Bene Tesalonika wa Bubidi
3 Shi ke pano, banwe banabetu, takamanai kwitulombelela’ko,+ amba kinenwa kya Yehova* kyendelele kusambakana bukidibukidi+ ne kutumbijibwa, monka mokikadile komudi, 2 ne amba tumone kukūlwa ku bantu ba nshikani kadi babi,+ mwanda lwitabijo ke kintupo kidi na bantu bonso.+ 3 Ino Mfumwetu aye i wa binebine, kadi ukemukomeja ne kwimukinga kudi yewa mubi. 4 Ne kadi, tukulupile mudi Mfumwetu pa mwanda wenu, amba banwe mulondanga bulombodi bwetu kadi mukendelela kwibulonda. 5 Mfumwetu endelele kuludikila mityima yenu senene ku buswe bwa Leza+ ne ku kūminina+ pa mwanda wa Kidishitu.
6 Pano tubemulombola, banwe banabetu, mu dijina dya Mfumwetu Yesu Kidishitu, amba sonsolokai mwanetu ense unanga bya kavutakanya,+ kanangepo mwendele bishi* byomwatambwile* kotudi.+ 7 Mwanda banwe bene muyukile mwa kwitwiwila batwe,+ mwanda ketwadipo twiendeja bya kavutakanya mu bukata mwenu, 8 kadi ketwadilepo byakudya bya muntu ku bitupu.*+ Inoko, bufuku ne dyuba twadi twingila mingilo ya masusu ne ipungija kutyina twakekala kiselwa kya kulēmenena muntu kampanda mu bukata mwenu.+ 9 Ke kunenapo amba ketudipo na lupusa,+ aa, ino twadi tusaka kwimupa kimfwa kya kwiula.+ 10 Bine, potwadi nenu, twadi twimupanga uno musoñanya’mba: “Shi muntu kaso kwingila, nabya kakidya.”+ 11 Mwanda tubaivwana’mba kudi bamo bananga bya kavutakanya mu bukata mwenu,+ kebengilangapo nansha dimo, ino beela mu myanda keibatalepo.+ 12 Bano bantu tubebasoñanya ne kwibakankamika mudi Mfumwetu Yesu Kidishitu amba bengile talala nyā ne kudya byakudya byobesokwela abo bene.+
13 Ino banwe, a banabetu, kemwakilekai kulonga biyampe. 14 Ino shi muntu kakōkelapo binenwa byetu bya mu uno mukanda, yao mutūlei kiyukeno kadi kemwakipwanai nandi,+ amba afwe bumvu. 15 Inoko kemwakimumonai bu walwana, ino endelelai kumudyumuna+ bu mwanenu.
16 Nanshi Mfumwetu wa ndoe emupe aye mwine ndoe kyaba kyonso mu miswelo yonso.+ Mfumwetu ekale nenu banwe bonso.
17 Luno i lwimu lwami ami Polo, lonalemba na makasa ami,+ e kyo kiyukeno mu mukanda ne mukanda; e monembelanga namino.
18 Kanye ka ku buntu bitupu ka Mfumwetu Yesu Kidishitu kekale nenu banwe bonso.