Bilongwa bya Mafuku wa Bubidi
2 Ebiya Solomone waleta musoñanya wa kūbaka njibo ya dijina dya Yehova+ ne njibo* ya bulopwe bwandi.+ 2 Solomone walemba mulongo wa bana-balume 70 000 bu ba kwingila mingilo mikwabo,* ne bana-balume 80 000 bu ba kusōnga mabwe mu ngulu,+ ne bantu 3 600 bu batadi ba kwibaludika.+ 3 Ne kadi, Solomone watumina Hilama+ mulopwe wa Tyila musapu amba: “Nongele monka mowalongēle tata Davida powamutumīne mityi ya sedele ya kūbaka nayo njibo* mwa kwikala.+ 4 Pano yeu ngubaka njibo ya dijina dya Yehova Leza wami, mwanda wa kumupandwila’yo, kusōka ensense ya mananshi+ ku meso andi, ne mwanda wa mikate mitentakanye*+ ya kyaba kyonso ne byamulambu bisōkwe, lubanga ne kyolwa,+ mu Masabato,+ mu makweji katenta,+ ne mu bitatyi bya masobo+ a Yehova Leza wetu. Kino i kitungo kya myaka na myaka kudi Isalela. 5 Njibo yongubaka’i isa kwikala mikatampe, mwanda Leza wetu i mukatampe kupita baleza bakwabo bonso. 6 Le i ani ubwanya mwingilo wa kumūbakila njibo? Mwanda madiulu ne diulu dya madiulu keakokejapo kumubwana,+ penepo ami ne ani le amba mūbakile njibo shi ke’nkapo kifuko kya kufitwila’po mwīshi wa bitapwa ku meso andi? 7 Shi ke pano ntumine’ko sendwe wa bwino mu mingilo ya olo, ndalama, mukuba,+ byuma, myoya ityilakana, bityididila pyū, nyushi ifītuluka kadi uyukile kulonga bifwatulo. Ukengila mu Yuda ne mu Yelusalema na basendwe bami ba bwino bobaletele kudi tata Davida.+ 8 Kadi ntumine’ko ne mityi ya sedele, ya jenevidiye+ ne ya alengumu+ ya ku Lebanona, mwanda ndyukile biyampe amba bengidi bobe bapotolwele senene kutēta mityi ya mu Lebanona.+ Bengidi bami bakengidila pamo na bengidi bobe+ 9 mwanda wa kunongolwela mityi mivule mpata, ke-pantu njibo yongubaka’i isa kwikala mikatampe bya mwiko. 10 Pano tala! Nsa kuleta byakudya bya bengidi bobe,+ boba batēta mityi: Makola* 20 000 a ñano, makola 20 000 a mebele a buluba, mabate* 20 000 a vinyu, ne mabate 20 000 a māni.”
11 Pa kino Hilama mulopwe wa Tyila watumina Solomone mukanda namino amba: “Yehova usenswe bantu bandi, o mwanda wakubikika bu mulopwe wabo.” 12 Kupwa Hilama wanena’mba: “Yehova Leza wa Isalela atendelwe, mwine walongele madiulu ne ntanda, mwanda wape Mulopwe Davida mwana wa tunangu,+ mupebwe budyumuku ne ñeni,+ mwine usa kūbakila Yehova njibo ne njibo ya bulopwe bwandi. 13 Pano yeu ntuma Hilama-Abi, sendwe wa bwino, mupebwe ñeni,+ 14 mwanā mwana-mukaji mwine Dani ino shandi i wa ku Tyila; i mupotolole kwingila na olo, ndalama, mukuba, byuma, mabwe, mityi, myoya ityilakana, nyushi ifītuluka, ne bityididila pyū.+ Ubwanya kulonga bifwatulo bya miswelo yonso ne kulonga byonso byobamunena kupunga.+ Usa kwingidila pamo na basendwe bobe ba bwino ne basendwe ba mfumwami, shobe Davida. 15 Shi ke pano mfumwami atume ñano, mebele a buluba, māni, ne vinyu byaalaile bengidi bandi.+ 16 Netu tusa kutēta mityi ya mu Lebanona,+ ya buvule bonso bosaka, kadi tusa kukuletela’yo lwa mema ku Yopa+ mikutyile pamo; nobe ukeikandija ku Yelusalema.”+
17 Ebiya Solomone wabala bana-balume bonso badi beni ba kibundi mu ntanda ya Isalela,+ kupwa kubala kwebabadile shandi Davida,+ kwatanwa bantu 153 600. 18 Penepo watūla bantu 70 000 bu ba kwingila mingilo mikwabo,* bantu 80 000 bu ba kusōnga mabwe+ mu ngulu, ne bantu 3 600 bu batadi ba kwingidija bantu mingilo.+