Bilongwa bya Mafuku wa Bubidi
33 Manase+ wadi na myaka 12 paabikele, wabikele myaka 55 mu Yelusalema.+
2 Wadi ulonga bibi ku meso a Yehova, ulonda bilongwa bya munyanji bya mizo yapangilwe na Yehova ku meso a bantu ba Isalela.+ 3 Waubakulwile mitenta yobabundwile+ kudi shandi Hezekia, washimikila Babāla bisōkelo ne kulonga bipanda bikola,* wevukwila ku bibumbo byonso bya mūlu, webingidila.+ 4 Waubaka ne bisōkelo mu njibo ya Yehova,+ mine yanenene Yehova amba: “Mu Yelusalema mo mukekala dijina dyami nyeke.”+ 5 Waubakila ne bibumbo byonso bya mūlu bisōkelo mu bipango bibidi bya njibo ya Yehova.+ 6 Wapityija ne bandi bana mu mudilo+ mu Musanza wa Mwanā Hinome;+ walonga bya maleñanya,+ wabuka lubuko, walonga bya majende, watonga babuka na bibanda ne bilumbu.+ Walonga bibi bya mwiko ku meso a Yehova, mwanda wa kumusanshija.
7 Watūla nkishi musōnge waalongele mu njibo ya Leza wa bine,+ mine yanenene Leza kudi Davida ne kudi wandi mwana Solomone amba: “Mu ino njibo ne mu Yelusalema, onatonga mu bisaka byonso bya Isalela, mo monkatūla dijina dyami nyeke.+ 8 Kadi nkikatalulapo monka maulu a Isalela mu ntanda yonapele bakulutuba babo, shi balame ndaminine byonso byonebasoñenye, ne Bijila byonso ne misoñanya ne mutyibilo wa mambo byaletelwe kupityila kudi Mosesa.” 9 Manase wadi ulubija nyeke Yuda ne bekadi ba Yelusalema, wibalengeja balonge bibi bininge kupita mizo yatukije Yehova ku meso a bene Isalela.+
10 Yehova wadi unena nyeke Manase ne bantu bandi, ino abo kwivwana mpika.+ 11 Penepo Yehova webaletela bakata ba kibumbo kya divita kya mulopwe wa Ashidia, bakwata Manase na malobo* bamukuta nkano ibidi ya mukuba, bamuselela ku Babiloni. 12 Mu malwa andi, waabija Yehova Leza wandi amutōkelwe mutyima,* kadi wetyepeja bininge ku meso a Leza wa bakulutuba bandi. 13 Wadi umulomba nyeke, Nandi watengwa na kuzenza kwandi, waivwana kulomba kwaadi umulomba amutōkelwe mutyima, ko kujokeja wamujokeja ku Yelusalema mu bulopwe bwandi.+ Penepo Manase wayuka’mba Yehova i Leza wa bine.+
14 Kupwa waubakila Kibundi kya Davida+ lubumbu lwa panja, kushika kwa Ngiona+ mu musanza* kufika ne ku Kibelo kya Mwita wa Lui,+ welujokoloja kufika ne ku Ofele,+ welulepeja mūlu bininge. Kadi watonga bakata ba kibumbo kya divita mu bibundi byonso bikomejibwe bya Yuda. 15 Penepo watalula baleza ba kungi ne kyelekejo kya kilezaleza mu njibo ya Yehova+ ne bisōkelo byawaubakile mu lūlu lwa njibo ya Yehova+ ne mu Yelusalema, webyeleja panja pa kibundi. 16 Walongolola ne kisōkelo kya Yehova,+ washilula kutapila’po bitapwa bya kipwano+ ne bitapwa bya kufwija’ko,+ ebiya walombola Yuda engidile Yehova Leza wa Isalela. 17 Inoko bantu badi bakitapila bitapwa pa mitenta, nansha byobadi batapila’byo Yehova Leza wabo kete.
18 Myanda mikwabo ya mānga ya Manase, milombelo yaalombele kudi Leza wandi, ne binenwa byamunenene bamoni ba bimonwa mu dijina dya Yehova Leza wa Isalela, i bilembwe mu mānga ya balopwe ba Isalela. 19 Kadi milombelo yandi+ ne mwalondolwedilwe kuzenza kwandi, bubi bwandi bonso ne kubulwa kikōkeji kwandi,+ bifuko pawaubakile mitenta ne kushimika bipanda bikola*+ ne bankishi basōnge baalongele paadi ketyepeje, i bilembwe mu binenwa bya bamoni bandi ba bimonwa. 20 Penepo Manase walādikwa mwanda wa kukōkolokwa na bakulutuba bandi, bamujīka ku yandi njibo, ebiya wandi mwana Amona wabikala pa kyandi kyaba.+
21 Amona+ wadi na myaka 22 paabikele, wabikele myaka ibidi mu Yelusalema.+ 22 Wadi ulonga nyeke bibi ku meso a Yehova, na mwalongēle shandi Manase;+ kadi Amona watapile bitapwa ku bankishi bonso basōnge balongele shandi Manase,+ webengidila nyeke. 23 Ino aye ketyepejepo ku meso a Yehova+ na mwetyepejeje+ shandi Manase; ino, Amona wavudije mambo andi bininge. 24 Ku mfulo bengidi bandi bamukutyila kitumba,+ bamwipaila mu yandi njibo. 25 Ino bantu ba ntanda’ya baipaya boba bonso bakutyīle Mulopwe Amona+ kitumba, ebiya babikika wandi mwana Yoshia+ pa kyandi kyaba.