Kusokwelwa Kudi Yoano
20 Kadi namwene mwikeulu utūka mūlu na lufungulo lwa lupongo+ ne muyololo mukatampe mu kuboko kwandi. 2 Wakwata mpumina,+ nyoka wa kala na kala,+ Dyabola+ kadi Satana,+ wamukuta myaka 1 000. 3 Penepo wamwela mu lupongo+ wamushityila’mo ne kutūla’po kiyukeno, kutyina’mba wakongola monka mizo enka ne bipwa myaka 1 000. Kupwa kino’ki, ufwaninwe kukutululwa kakitatyi katyetye.+
4 Kadi namwene mpona, ne boba bashikete’po nabo bapelwe lupusa lwa kutyiba mambo. I amo, namwene myuya* ya boba baipailwe* pa mwanda wa bukamoni bwa Yesu bobasapwile ne myanda ya Leza yobadi besamba, ne boba kebatōtelepo kinyema kya ntanda nansha kyelekejo kyakyo kine kadi kebatambwilepo kayukeno pa mpala yabo nansha pa kuboko kwabo.+ Kadi baikele bōmi ne kubikala bu balopwe na Kidishitu+ myaka 1 000. 5 (Bafwe bashele’ko+ kebaikelepo bōmi enka ne byapwile myaka 1 000.) Luno lo lusangukilo lubajinji.+ 6 Wa nsangaji ne ujila i yewa ubadilwa mu lusangukilo lubajinji;+ pa bano lufu lwa bubidi+ keludipo na lupusa,+ ino bakekala babitobo+ ba Leza ne ba Kidishitu, kadi bakabikalanga bu balopwe pamo nandi myaka 1 000.+
7 Inoko myaka 1 000 pa kupwa’tu, Satana ukakutululwa mu kifungo kyandi, 8 ukatamba kongola yoya mizo mu mafinko aná a ntanda, Koka ne Makoka, kwibakongakenya pamo ku divita. Bungi bwa bano’ba budi’nka bwa musenga wa ku dijiba. 9 Penepa baendele pa ntanda yonso mituntulu ne kujokoloka nkambi ya bajila ne kibundi kiswedibwe. Ino mudilo watūka mūlu webaloteja.+ 10 Ebiya Dyabola mwine wadi wibongola waelelwe mu dijiba dya mudilo ne bibidikityi, mwadi kala kinyema kya ntanda+ ne mupolofeto wa bubela;+ kadi bakamweshibwa malwa* dyuba ne bufuku nyeke ne nyekeke.
11 Kadi namwene lupona lukatampe lutōka tō ne Yewa ushikete’po.+ Ntanda ne diulu byanyema lubilo+ ku meso andi, ne kobyaya jimejime. 12 Kadi namwene bafwe, bakatampe ne batyetye, bemene kumeso kwa lupona, ebiya mivungo yavungululwa. Ino muvungo mukwabo wavungululwa; i muvungo wa būmi.+ Bafwe’ba batyibilwa mambo mungya byobya bilembelwe mu mivungo mwendele bilongwa byabo.+ 13 Ebiya dijiba dyaaluja bafwe badi’mo, ne lufu ne Kibundu* byaaluja bafwe badi’mo, penepa kebatyibilwa mambo muntu ne muntu mwendele bilongwa byandi.+ 14 Penepo ne lufu ne Kibundu* byaelwa mu dijiba dya mudilo.+ Dino dyelekeja lufu lwa bubidi,+ ke dijiba dya mudilo+ kadi. 15 Ne kadi, yewa ense kadipo mulembwe mu mukanda wa būmi+ waelwa mu dijiba dya mudilo.+