Kupituluka mu Bijila
13 “Shi mu bukata mwenu mubatambe mupolofeto nansha muntu ulaa bya kumeso kupityila ku bilotwa, penepa wakupe kiyukeno nansha kilomboji, 2 kadi kiyukeno nansha kilomboji kyawakulombwele kibafikidila, kanena’mba, ‘Twaya tukalonde baleza bakwabo,’ baleza bokwadipo uyukile, ‘tukebengidile,’ 3 kufwaninwepo, kwivwana binenwa bya yao mupolofeto nansha yao mulotyi wa bilotwa,+ mwanda Yehova Leza wenu wimutompanga+ mwa kuyukila shi musenswe Yehova Leza wenu na mutyima wenu onso ne muya* wenu onso.+ 4 Mukalonda Yehova Leza wenu, mukamutyina, mukalama mbila yandi, mukevwana diwi dyandi; aye ye omukengidila, kadi ye omukalamata.+ 5 Ino yao mupolofeto nansha mulotyi wa bilotwa ukafikijibwa ku lufu,+ mwanda wakankamika butomboki bwa kutombokela Yehova Leza wenu—wemutambije mu ntanda ya Edipito ne kwimukūla mu njibo ya bupika—kakusāsukija mu dishinda dyakusoñenye Yehova Leza obe kwenda. Kadi abe ufwaninwe kutalula kibi mu bukata mobe.+
6 “Shi mwanenu, mwanā inobe, nansha obe mwana mwana-mulume nansha obe mwana mwana-mukaji nansha obe mukaji osenswe, nansha mulunda nobe wa pabwipi* kasake kukongola mu bufyafya kanena’mba, ‘Twaya tukengidile baleza bakwabo,’+ baleza bokwadipo uyukile abe nansha bakulutuba bobe, 7 ba mu baleza ba bantu bakujokolokele, bekale ba kubwipi nansha ba kulampe na kodi, tamba ku mfulo imo ya ntanda kutūla ne ku mfulo mikwabo ya ntanda, 8 kufwaninwepo kumwitabija nansha kumwivwana kwine,+ kadi kufwaninwepo kumukwatyilwa lusa nansha kumwivwanina kanye nansha kumukinga; 9 ino, ukamwipaya binebine.+ Kuboko kobe kukekala kubajinji kumwasa mabwe afwe, ebiya maboko a bantu bonso kealonda.+ 10 Ufwaninwe kumwasa mabwe ne byafwa,+ mwanda wadi kasake kukusāsukija kudi Yehova Leza obe, wakutambije mu ntanda ya Edipito, mu njibo ya bupika. 11 Penepo Isalela ense ukevwana ne kukwatwa moyo, kadi kebakalongapo monka kintu kibi nansha kimo pamo bwa kino mu bukata mwenu.+
12 “Shi mu kibundi kimo kya mu bibundi bikupa Yehova Leza obe kushikata’mo ubaivwana banena’mba, 13 ‘Bantu ba bitupubitupu abatambe mu bukata mwenu mwanda wa kusāsukija bekadi ba kibundi kyabo, kebanena’mba: “Twayai tukengidile baleza bakwabo,” baleza bokemwadipo muyukile,’ 14 ufwaninwe kutadija mwanda’wa, kukimba senene ne kwipangula,+ kadi shi kudi bubinga bulombola’mba kino kintu kya munyanji i kilongeke bine mu bukata mwenu, 15 ufwaninwe binebine kukubija bekadi ba kibundi’kya na kipete.+ Wikyonakanye+ na kipete ne kintu kyonso kidi’mo, pamo ne bimunanwa byakyo bine. 16 Penepa ukakongela bitūtwa byakyo byonso pa bukata bwa kīkwe kyakyo ne kusōka kibundi na mudilo, kadi bitūtwa byakyo bikekala bu kyamulambu kituntulu kudi Yehova Leza obe. Kikekala lonso ke mulwi wa masala. Kekikōbakululwapo nansha dimo. 17 Kuboko kobe kekufwaninwepo kuyata kintu nansha kimo kitūdilwe pafula mwanda wa konakanibwa,*+ amba Yehova afundule bulobo bwandi budyendyemuka ne kukukwatyilwa lusa ne kukwivwanina kanye ne kukuvudija, monka mwaatyipīle’kyo bakulutuba bobe.+ 18 Mwanda ufwaninwe kukōkela* Yehova Leza obe na kulama mbila yandi yonso yonkusoñanya dyalelo dino’di, nabya ukalonga byoloke ku meso a Yehova Leza obe.+