Kupituluka mu Bijila
11 “Ufwaninwe kusanswa Yehova Leza obe+ ne kulama mafuku onso byaakusoñenye ne bitungo byandi, ne mutyibilo wandi wa mambo, ne mbila yandi. 2 Muyukile’mba dyalelo dino nesambanga nenu, nkisambangapo na benu bana kebayukilepo nansha kwimwena bulemununi bwa Yehova Leza wenu,+ bukatampe bwandi,+ kuboko kwandi kwa bukomo+ ne kuboko kwandi kōlole. 3 Kebamwenepo biyukeno byandi, ne bilongwa byandi byaalongele mu Edipito kudi Felo mulopwe wa Edipito ne ku ntanda yandi yonso;+ 4 nansha byaalongele bibumbo bya divita bya Edipito, tubalwe twa Felo ne makalo a divita, byatokene mu mema a Dijiba Dityila pobadi bemulonda lubilo, ebiya Yehova webonakanya lonso.*+ 5 Kebamwenepo byawemulongēle mu ntanda mutuputupu ne byomwafikile kuno’ku, 6 nansha byaalongele ba Datani ne Abilama bana ba Ediabu mwanā Lubeni, pashitukile ntanda yebamina kubyu, pamo ne ba mu njibo yabo ne mapema abo ne bintu byonso byūmi byebalondele, ku meso a Isalela ense.+ 7 Meso enu emwenine bilongwa byonso bikatakata byalongele Yehova.
8 “Mufwaninwe kulama mbila yonso yonemupa dyalelo dino’di, amba mwikale bakomo, mwabukile mu ntanda’ya mwiiyate ke yenu, 9 kadi amba mwikale bōmi kitatyi kilampe+ mu ntanda yatyipile Yehova kupa’yo bakulutuba benu ne lutundu*+ lwabo, ntanda ikuka mabele ne būki.+
10 “Ntanda yoenda kukayata ke yobe keidipo bwa ntanda ya Edipito, yomwatambile’mo, mowadi ukuna nkunwa ne kusangila’yo na kulu* kobe, pamo bwa budimi bwa munamuna. 11 Inoko ntanda yosa kwabukila’mo wiiyate ke yobe i ntanda ya ngulu ne malungu a misanza.+ Itomanga mema anoka mūlu;+ 12 i ntanda italwa na Yehova Leza obe. Meso a Yehova Leza obe adi nyeke pa ayo, kushilwila ku ngalwilo kwa mwaka kutūla ne ku mfulo kwa mwaka.
13 “Kadi shi mukakōkele na kusumininwa mbila yami yonemusoñanya dyalelo dino’di ne kusanswa Yehova Leza wenu ne kumwingidila na mutyima wenu onso ne muya* wenu onso,+ 14 nami nkaleta ne mvula mu yenu ntanda pa kitatyi kitungwe, mvula wa ku ngalwilo ne mvula wa ku muketeko, kadi mukakongakanya miseke yenu ne vinyu yenu mipya ne māni enu.+ 15 Nkameneja munamuna mu madimi obe mwanda wa bimunanwa byobe, kadi ukadya waikuta.+ 16 Tai mutyima kutyina’mba mutyima wenu wakongolwa kemusāsuka ne kutōta baleza bakwabo ne kwivukwila kobadi.+ 17 Shi bitupu, bulobo bwa Yehova bukemudyendyemukila, kadi ukashita madiulu amba mvula aleke kunoka,+ nshi nayo ileke kulupula byangulwa byayo kadi mukafwa bukidi bonka mu ntanda imupa Yehova.+
18 “Mufwaninwe kulamika bino binenwa byami pa mutyima wenu ne muya* wenu ne kwibikuta pa kuboko kwenu bu kivulujo, kadi bikekala bu kabāla pa mpala yenu.*+ 19 Fundijai’byo benu bana, wisambe’byo poshikete mu njibo ne poenda mu dishinda ne polāla ne pobūka pene.+ 20 Lemba’byo pa ñunji ya njibo yobe ne pa bibelo byobe, 21 amba banwe ne benu bana mwikale bōmi kitatyi kilampe+ mu ntanda yatyipile Yehova kupa’yo bakulutuba benu,+ kyaba kyonso kidi diulu peulu pa ntanda.
22 “Shi mulame ndaminine ino mbila yonemupa ne kwiilonda, musanswe Yehova Leza wenu,+ munangile mu mashinda andi onso ne kumulamata,+ 23 Yehova ukapanga ino mizo yonso ku meso enu,+ nenu mukapanga mizo mikatampe kadi mingi kwimupita.+ 24 Ponso pomutyampa lwayo lwenu pakekala ke penu.+ Mukalo wenu ukekala tamba mu ntanda mutuputupu kutūla ku Lebanona, tamba ku Munonga, munonga wa Ufalete kutūla ne ku dijiba dya kushika.*+ 25 I kutupu muntu nansha umo ukemukomena.+ Yehova Leza wenu ukasambakanya kityino ne moyo wa kwimutyina mu ntanda yonso yomukananga’mo,+ monka mwaemulaile.
26 “Tala, natūla ku meso enu dyalelo dino’di dyese ne mafingo:+ 27 mukeselwa shi mukōkele mbila ya Yehova Leza wenu yonemusoñanya dyalelo dino’di,+ 28 kadi mukafingwa shi kemukōkelepo mbila ya Yehova Leza wenu+ ne shi musāsuke mu dishinda dyonemusoñanya kulonda dyalelo dino’di, kemulonda baleza bokemwadipo muyukile.
29 “Shi Yehova Leza obe wakutweja mu ntanda yokayata ke yobe, ufwaninwe kwesela* bantu dyese pa Lūlu lwa Ngedizimi ne kufinga bantu mafingo pa Lūlu lwa Ebalu.+ 30 Mwene idi bobwa bukila bwa Yodano dya kushika,* mu ntanda ya bene Kenani bashikete mu Alaba, kampalampala na Ngilengale, ku mutamba wa mityi mikatampe ya Mole?+ 31 Mwanda musa kwabuka Yodano mutwele muyate ntanda imupa Yehova Leza wenu.+ Shi mubeiyata kemwikele’mo, 32 mufwaninwe kuta mutyima mulonde misoñanya yonso ne mutyibilo wa mambo onemutūdila ku meso enu dyalelo.+