Bilongwa bya Mafuku Umbajinji
12 Bano’ba bo bana-balume baile kudi Davida ku Zikelake+ kitatyi kyakadipo na bwanapabo bwa kunanga pa mwanda wa Solo+ mwanā Kishi, kadi badi mu ba bulwi bakomokomo badi bamukwasha mu bulwi.+ 2 Badi belumbile mata a miketo kadi badi babwanya kwingidija kuboko kwa lundyo ne kuboko kwa lunkuso+ kwine pa kwela mabwe a topito+ nansha pa kwela miketo na buta bwa miketo. Badi babadilwa mu banababo na Solo batambile kwa Benjemani.+ 3 Ahiezele ye wadi mutwe, pamo ne Yoashe, bano babidi badi bana ba Shemahe mwine Ngibea;+ Yeziele ne Pelete bana ba Azamaveta,+ Belaka, Yehu mwine Anatote, 4 Ishimaya mwine Ngibeone,+ wa bulwi mukomokomo wa mu bantu makumi asatu+ kadi wadi pangala pa boba makumi asatu; kadi ne Yelemia, Yahaziele, Yohanana, Yozabada mwine Ngedela, 5 Eluzai, Yedimote, Beadia, Shemadia, Shefatia mwine Hadife, 6 Elekana, Ishia, Azalela, Yoezele, Yashobeame, bene Kola;+ 7 ne Yoēla ne Zebadia bana ba Yelohama wa ku Ngedole.
8 Bene Ngade bamo bakekupile ku mutamba wa Davida ku kifuko kikomejibwe kya mu ntanda mutuputupu;+ badi ba bulwi bakomokomo, basola bafundijibwe divita besakanye na mangabo makatampe ne misungu, ba mapala pamo bwa a bantambo, kadi badi banyema lubilo pamo bwa tusha pa ngulu. 9 Ezelu ye wadi mutwe, Obadia wa bubidi, Ediabu wa busatu, 10 Mishimana wa buná, Yelemia wa butano, 11 Atai wa busamba, Ediele wa busamba-bubidi, 12 Yohanana wa mwānda, Elezabada wa kitema, 13 Yelemia wa dikumi, Makebana wa dikumi ne umo. 14 Bano badi babadilwa mu bene Ngade,+ mitwe ya kibumbo kya divita. Mutyetye bininge wadi pamo bwa bantu 100 kadi mukatampe bininge pamo bwa bantu 1 000.+ 15 Bano bo bantu baabukile Yodano mu kweji umbajinji paadi uyudile ne pa milomo. Kadi bapangile bonso badi bekala mu bitabataba, kutunduka ne kushika kwine.
16 Bana-balume bamo ba Benjemani ne ba Yuda nabo baile kudi Davida ku kifuko kyandi kikomejibwe.+ 17 Ebiya Davida waenda kobadi kawibanena’mba: “Shi mubaiya kondi mu ndoe mwanda wa kunkwasha, mutyima wami ukelunga nenu pamo. Ino shi i mwanda wa kungaba ku balwana nami nansha maboko ami byokealongelepo kibi, Leza wa bakulutuba betu amone’kyo ne kutyiba mambo.”+ 18 Ponkapo kala mushipiditu watūkila* Amasai+ mutwe wa bantu makumi asatu amba:
“Twi bantu bobe, abe Davida, kadi tudi nobe, abe mwanā Yese.+
Ndoe, ndoe ikale nobe, kadi ndoe ikale ne na yewa ukukwasha,
Mwanda Leza obe ukukwashanga.”+
Ebiya Davida webatambula, webatūla pamo na mitwe ya bibumbo bya basola.
