Bene Kodinda Umbajinji

8 Pa mwanda utala byakudya bilambulwe ku bilezaleza:+ Tuyukile amba batwe bonso tudi na buyuki.+ Buyuki bwitatulanga, ino buswe abo butamijanga.+ 2 Shi muntu ulanga’mba uyukile kintu, nankyo kaikele kuyuka’kyo senene mwafwaninwe kwikiyukila. 3 Ino shi muntu usenswe Leza, uno’u wayukwa nandi.

4 Pa mwanda utala kudya byakudya bilambulwe ku bilezaleza, tuyukile amba kilezaleza+ ke kintupo mu ino ntanda ne amba kudi enka Leza umo kete.+ 5 Mwanda nansha shi kudi betwa bu baleza, shi mūlu shi panshi,+ monka mokwikadile “baleza” bangibangi ne “bamfumu” bangibangi, 6 na bubine kotudi batwe kudi Leza umo+ kete Tata,+ bintu byonso bitambile kwadi ne batwe bene pa mwanda wandi;+ kadi kudi Mfumwetu umo, Yesu Kidishitu, bintu byonso bidi’ko+ kupityila kwadi ne batwe bene kupityila kwadi.

7 Inoko, ke bonsopo badi na buno buyuki.+ Ino bamo, pa mwanda wa kupwana kobadi bapwene kala na kilezaleza, badyanga byakudya pamo bwa bintu bilambulwe ku kilezaleza,+ kadi mutyima wabo wa mundamunda byoudi mukōkekōke, usubijibwanga.+ 8 Ino byakudya kebiketufwenyapo pabwipi na Leza;+ shi ketudilepo, ketubipilepo kutabuka, kadi shi tudye, ketulumbulukilepo kutabuka.+ 9 Ino tadijai nyeke kutyina’mba bwanapabo bwenu bwa kutonga bwakekala ke kikukaja ku boba bakōkekōke.+ 10 Mwanda shi muntu akumone abe wa buyuki udya bidibwa mu tempelo ya kilezaleza, le mutyima wa mundamunda wa yao muntu mukōkekōke ubulwe kūmijibwa uyuka nandi kakadi byakudya bilambulwe ku bilezaleza? 11 Penepo na buyuki bobe, muntu mukōkekōke’wa waonakanibwa, mwanenu obafwidile kudi Kidishitu.+ 12 Pomulubila banabenu uno muswelo ne kutapa mutyima wabo wa mundamunda mukōkekōke,+ mulubilanga Kidishitu. 13 O mwanda shi kyakudya kikukajanga mwanetu, nkikadipo monka mwita wa ntanda nansha dimo, kutyina’mba nakakukaja mwanetu.+