Kusokwelwa Kudi Yoano

10 Kadi namwene mwikeulu mukwabo mukomo utūka mūlu, uvwele* dikumbi, kadi nkongolo wadi pa mutwe wandi, ne mpala yandi yadi bwa dyuba,+ maulu* andi nao adi pamo bwa malenga a mudilo, 2 kadi wadi na kamuvungo kavungulule mu kuboko kwandi. Penepo wanyanta kulu kwandi kwa lundyo pa dijiba, ino kulu kwandi kwa lunkuso pa ntanda, 3 ebiya waela lubila na diwi dikatampe pamo bwa ntambo ubuluma.+ Aye pa kwela lubila, mawi a mikungulo isamba-ibidi+ esamba.

4 Ebiya mikungulo isamba-ibidi pa kwisamba, nadi kensake kulemba, ino naivwana diwi ditamba mūlu+ kedinena’mba: “Lamika kiyukeno pa bintu byesamba mikungulo isamba-ibidi, kadi kokilemba’byo.” 5 Mwikeulu onamwene wimene pa dijiba ne pa ntanda watulula kuboko kwa lundyo mūlu, 6 watyipa mu dijina dya Yewa mūmi nyeke ne nyekeke,+ wāpangile diulu ne bintu bidi’mo, ntanda ne bintu bidi’mo, ne dijiba ne bintu bidi’mo+ amba: “Kekukidipo kya kwilaijija monka. 7 Ino mu mafuku akekala mwikeulu wa busamba-bubidi+ pabwipi na kuvumija kimpungidi kyandi,+ kifibwe kikola+ kyasapwile Leza bu myanda miyampe ku bapika bandi bapolofeto+ kikafikijibwa bine ne pa mfulo.”

8 Kadi naivwene diwi ditamba mūlu+ dīsamba nami monka’mba: “Enda, kayate muvungo muvungulule udi mu kuboko kwa yewa mwikeulu wimene pa dijiba ne pa ntanda.”+ 9 Penepo naenda kudi mwikeulu, namulombola ampe kamuvungo. Nandi waunena’mba: “Yata udye’ko,+ kasa kuludija kifu kyobe, ino mu kyakanwa kyobe kakatobala’nka bwa būki.” 10 Penepa nayata kamuvungo’ka mu kuboko kwa mwikeulu nadya’ko,+ kadi mu kyakanwa kyami kadi katobala’nka bwa būki,+ ino pa kupwa kwikadya, mu kifu kyami mwalula bululu. 11 Ebiya baunena’mba: “Ufwaninwe kunena monka bupolofeto pa mwanda wa bantu ne mizo ne ndimi ne balopwe bangibangi.”