Bilongwa bya Mafuku Umbajinji

23 Davida paadi ke mununu, būmi bwandi kebudi dya ku mfulo,* wabikikile wandi mwana Solomone pa Isalela.+ 2 Ebiya wakongakanya bamfumu bonso ba Isalela, ne babitobo,+ ne bene Levi.+ 3 Bene Levi ba myaka 30 kokanda babadilwe;+ bungi bwabo, mitwe yabo yabadilwe muntu ne muntu i 38 000. 4 Mu bano’ba, bantu 24 000 bo badi batala mwingilo wa ku njibo ya Yehova, kwadi ne bemaniji ne batyibi 6 000,+ 5 kadi kwadi batulama ba ku kibelo 4 000,+ ne bantu 4 000 badi batendela+ Yehova na byombanwa bine byanenene Davida amba, “Nebipunga mwanda wa kutendela.”

6 Ebiya Davida webapanga* mu bibumbo+ mwendele bana ba Levi: Ngelashona, Kohata, ne Meladi.+ 7 Ku bene Ngelashona kwadi Ladani ne Shimei. 8 Bana ba Ladani i Yehiele mutwe, Zetame, ne Yoela,+ basatu. 9 Bana ba Shimei i Shelomote, Haziele, ne Halane, basatu. Bano yo yadi mitwe ya mobo a bashabo ya kwa Ladani. 10 Bana ba Shimei nabo i Yahate, Zina, Yeushi, ne Bedia. Bano baná badi bana ba Shimei. 11 Yahate wadi mutwe, Zīza nandi wa bubidi. Ino ba Yeushi ne Bedia byokebadipo na bana bana-balume bangi, babadilwe bu njibo imo ya shabo na kiselwa kimo kyonka.

12 Bana ba Kohata i Amalama, Izala,+ Hebelona, ne Uziele,+ baná. 13 Bana ba Amalama i Alone+ ne Mosesa.+ Ino Alone watūdilwe lonso pafula+ mwanda wa kupandula Kijila Nakampata, aye ne bandi bana, mwanda wa kulambula bitapwa ku meso a Yehova, kumwingidila, ne kwesela bantu madyese mu dijina dyandi nyeke ne nyeke.+ 14 Ino Mosesa muntu wa Leza wa bine, bandi bana babadīlwe mu kisaka kya bene Levi. 15 Bana ba Mosesa i Ngelashoma+ ne Ediezela.+ 16 Ku bana ba Ngelashoma, Shebwele+ ye wadi mutwe. 17 Ku lutundu lwa* Ediezela, Lehabia+ ye wadi mutwe; Ediezela kadipo na bana bakwabo bana-balume, ino bana ba Lehabia badi bangi bininge. 18 Ku bana ba Izala,+ Shelomite+ ye wadi mutwe. 19 Bana ba Hebelona i Yedia mutwe, Amadia wa bubidi, Yahaziele wa busatu, ne Yekameame+ wa buná. 20 Bana ba Uziele+ i Mika mutwe ne Ishia wa bubidi.

21 Bana ba Meladi i Maheli ne Mushi.+ Bana ba Maheli nabo i Eleaza ne Kishi. 22 Eleaza wafwa, ino kadipo na bana bana-balume, poso’nka bana-bakaji. O mwanda bana ba Kishi, babutule babo,* bebasongele. 23 Bana ba Mushi i Maheli, Edela, ne Yelemote, basatu.

24 Bano bo bana ba Levi mungya mobo a bashabo, mitwe ya mobo a bashabo, mungya boba balembelwe, bene babadilwe ne kutūlwa ku mulongo mungya majina abo kadi badi bengila twaji ku mingilo ya ku njibo ya Yehova, kushilwila pa ba myaka 20 kokanda. 25 Mwanda Davida wanenene amba: “Yehova Leza wa Isalela wape bantu bandi kukōkolokwa,+ kadi usa kushikata nyeke mu Yelusalema.+ 26 Ne kadi bene Levi kebakaselapo kipema nansha kingidilwa kyakyo kyo-kyonso mwanda wa mingilo yakyo.”+ 27 Mwanda mungya bulombodi bwa mfulo bwa Davida, bene Levi kushilwila pa ba myaka 20 kokanda babadilwe. 28 Mwingilo wabo wadi wa kukwasha bana ba Alone+ ku mingilo ya ku njibo ya Yehova, kutala bipango,+ byumba bya kudīla’mo, kutōkeja bintu byonso bijila, ne twaji tonso tulombwa ku mingilo ya ku njibo ya Leza wa bine. 29 Badi bakwasha na mikate mitentakanye,*+ bukula bupēla bwa kyamulambu kya miseke, tumikate tupapakane twampikwa kiyujo,+ mikate ya mu kininga, mukama musobakanye,+ ne bipimo byonso bya bintu bipungululwa ne bya bula. 30 Badi bemana lubanga ne lubanga+ mwanda wa kufwija ne kutendela Yehova, badi balongela monka ne kyolwa.+ 31 Badi bakwasha’ko kitatyi kyonso kyadi kilambulwa Yehova bitapwa bisōkwe mu Masabato,+ makweji katenta,+ ne pa bitatyi bya masobo,+ mwendele bungi bulombelwe mungya bijila byabyo, badi balonga enka nenki kyaba ne kyaba ku meso a Yehova. 32 Kadi badi bavuija biselwa byabo ku pema wa kubungakena’ko, ku kifuko kijila, ne kudi banababo bana ba Alone mwanda wa mingilo ya ku njibo ya Yehova.