19 Bantu bamo ba kwa Manase nabo baalamukīle kudi Davida pawaile na bene Fidishitia kutamba Solo bulwi; ino kakweshepo bene Fidishitia mwanda bamfumu ba bene Fidishitia+ besambīle pamo, bamupanga kebanena’mba: “Usa kwalamukila kudi mfumwandi Solo, kadi būmi bwetu bukekala mu kyaka.”+ 20 Pawaendele ku Zikelake,+ bano bo bantu batambile kwa Manase baalamukila kwadi: Adenahe, Yozabada, Yediaele, Mikaele, Yozabada, Edihu, ne Ziletai, mitwe ya tununu twa kwa Manase.+ 21 Bakweshe Davida paadi ulwa na kibumbo kya bañonaona mwanda abo bonso badi bana-balume bakomokomo, bakankamane,+ kadi baikele ke bamfumu mu kibumbo kya divita. 22 Difuku ne difuku bantu badi bāya’nka kwiya kukwasha Davida+ enka ne byobaikele ke kibumbo kikatampe kya divita pamo bwa kibumbo kya Leza.+
23 Buno bo bungi bwa mitwe ya boba badi belumbile byabulwi baile kudi Davida mu Hebelona+ mwanda wa kumupa bulopwe bwa Solo mungya musoñanya wa Yehova.+ 24 Bana-balume ba Yuda badi basela mangabo makatampe ne misungu badi bantu 6 800, belumbile byabulwi. 25 Ku bene Shimioni, bana-balume bakomokomo, bakankamane, ba mu kibumbo kya divita badi bantu 7 100.
26 Ku bene Levi, bantu 4 600. 27 Yehoyada+ ye wadi mutangidiji wa bana ba Alone,+ bantu baadi nabo i 3 700, 28 ne Zadoki,+ nsongwalume mukomokomo kadi mukankamane, pamo ne bamfumu 22 ba ku njibo ya shandi.
29 Ku bene Benjemani, banababo na Solo,+ kwadi bantu 3 000, bavule mu abo badi bidi balama bintu bya njibo ya Solo. 30 Ku bene Efelaimi, kwadi bana-balume bakomokomo, bakankamane 20 800, batumbe mu mobo a bashabo.
31 Ku kipindi kya kisaka kya Manase, kwadi bantu 18 000 batelelwe pa majina ba kwiya kubikika Davida. 32 Ku kisaka kya Isakala, bantu baivwanije kitatyi ne kuyuka bine byadi bifwaninwe kulonga Isalela, i bantu 200 ba mu mitwe yabo, ne banababo bonso bobadi baludika. 33 Kwa Zebuluna, kwadi bantu 50 000 badi babwanya kwingila mu kibumbo kya divita, badi bepanga mu milongo ya bulwi na byabulwi byonso bya divita, bonso bekupile kudi Davida kashā bamulamata na mutyima umo.* 34 Kwa Nafatale, kwadi bamfumu 1 000, ne bantu 37 000 bobadi nabo badi basela mangabo makatampe ne mikobe. 35 Ku bene Dani, boba badi bepanga mu milongo ya bulwi i bantu 28 600. 36 Kwa Ashela nako, boba badi babwanya kwingila mu kibumbo kya divita mwanda wa kwipanga mu milongo ya bulwi badi bantu 40 000.
37 Boba batambile bobwa bukila bwa Yodano,+ ku bene Lubeni, ku bene Ngade, ne ku kipindi kya kisaka kya Manase, i basola 120 000 badi na byabulwi bya miswelo yonso bya divita. 38 Bano bonso’ba badi bana-balume ba divita, bekutyile umbumo mu mulongo wa bulwi; baile na mutyima wabo onso mutuntulu ku Hebelona kubikika Davida pa Isalela yense, kadi bantu bonso ba Isalela bashele’ko nabo baitabije abo bonso pamo* kubikika Davida.+ 39 Baikele kwine’kwa na Davida mafuku asatu, badya batoma, mwanda banababo badi kala bebalongolwele bintu. 40 Kadi, boba badi kubwipi nabo, enka ne boba badi ku Isakala, ku Zebuluna, ne ku Nafatale, badi bebaletela byakudya pa bampunda, pa bangamedia, pa bimbulu, ne pa bañombe—bidibwa bya bukula, mikate ya mikuyu miponde ne mañanza, vinyu, māni, bañombe ne mikōko kapwila, mwanda badi basangala mu Isalela.