Kupituluka mu Bijila

5 Penepo Mosesa waita Isalela ense kaebanena’mba: “A Isalela, ivwana misoñanya ne mutyibilo wa mambo byonemusapwila dyalelo dino’di, kadi mufwaninwe kwifunda’byo ne kwibilama senene. 2 Yehova Leza wetu wasambile netu kipwano mu Holeba.+ 3 Yehova kasambilepo kino kipwano na bakulutuba betu, ino i na batwe, batwe bonso badi pano bōmi dyalelo. 4 Yehova wesambile nenu mpala na mpala mu lūlu, mu mudilo.+ 5 Nadi ñimene pa bukata bwa Yehova ne banwe mu kine kitatyi’kya+ mwanda wa kwimusapwila kinenwa kya Yehova, ke-pantu mwadi mutyina mudilo kadi kemwakandilepo ku lūlu.+ Nandi wanena’mba:

6 “‘Amiwa ne Yehova Leza obe wakutambije mu ntanda ya Edipito, mu njibo ya bupika.+ 7 Kufwaninwepo nansha dimo kwikala na baleza bakwabo poso’nka ami.*+

8 Kokelongela nkishi musōnge+ nansha kyelekejo* kya kintu kyo-kyonso kidi mūlu nansha kidi panshi, nansha kidi mu mema munshi mwa ntanda. 9 Kokevukwila kobadi nansha kwibengidila+ kwine, mwanda amiwa Yehova Leza obe ne Leza usakanga kulamatwa bunka,+ upa bana mfuto pa kilubo kya bashabo, ne ba ku lukongo lwa busatu ne lwa buná lwa boba banshikilwe,+ 10 ino ulombola buswe bwa ndamatyidile* kufika ne ku lukongo lwa kanunu lwa boba bansenswe kadi balama mbila yami.

11 “‘Kokengidija dijina dya Yehova Leza obe mu muswelo wampikwa kwendela’mo,+ mwanda Yehova kakalekapo kupa mfuto yewa ense wingidija dijina dyandi mu muswelo wampikwa kwendela’mo.+

12 “‘Lama difuku dya Sabato dikale dikola, monka mwakusoñaninye Yehova Leza obe.+ 13 Ukengila mingilo yobe yonso mu mafuku asamba,+ 14 ino difuku dya busamba-bubidi i sabato kudi Yehova Leza obe.+ Kufwaninwepo kwingila mwingilo+ nansha umo, nansha abe nansha obe mwana mwana-mulume nansha obe mwana mwana-mukaji nansha umpika obe mwana-mulume nansha umpika obe mwana-mukaji nansha ñombe obe nansha mpunda obe nansha nyema ense wa mu banyema bobe ba nja nansha mweni wa kibundi udi mu bibundi* byobe,+ amba umpika obe mwana-mulume ne umpika obe mwana-mukaji bakōkolokwe pamo bwa abe.+ 15 Vuluka’mba waikele umpika mu ntanda ya Edipito ne amba Yehova Leza obe wakutambije’mo na kuboko kwa bukomo ne kuboko kōlole.+ O mwanda Yehova Leza obe wakusoñenye ulame difuku dya Sabato.

16 Lēmeka shobe ne inobe,+ monka mwakusoñaninye Yehova Leza obe, amba wikale mūmi kitatyi kilampe kadi wikale biyampe* mu ntanda ikupa Yehova Leza obe.+

17 “‘Kokepayañana.+

18 “‘Nansha kulonga makoji.+

19 “‘Nansha kwiba.+

20 “‘Nansha kutūdila mukwenu bukamoni bwa bubela.+

21 “‘Nansha kwabila mukaja mukwenu.+ Nansha kwabila njibo ya mukwenu na makomwa-meso nansha budimi bwandi nansha umpika wandi mwana-mulume nansha umpika wandi mwana-mukaji nansha ñombe wandi nansha mpunda wandi nansha kintu kyo-kyonso kya mukwenu.’+

22 “Ino mbila* ino’i Yehova wesambile’yo na kipwilo kyenu kyonso mu lūlu, mu mudilo, mu dikumbi, ne mu mfindi bwī,+ na diwi dikatampe, kadi kabwejeje’kopo kintu kikwabo; kupwa walemba’yo pa bipāpo bibidi bya mabwe waumpa’yo.+

23 “Ino banwe pa kwivwana diwi ditamba mu fukutu, lūlu papo lutēma mudilo,+ mitwe yonso ya bisaka byenu ne bakulumpe baumfwena. 24 Penepo kemunena’mba, ‘Pano Yehova Leza wetu wetulombola ntumbo yandi ne bukatampe bwandi, kadi tubaivwana diwi dyandi ditamba mu mudilo.+ Dyalelo tubamone amba Leza ubwanya kwisamba na muntu ne kushala’ye mūmi.+ 25 Ino pano le kyotufwila i kika? Mwanda uno mudilo mukatampe ubwanya kwituloteja. Shi twendelele kwivwana diwi dya Yehova Leza wetu, bine tusa kufwa. 26 Mwanda le i ani mu bantu bonso ke mwivwane diwi dya Leza mūmi dīsamba mu mudilo pamo bwa batwe kadi wikele mūmi? 27 Abewa ukafwena kuteja byonso bikanena Yehova Leza wetu, kadi abe ye uketusapwila byonso bikulombola Yehova Leza wetu, ino batwe tukebivwana ne kwibilonga.’+

28 “Ebiya Yehova waivwana binenwa byomwesambile nami, Yehova waunena’mba, ‘Naivwana binenwa byesamba nobe bano bantu. Byonso byobanena i biyampe.+ 29 Shi’tu batele mutyima nyeke ku kuntyina+ ne kulama mbila yami yonso;+ nankyo byadi bya kwibendekela biyampe abo ne babo bana nyeke ne nyeke!+ 30 Enda ukebalombole amba: “Jokelai ku mapema enu.” 31 Ino abe ukashala nami pano, nkulombole mbila yonso, ne misoñanya, ne mutyibilo wa mambo byokebafundija ne byobakalama mu ntanda yonebapa ke yabo.’ 32 Pano banwe mufwaninwe kuta mutyima mulonge monka mwemusoñaninye Yehova Leza wenu.+ Kemufwaninwepo kwalamukila ku lundyo nansha ku lunkuso.+ 33 Mufwaninwe kwenda mu dishinda dyonso dyemusoñenye Yehova Leza wenu,+ amba mwikale bōmi, mwikale biyampe ne kulepeja mafuku enu mu ntanda yomukayata ke yenu.+