Kupituluka mu Bijila

22 “Shi ubamone ñombe wa mwanenu nansha mukōko wandi mujimine, kokeusūla ku kusaka.+ Ufwaninwe binebine kwiujokeja kudi mwanenu. 2 Ino shi mwanenu kashikatangapo kubwipi nobe nansha shi kumuyukilepo, ukaselela nyema’wa ku yobe njibo, kadi ukekala nobe enka ne bimukimba mwanenu. Penepa ukamujokejeja’ye.+ 3 E namino’u mokalongela na mpunda wandi, na kivwalwa kyandi, ne na kintu kyo-kyonso kijimije mwanenu kyosokwele. Kufwaninwepo kwikisūla.

4 “Shi ubamone mpunda wa mwanenu nansha ñombe wandi mupone mu dishinda, kokamusūla ku kusaka. Ufwaninwe binebine kumukwasha alangule nyema wandi.+

5 “Mwana-mukaji kafwaninwepo kuvwala kivwalwa kya mwana-mulume, nansha mwana-mulume kuvwala kivwalwa kya mwana-mukaji. Mwanda muntu ense ulonga namino i wa munyanji kudi Yehova Leza obe.

6 “Shi ubatana bunswa bwa koni kufula kwa dishinda mudi twana nansha mai, bwikale ku mutyi nansha pa nshi, kadi inato ushikete pa twana nansha pa mai, kufwaninwepo kusela inato ne twana twine.+ 7 Ukalekelela inato, ino ubwanya kusela twana. Longa namino amba bikwendekele biyampe kadi wikale mūmi kitatyi kilampe.

8 “Shi koubaka njibo mipya, ufwaninwe kulonga ne kalupango pa musaka obe,+ kutyina’mba wakaleta mambo a mashi pa njibo yobe mwanda muntu ubwanya kupona’po.

9 “Kufwaninwepo kukuna mu budimi bobe bwa mañanza nkunwa ya miswelo ibidi.+ Shi bitupu, byonso byokangula ku nkunwa yokunine, ne bipa bya mu budimi bwa mañanza bine bikapandulwa ku kipandulwe.

10 “Kufwaninwepo kudima na ñombe ne mpunda pamo.+

11 “Kufwaninwepo kuvwala kivwalwa kilonge na myoya ne bukonge bityange pamo.+

12 “Ukalonga manyanya ku mafinko aná a kivwalwa kyobe kyovwele.+

13 “Shi muntu wasonge mukaji, walāla nandi, ino kupwa wamushikwe* 14 kadi wamulambika’mba i mwiendeje bibi, wamupe ne dijina dibi amba: ‘Nasongele uno mwana-mukaji, ino ami pa kulāla nandi, nkimwenepo bukamoni bulombola’mba wadi mujike,’ 15 shandya uno mwana-mukaji ne inandi bakaleta bukamoni bulombola’mba uno mwana-mukaji wadi mujike kudi bakulumpe pa kibelo kya kibundi. 16 Shandya mwana-mukaji’wa ukanena kudi bakulumpe amba, ‘Nasongeje wami mwana mwana-mukaji kudi uno mwana-mulume, ino wamushikwe* 17 kadi umulambikanga’mba i mwiendeje bibi kanena’mba: “Namone amba obe mwana kadipo na bukamoni bulombola’mba wadi mujike.” Ino bukamoni bulombola’mba wami mwana wadi mujike bobu.’ Penepa bakabāla kisandi ku meso a bakulumpe ba kibundi. 18 Bakulumpe ba kibundi+ bakayata mwana-mulume’wa ne kumulemununa.+ 19 Bakamutunga mambo a mashekele* 100 a ndalama ne kupa’o shandya mwana-mukaji, mwanda mwana-mulume’wa wafutulula mujike wa Isalela,+ kadi ukekala nyeke wandi mukaji. Kakamulubulapo mafuku onso adi mūmi.

20 “Ino, shi byamulambika’bya i bya bine, kadi kekudipo bukamoni bulombola’mba mwana-mukaji’wa wadi mujike, 21 bakatambija mwana-mukaji’wa panja pa kibelo kya njibo ya shandi, kadi bantu ba mu kibundi kyabo bakamwasa mabwe ne byafwa, mwanda walongele kilongwa kya bumvu+ mu Isalela pa kulonga busekese* mu njibo ya shandi.+ Nabya ukatalula kibi mu bukata mwenu.+

22 “Shi abakwata mwana-mulume ulēle na mukaja bene, bonso babidi bafwaninwe kufwa pamo, ne mwana-mulume ulēle na mwana-mukaji ne mwana-mukaji mwine.+ Nabya ukatalula kibi mu Isalela.

23 “Shi mujike i mukwatyilwe na mwana-mulume, ino mwana-mulume mukwabo wamusambakana mu kibundi walāla nandi, 24 mukatambija bonso babidi panja pa kibelo kya kibundi’kya, mukebasa mabwe ne byobafwa, mwana-mukaji’wa mwanda kadidilepo mu kibundi, mwana-mulume nandi mwanda wafwija mukaja mukwabo bumvu.+ Nabya ukatalula kibi mu bukata mwenu.

25 “Ino shi mwana-mulume watene mu ntanda mwana-mukaji obakwatyīle, kadi mwana-mulume wamupite bukomo walāla nandi, nabya mwana-mulume walēle nandi’wa ukafwa bunka, 26 kufwaninwepo kulonga mwana-mukaji kintu. Mwana-mukaji kalongelepo bubi bwafwaninwe kufwila. Bidi pamo’nka na muntu watamba mukwabo, wamwipaya.*+ 27 Mwanda wamutene mu ntanda, kadi mwana-mukaji mukwatyilwe’wa wadidile, ino kekwadipo muntu wa kumukūla.

28 “Shi mwana-mulume watana mwana-mukaji mujike kakwatyīlwepo, wamukwata, walāla nandi kupwa abebakwata,+ 29 mwana-mulume walēle nandi’wa ufwaninwe kupa shandya mwana-mukaji mashekele 50 a ndalama, kadi ukekala ke wandi mukaji.+ Kakamulubulapo mafuku onso adi mūmi, mwanda wamufwija bumvu.

30 “Kekwakekala muntu wa kuyata mukaja shandi, kutyina’mba wakafwija shandi bumvu.*+