Kupituluka mu Bijila
7 “Shi Yehova Leza obe wakutweja mu ntanda yosa kutwela’mo’i ne kwiiyata ke yobe,+ aye ukatalula ne mizo ya bantu bavule ku meso obe:+ bene Hiti, bene Ngilangashi, bene Amole,+ bene Kenani, bene Pedizi, bene Hivi, ne bene Yebushi,+ mizo isamba-ibidi ya bantu bavule kadi bakomo kukupita.+ 2 Yehova Leza obe ukakupa’bo, nobe ukebanekenya.+ Ufwaninwe binebine kwibonakanya fututu.+ Kufwaninwepo kusamba nabo kipwano nansha kwibatōkelwa mutyima.+ 3 Kufwaninwepo kusamba nabo kipwano kya kwisonga.* Kokasongeja bobe bana bana-bakaji kudi babo bana bana-balume, nansha kusongela bobe bana bana-balume babo bana bana-bakaji.+ 4 Mwanda bakasāsukija bobe bana baleke kunonda kebengidila baleza bakwabo;+ penepa bulobo bwa Yehova bukemudyendyemukila, kadi ukemutukija fututu bukidibukidi.+
5 “Ino bino’bi e byomukebalonga: Mukapomona bisōkelo byabo, kuvingakanya byabo bikomo bikola,+ kutyumuna byabo bipanda bikola,*+ ne kusōka bankishi babo basōnge.+ 6 Mwanda banwe mwi bantu bajila ba Yehova Leza wenu, kadi Yehova Leza wenu i mwimutonge mwikale bantu bandi, kintu kyandi kya pa bula* mu bantu bonso badi pano pa ntanda.+
7 “Yehova pawemusenswe kisanso kikatampe ne kwimutonga, ke pa mwandapo wa buvule bomwadi kupita bantu bonso,+ ke-pantu mwadi batyetye bininge mu bantu bonso.+ 8 Ino, i mwanda Yehova wemusenswe kadi walamine mutyipo wandi waatyipīle bakulutuba benu,+ o mwanda Yehova wemulupwile na kuboko kwa bukomo, wemukūla mu njibo ya bupika,+ mu lupusa* lwa Felo mulopwe wa Edipito. 9 Abe uyukile biyampe amba Yehova Leza obe i Leza wa bine, Leza wa bubinebine, ulama kipwano kyandi ne buswe bwa ndamatyidile ku nkongo kanunu ya boba bamusenswe ne balama mbila yandi.+ 10 Ino boba bamushikilwe ukebalubwila ku mpala yabo na bonakani.+ Kakejepo kupa mfuto boba bamushikilwe; ukebalubwila ku mpala yabo. 11 O mwanda, tá mutyima ulame mbila ne misoñanya ne mutyibilo wa mambo byonkusoñanya dyalelo dino’di, londa’byo.
12 “Shi mwivwane nyeke uno mutyibilo wa mambo, mwiulame ne kwiulonda, Yehova Leza obe ukalama kipwano ne buswe bwa ndamatyidile byawatyipīle bakulutuba bobe. 13 Ukakusanswa, ukakwesela ne kukuvudija. Bine, ukakwesela na bana bavule*+ ne na bipa bya nshi yobe, miseke yobe, vinyu yobe mipya, māni obe,+ byana bya bañombe bobe ne twana twa mikōko yobe, mu ntanda yawatyipīle bakulutuba bobe kukupa’yo.+ 14 Abewa ukekala muntu mweselwe kupita bantu bonso;+ kekukekalapo mwana-mulume nansha mwana-mukaji momudi wampikwa bana, nansha bimunanwa byobe kubulwa bana.+ 15 Yehova ukakutalula mbá yonso, kadi kakakuponejejapo misongo mibimibi nansha imo na yoya yowayukile mu Edipito.+ Ino, ukaponejeja’yo boba bonso bakushikilwe. 16 Ukonakanya* bantu bonso bakupa Yehova Leza obe.+ Kufwaninwepo kwibakwatyilwa lusa,*+ kadi kufwaninwepo kwingidila baleza babo,+ mwanda kikakwikadila bu dikinga.+
17 “Shi konena mu mutyima obe amba, ‘Ino mizo i mitupite bungi. Le mbwanya kwiipanga namani?’+ 18 kufwaninwepo kwibakwatwa moyo.+ Ufwaninwe kuvuluka byobalongele Felo ne Edipito+ ense kudi Yehova Leza obe, 19 butyibi* bukatampe bwamwene meso obe ne biyukeno ne bingelengele+ ne kuboko kwa bukomo ne kuboko kōlole byakulupwile nabyo Yehova Leza obe.+ Byo bikalonga Yehova Leza obe ku bantu bonso botyina.+ 20 Yehova Leza obe ukatuma kutuyuka* pobadi enka ne bifwa boba badi bashele’ko+ ne badi bakufyeme. 21 Kokibazakala, mwanda Yehova Leza obe udi nobe,+ Leza mukatampe kadi ulenga nzuba.+
22 “Bine, Yehova Leza obe ukapanga ino mizo ku meso obe bityebitye.+ Abe kufwaninwepo kwibakubija lubilolubilo, kutyina’mba banyema ba ntanda bakakuvudila. 23 Yehova Leza obe ukakupa’bo, nobe ukebanekenya nekenyē ne byobatukila fututu.+ 24 Ukakupa balopwe babo mu kuboko kobe,+ nobe ukajimankanya majina abo munshi mwa diulu.+ I kutupu muntu nansha umo ukakukomena,+ enka ne byokebakubija.+ 25 Ukasōka bankishi basōnge ba baleza babo mu mudilo.+ Kokabila ndalama yabo ne olo* yabo nansha kuyata’yo ke yobe,+ kutyina’mba yakakupija mu dikinga, mwanda i kintu kya munyanji kudi Yehova Leza obe.+ 26 Kufwaninwepo kuselela kintu kya munyanji mu yobe njibo, ne kwikala kintu kya konakanibwa pamo bwa akyo. Ufwaninwe kwikikwatwa mukenye mukatampe ne kwikishikwa shikwē, mwanda i kintu kya konakanibwa.