole wa ku Petole wa Mesopotemya āye akufinge.*+ 5 Yehova Leza obe kaivwenepo Balame.+ Ino, Yehova Leza obe washintyile mafingo ke madyese kodi,+ mwanda Yehova Leza obe wadi ukusenswe.+ 6 Kufwaninwepo kwibasakila ndoe nansha kwibasakila biyampe mafuku obe onso.+
7 “Kufwaninwepo kushikwa mwine Edoma, mwanda i mwanenu.+
“Kufwaninwepo kushikwa mwine Edipito, mwanda waikele mweni wa kibundi mu yabo ntanda.+ 8 Lukongo lwa busatu lwa bana bobabutwile lubwanya kutwela mu kipwilo kya Yehova.
9 “Shi ubatūdila balwana nobe nkambi, ufwaninwe kunyema kintu kyo-kyonso kibi.*+ 10 Shi mwana-mulume waikala wa disubi mwanda wa mema a bwana-bulume amutambile bufuku,+ ufwaninwe kutamba panja pa nkambi kadi kakajokelapo mu nkambi. 11 Shi kyolwa kibaoloba, ukoya mema, kupwa ubwanya kujokela mu nkambi pa kupona kwa dyuba.+ 12 Kukatongwa kifuko kya kufula* kya kwingidija panja pa nkambi, kadi e kofwaninwe kwenda. 13 Kadi ukekala na kapamba mu bingidilwa byobe. Pokazunzama panja, ukakola nako kīna ne kujīka tobe tuvwi. 14 Mwanda Yehova Leza obe unañanga mu nkambi+ yobe mwanda wa kukunyongolola ne kukupa balwana nobe, kadi nkambi yobe ifwaninwe kwikala ijila,+ kutyina’mba wakamona modi kintu kyampikwa kwendela’mo, ne kuleka kwikala nobe.
15 “Kufwaninwepo kupāna umpika kudi mfumwandi shi wanyema mfumwandi waiya kodi. 16 Ubwanya kwikala mu bukata mobe mu kifuko kyonso kyatonga mu bibundi byobe, konso kwasaka. Kufwaninwepo kumususula.+
17 “Mu bana bana-bakaji ba Isalela kemukekalapo ndumba*+ nansha umo, kadi mu bana bana-balume ba Isalela kemukekalapo ndumba* nansha umo.+ 18 Kufwaninwepo kutweja maondo a mwana-mukaji ndumba nansha maondo* a mwana-mulume ndumba* mu njibo ya Yehova Leza obe mwanda wa kufikidija mpiko yobe, mwanda onso abidi i kintu kya munyanji kudi Yehova Leza obe.
19 “Kufwaninwepo kufutyija mwanenu na kamweno,+ ekale shi ubamwapuja lupeto, byakudya, nansha kintu kyo-kyonso kibwanya kulombwa na kamweno. 20 Ubwanya kufutyija mweni na kamweno,+ ino kufwaninwepo kufutyija mwanenu na kamweno,+ amba Yehova Leza obe akwesele mu mingilo yobe yonso mu ntanda yoenda kukayata ke yobe.+
21 “Shi ubapika mpiko kudi Yehova Leza obe,+ kokīja pa kufuta’yo.+ Mwanda Yehova Leza obe ukakulandula’yo binebine; shi bitupu kikekala ke bubi kodi.+ 22 Ino shi kupikilepo mpiko, kukekalapo na mambo a bubi.+ 23 Ukalama kinenwa kya milomo yobe,+ kadi ukafikidija byobya byatyipile kyakanwa kyobe bu kyamulambu kya kwilanga kudi Yehova Leza obe.+
24 “Shi ubatwela mu budimi bwa mañanza bwa mukwenu, ubwanya kudya mañanza ne byoikuta,* ino kufwaninwepo kwela nansha dimo mu kintu kyobe.+
25 “Shi ubatwela mu budimi bwa miseke bwa mukwenu, ubwanya kuposola bisansa byele na kuboko kobe, ino kufwaninwepo kupityija kikwakwa mu miseke ya mukwenu.+