Bene Kodinda Umbajinji
4 I biyampe muntu etumone bu bengidi* ba Kidishitu ne batulama ba bifibwe bikola bya Leza.+ 2 Mu uno mwanda, kisakwa kudi batulama i kutanwa bakōkele. 3 Pano i kya mvubu mityetye mpata kondi shi banwe muntyibile mambo nansha kidye kya bantu. Na bubine, nkītyibilangapo mambo ne ami mwine. 4 Mwanda nkidipo na kintu nansha kimo kya kwitopeka. Inoko ke kunenapo amba ami ne moloke; mwine untyibila mambo i Yehova.*+ 5 Nanshi, kemwakityibai mambo+ nansha amo kumeso kwa kitatyi kifwaninwe, kufika ne bīya Mfumwetu. Aye ukalupwila bintu bifyame bya mu fukutu ku mwinya ne kuyukanya milangwe ya ku mityima, penepo umo ne umo ukatendelwa na Leza.+
6 Shi ke pano, a banabetu, bino bintu nanena’byo* padi ami mwine ne Apolosa+ mwanda wa kamweno kenu, amba kupityila kudi batwe muyuke kino kijila’mba: “Kemwakitabukai byobya bilembelwe,” kutyina’mba mwakayulwa mitatulo,+ kemumone amba umo utabukile mukwabo. 7 Mwanda i ani le wakushiañanya abe na mukwabo? Na bubine, i kika kyodi nakyo kyokupelwepo?+ Shi bine bakupele’kyo, le kyowianinya na abe kapelwe’kyopo i kika?
8 Le banwe kemudi kala babwanwe? Le kemudi kala bampeta? Le kemudi banze kubikala bu balopwe+ pampikwa batwe? Bine nadi nsaka mwanze kubikala, amba netu tubikale nenu bu balopwe.+ 9 Mwanda ami mona’mba Leza wetutūla batwe batumibwa ku mfulo kwa mulongo pamo bwa bantu batyibilwe nsambu ya lufu,+ mwanda tubaikala bwa bya kubandilwa pa kikailo na ino ntanda,+ na bamwikeulu ne bantu bene. 10 Batwe twi balembakane+ pa mwanda wa Kidishitu, ino banwe mwi badyumuke mudi Kidishitu; batwe twi bakōkekōke, ino banwe mwi bakomo; banwe mwi balēmekibwe, ino batwe’ko tufutululwa. 11 Kufika ne ino nsá tukifwa nzala+ ne kyumwa+ kadi tukifwa mutaka* ne kukupilwa*+ ne kubulwa kwa kwikala 12 ne kuputuma na mingilo, twiingidila na makasa etu batwe bene.+ Shi betutuka, tweselanga;+ shi betupangapanga, tūmininanga na kitūkijetyima;+ 13 shi betuvubakenya myanda, tulondololanga na kutalala;*+ tubaikala bwa bya busala* bya ino ntanda, bwa bityakuku bya ku bintu byonso, kufika ne pano.
14 Nalembe bino bintu, ke mwandapo wa kwimufwija bumvu, ino i kwimudyumuna pamo bwa bami bana baswedibwe. 15 Mwanda nansha shi mwikale na balami* 10 000 mudi Kidishitu, bine kemudipo na bashenu bavule; mwanda mudi Kidishitu Yesu, naikala shenu kupityila ku myanda miyampe.+ 16 Nanshi nemwisāshila, ikalai kungiula ami.+ 17 O mwanda nemutumina Temote, mwanda i wami mwana muswedibwe kadi mukōkele mudi Mfumwetu. Aye ukemuvuluja manwa* ami a mudi Kidishitu Yesu,+ monka momfundijijanga konsokonso mu kipwilo ne kipwilo.
18 Bamo i bayule mitatulo, ulanga’mba nkisapo kwiya komudi. 19 Ino shi Yehova* uswile nsa kwiya komudi panopano ponka, kadi nsa kuyuka bukomo bwa babo bayule mitatulo’bo, ke binenwapo byabo. 20 Mwanda Bulopwe bwa Leza kebudipo mu binenwa, ino i mu bukomo. 21 Le kyomusaka’po i kika? Le ngiye komudi na lusonde’ni+ na buswe ne kutalala kwa mushipiditu?