Kudi Bene Fidipai
2 Nanshi, shi kudi kwikankamika mudi Kidishitu, shi kusengibwa na buswe, shi bu bana na bana bwa ku mushipiditu,* shi kisanso kya ku mutyima ne lusalusa, 2 vudijai nsangaji yami ne pa mfulo na kwikala na ñeni imo yonka ne buswe bumo bonka, mwikele mu bumo* senene, na ñeni imo yonka.+ 3 Kemwakilongai kintu nansha kimo na lupotopoto+ nansha na kwisakila,+ ino na kwityepeja,* monai bakwenu amba i bemupite bukatampe.+ 4 Kemwakitai mutyima enka ku tumweno twa banwe bene,+ ino i ne ku tumweno twa bakwenu.+
5 Ikalai nyeke na uno mulangilo wadi ne na Kidishitu Yesu,+ 6 aye, nansha byaadi mu muswelo wa Leza,+ kaikelepo nansha na mulangwe wa kukimba kwikala mu ludingo lumo na Leza.+ 7 Aa, ino wekōlele aye mwine ne kwikala mu muswelo wa bu umpika,+ waikala muntu.*+ 8 Ne kadi, pawaile bu muntu,* wetyepeje waikala na kikōkeji kufika ne ku lufu,+ bine, lufu lwa ku mutyi wa masusu.*+ 9 O mwanda mwine Leza wamuzunzwile pa kyaba kya peulu kutabuka+ kadi wamupa na mutyima tō dijina didi peulu pa majina makwabo onso,+ 10 amba mu dijina dya Yesu manwi onso amufukatyile—a badi momwa mūlu ne a badi pano panshi ne a badi munshi mwa pa nshi+— 11 kadi ndimi yonso itabije patōkelela amba Yesu Kidishitu i Mfumwetu+ pa mwanda wa ntumbo ya Leza Tata.
12 Shi ke pano, banwe baswedibwe bami, enka momwikadilanga nyeke na kikōkeji, ke’nkapo pondi nenu ino kutabukidila pano ponkidipo nenu, mwielelei’ko nyeke mufikijije lupandilo lwenu na moyo ne luzakalo ponka. 13 Mwanda Leza ye mwine wimukomeja, ne kwimupa mutyima ne bukomo bwa kulonga monka mwaloelelwe. 14 Longai nyeke bintu byonso kwampikwa miuningo+ nansha lupata,+ 15 amba mwikale bampikwa kutopekwa ne bampikwa mambo, bana ba Leza+ bampikwa kakoba mu lukongo lukondame ne lunyengakane,+ momumunika pamo bwa bimuni mu ino ntanda,+ 16 mukwatyije nyeke kinenwa kya būmi.+ Penepo kemone bubinga bwa kusangela mu difuku dya Kidishitu, pa kuyuka’mba nkyanyemenepo lubilo lwa bitupu nansha kwingila mingilo mikomo ya bitupu. 17 Inoko, nansha shi mpungululwanga bwa kyamulambu kya bitomibwa+ pa kitapwa+ ne mwingilo ujila* wemufikije’ko lwitabijo lwenu, nasangala kadi nasepelela nenu banwe bonso. 18 Ne banwe nenu mo monka, mufwaninwe kusangala ne kusepelela pamo nami.
19 Inoko, ami nkulupile mudi Mfumwetu Yesu kwimutumina Temote+ panopano ponka, amba nkankamikwe shi natambula myanda yenu. 20 Mwanda nkidipo na muntu mukwabo wa milangwe na yandi ukata mutyima bya binebine ku myanda yenu. 21 Mwanda bakwabo bonso bakimbanga tumweno twa abo bene, ke tumwenopo twa Yesu Kidishitu. 22 Ino banwe muyukile mwaelombwedile aye mwine bu mufwaninwe, amba pamo bwa mwana+ na shandi, waingile nami bu umpika mwanda wa kwendeleja myanda miyampe kumeso. 23 O mwanda, i aye onkulupile kutuma shi namone’tu musa kupityila myanda yami. 24 Bine, nkulupile mudi Mfumwetu amba nami nsa kwiya panopano.+
25 Inoko pano namone amba i biyampe kwimutumina Epafolodetusa, mwanetu kadi mwingidi nami kadi sola mukwetu, mutumwa wenu kadi mwingidi watuminwe kunkwasha,+ 26 mwanda wabilanga bininge kwimumona banwe bonso kadi mutyima i mumunyoñame mwanda mwaivwene amba wabelele. 27 I bine, wabelele waswile’nka ne kufwa; ino Leza wamufwila’ko lusa, na bubine, ke enkapo aye kete, aa, ino i ne ami mwine, kutyina’mba nakekala na njia, nadi na yoi kendi na yoi. 28 Nanshi nsa kumutuma bya bukidibukidi, amba shi mubamumone musangale monka kadi ami nami ndeke kuzumbija mutyima bininge. 29 Nanshi mutundailei momutundaidilanga bantu mudi Mfumwetu na nsangaji yonso, kadi pai bantu ba uno muswelo bulēme bukatampe,+ 30 mwanda waswile kufwila mwingilo wa Kidishitu,* watūla būmi bwandi* mu kyaka mwanda wa kwimupingakena byokemudipo kuno amba añingidile.+