Bene Tesalonika wa Bubidi
2 Inoko, banwe banabetu, pa mwanda wa kitatyi kya kwikala’po kwa Mfumwetu Yesu Kidishitu+ ne wa kubungakanibwa batwe bonso kwadi,+ tubemulombe amba 2 kemwakatenkanibwai bukidi bonka mu milangwe yenu nansha kutuyulwa shi na binenwa binenenwe ku mushipiditu,*+ shi na musapu wa ku kanwa, nansha na mukanda umweka bu utamba kotudi, amba difuku dya Yehova*+ ke difike kala.
3 Kekwakikala muntu wa kwimulubija* mu muswelo kampanda, mwanda dino difuku kedikāyapo poso bupondo+ bwiye bidi ne muntu wa kujilula bijila+ asokolwe, mwana wa bonakani.+ 4 Aye i walwana kadi wizunzulanga peulu pa ense witwa bu leza nansha kintu kya kutōtwa,* amba ashikate mu tempelo ya Leza, kawitela aye mwine bu leza. 5 Lelo kemuvulukilepo amba ponadi nenu nadi nemulombolanga bino bintu?
6 Ino pano mubayuka kine kidi bu kijika, mwanda wa akasokolwe mu kitatyi kyandi kifwaninwe. 7 Bine, kifyame kya kuno kujilula bijila kingilanga kala,+ ino i kufika enka ne bikatalulwa’ko uno udi pano bu kijika. 8 Penepo na bubine, yewa ujilula bijila ukasokolwa, mwine ukafundulwa na Mfumwetu Yesu na mushipiditu wa kyakanwa+ kyandi ne kumutukija mu kitatyi kikamweka patōka+ kwikala’po kwandi. 9 Ino kwikala’po kwa yewa ujilula bijila i kupityila ku mingilo ingila Satana+ na bilongwa byo-byonso bya bukomo ne biyukeno bya bubela ne bintu bya kutendelwa*+ 10 ne bongojani bo-bonso bwa bukondame+ mwanda wa boba boneka, ke mfuto kobadi mwanda kebaitabijepo buswe bwa bubine amba bapande. 11 O mwanda mwine Leza webaleka bongolwe na myanda ya kwibalubija, amba bafule ku kwitabija bubela,+ 12 mwanda wa abo bonso batyibilwe butyibi mwanda kebaitabijepo bubine ino baloelelwe mu bukondame.
13 Inoko, tufwaninwe kufwija’ko Leza mafuku onso pa mwanda wenu, banwe banabetu bobasenswe kudi Yehova,* mwanda Leza wemutongele tamba ku ngalwilo+ mwanda wa lupandilo pa kwimupandula+ na mushipiditu wandi ne pa lwitabijo lwenu mu bubine. 14 Wemwityile ku luno lupandilo kupityila ku myanda miyampe yotusapula, amba mwikale na ntumbo ya Mfumwetu Yesu Kidishitu.+ 15 Penepo nanshi, banwe banabetu, imanijai pototo,+ kwatyijai nyeke bishi byomwafundijibwe,+ shi na musapu wa ku kanwa nansha na mukanda utamba kotudi. 16 Ne kadi, Mfumwetu Yesu Kidishitu mwine ne Leza Tata wetu, mwine wetusenswe+ ne kwitupa busengi bwa nyeke ne lukulupilo luyampe+ pa kanye ka ku buntu bitupu, 17 bemusenge ku mityima ne kwimukankamika* mu bilongwa ne binenwa byonso biyampe.