Bilongwa bya Mafuku wa Bubidi
36 Kupwa bantu ba ntanda’ya bayata Yehoahaze+ mwanā Yoshia bamubikika mu Yelusalema pa kyaba kya shandi.+ 2 Yehoahaze wadi na myaka 23 paabikele, wabikele myeji isatu mu Yelusalema. 3 Inoko, mulopwe wa Edipito wamubikula mu Yelusalema kadi watunga ntanda’ya mambo a talenta* 100 ya ndalama ne talenta imo ya olo.+ 4 Ne kadi, mulopwe wa Edipito wabikika Ediakimi mwanabo na Yehoahaze pa Yuda ne pa Yelusalema, washinta ne dijina dyandi ke Yehoyakimi; ino Neko+ wasela mwanabo Yehoahaze waenda nandi mu Edipito.+
5 Yehoyakimi+ wadi na myaka 25 paabikele, wabikele myaka 11 mu Yelusalema. Wadi ulonga nyeke bibi ku meso a Yehova Leza wandi.+ 6 Nebukaneza+ mulopwe wa Babiloni wakanda kwadi amba amukute na nkano ibidi ya mukuba ne kumuselela ku Babiloni.+ 7 Kadi Nebukaneza waselela bipungwa bimo bya mu njibo ya Yehova ku Babiloni, webitūla mu njibo yandi mikatakata mu Babiloni.+ 8 Myanda mikwabo ya mānga ya Yehoyakimi, bintu bya munyanji byaalongele ne kyokya kyatenwe mwadi, i milembwe mu Mukanda wa Balopwe ba Isalela ne ba Yuda; ebiya wandi mwana Yehoyakini wabikala pa kyandi kyaba.+
9 Yehoyakini+ wadi na myaka 18 paabikele, wabikele myeji isatu ne mafuku dikumi mu Yelusalema; kadi wadi ulonga nyeke bibi ku meso a Yehova.+ 10 Ku ngalwilo kwa mwaka,* Mulopwe Nebukaneza watumanya bamulete ku Babiloni,+ pamo ne bintu bya bulēme bya mu njibo ya Yehova.+ Kupwa wabikika Zedekia mwanabo na shandi pa Yuda ne pa Yelusalema.+
11 Zedekia+ wadi na myaka 21 paabikele, wabikele myaka 11 mu Yelusalema.+ 12 Wadi ulonga nyeke bibi ku meso a Yehova Leza wandi. Ketyepejepo ku meso a mupolofeto Yelemia,+ mwine wesambile na kishima kya Yehova. 13 Watombokēle ne Mulopwe Nebukaneza,+ mwine wamutyipije padi Leza, waumija mutwe* ne mutyima, wapela kujokela kudi Yehova Leza wa Isalela. 14 Bakata bonso ba babitobo ne bantu babudilwe kikōkeji bininge, balonga bintu byonso bya munyanji bya mizo, kadi basubija njibo ya Yehova+ yaapandwile mu Yelusalema.
15 Yehova Leza wa bakulutuba babo wadi wibadyumuna nyeke kupityila ku mikendi yandi, wibadyumuna kyaba ne kyaba mwanda waivwanine bantu bandi ne kīkalo kyandi lusa. 16 Ino abo badi’nka bazawila mikendi ya Leza wa bine,+ kadi bafutulula binenwa byandi+ ne kubenga bapolofeto+ bandi kufika ne byaile bukalabale bwa Yehova pa bantu bandi,+ byakoma’nka ne kwibondapa.
17 Penepo webaletela mulopwe wa bene Kaladea,+ mwine waipaile bansongwalume babo na kipete+ mu njibo ya kipandulwe kyabo;+ kaivwaninepo lusa nsongwalume nansha mujike, mununu nansha kilema.+ Leza wamupēle bintu byonso mu kuboko kwandi.+ 18 Bipungwa byonso bya mu njibo ya Leza wa bine, bikatampe ne bityetye, ne byabulēme bya mu njibo ya Yehova, ne byabulēme bya mulopwe ne bamfumu bandi, byonso webiselela ku Babiloni.+ 19 Wasōka njibo ya Leza wa bine,+ wapomona Lubumbu lwa Yelusalema,+ wasōka biteba byandi byonso bikomejibwe na mudilo, waonakanya ne bintu byonso bya bulēme.+ 20 Waselela bu misungi ku Babiloni boba bapandile ku kipete,+ baikala ke bengidi bandi+ ne bandi bana kufika ne byashilwile kubikala bulopwe bwa Peleshia,+ 21 mwanda wa kufikidija kinenwa kya Yehova kyanenene Yelemia,+ kufika ne byafutyile ntanda masabato ayo. Mafuku onso oyadi ilēle mu masala yalamine sabato,+ mwanda wa kufikija myaka 70.+
22 Pa kufikidija kinenwa kya Yehova kyanenene Yelemia,+ mu mwaka mubajinji wa Kilusa+ mulopwe wa Peleshia, Yehova watunwine mushipiditu wa Kilusa mulopwe wa Peleshia eleje lubila mu bulopwe bwandi bonso, welulemba+ ne kwilulemba’mba: 23 “Kilusa mulopwe wa Peleshia wanena namino amba, ‘Yehova Leza wa mūlu waumpe malopwe onso a pano pa ntanda,+ kadi waumpe ne mwingilo wa kumūbakila njibo mu Yelusalema, udi mu Yuda.+ Ense udi mu bukata mwenu wa ku bantu bandi bonso, Yehova Leza wandi ekale nandi kadi akande.’”+