Kupituluka mu Bijila
21 “Shi mu ntanda ikupa Yehova Leza obe wiiyate ke yobe, abatana muntu mutapibwe mu ntanda, kadi umwipaile kayukenepo, 2 bakulumpe ne batyibi+ bobe bakenda kukapima bula bwa tamba kwine kudi umbidi mufwe ne bibundi biujokolokele. 3 Penepo bakulumpe ba kibundi kidi pabwipi bininge na umbidi’wa bakasela mu luombe, ñombe mwana kaingile mwingilo, kadi kakokele lupungu, 4 bakulumpe ba kibundi’kya bakatūkila na ñombe’wa mu musanza* ukuka mema kadi kemwadiminwe nansha kukunwa nkunwa, bakatyumwina nshingo ya ñombe mwana kwine’kwa mu musanza.+
5 “Kadi babitobo, bene Levi, bakafwena mwanda Yehova Leza obe webatongele bamwingidile,+ ne kwesela bantu madyese mu dijina dya Yehova.+ Bakalombola mwa kupwijija lupata lonso lwa myanda ya lūma.+ 6 Penepo bakulumpe bonso ba kibundi badi pabwipi bininge na umbidi mufwe bakoila ku makasa+ pa ñombe mwana watyumwininwe nshingo mu musanza, 7 bakanena’mba, ‘Makasa etu keamwangilepo ano mashi, kadi meso etu keamwenepo poadi amwangwa. 8 A Yehova, kokilambika kino’ki bantu bobe bene Isalela, bowakūdile,+ kadi kokaleka mambo a mashi ampikwa mwanda ashale mu bantu bobe bene Isalela.’+ Nabya mambo a mashi keakebalambikwapo. 9 Enka nenki ukatalula mambo a mashi ampikwa mwanda mu bukata mwenu pa kulonga kyokya kyoloke ku meso a Yehova.
10 “Shi ubaenda kukalwa na balwana nobe kadi Yehova Leza obe wakunekenenya’bo, nobe ubebasela bu misungi,+ 11 ebiya ubamone mu misungi mwana-mukaji muyampe mpala, wakusangaja kadi ubasake kumuyata bu mukaji, 12 ukamuselela mu yobe njibo. Ebiya nandi ukatenda nywene ya ku mutwe ne kulongolola māla andi, 13 kadi ukavūla bivwalwa byandi bya bu musungi, ne kushikata mu yobe njibo. Ukadila shandi ne inandi mu kweji mutuntulu,+ kupwa nobe ukalāla nandi; abe ukekala wandi mulume nandi ukekala obe mukaji. 14 Ino shi kakusangejepo, nankyo ukamuleka ende+ konso kwasaka.* Ino kubwanyapo kumupoteja ku lupeto nansha kumususula, mwanda ubamufwija bumvu.
15 “Shi muntu udi na bakaji babidi kadi usenswe’ko umo bininge kupita mukwabo,* ebiya bonso babidi abamubutwila bana bana-balume, ino umbedi i wa mulumbe,+ 16 mu difuku dya kupa bandi bana bupyani bwandi, kafwaninwepo kumona mwanā muswe bu umbedi wandi pa kyaba kya mwana umbedi wa mulumbe. 17 Ufwaninwe kwitabija’mba mwana umbedi i mwanā mulumbe ne kumupa pabidi mu bintu byonso byadi nabyo, mwanda aye i ngalwilo ya bukomo bwandi bwa lubutulo. Lupusa lwa bu mwana umbedi i lwandi.+
18 “Shi muntu udi na mwana wa mutwe mūmu kadi ntomboki kakōkelepo shandi nansha inandi,+ abatompa kumōlola ino wapele kwibevwana,+ 19 ba shandi ne inandi bakamukwata ne kumuselela kudi bakulumpe pa kibelo kya kibundi kyabo 20 bakanena bakulumpe ba kibundi kyabo amba, ‘Uno wetu mwana udi na mutwe mūmu kadi i ntomboki, upelanga kwitukōkela. Udi na mudyopolo+ kadi i nkolwankolwa.’+ 21 Penepo bantu bonso ba mu kibundi kyabo bafwaninwe kumwasa mabwe ne byafwa. Nabya ukatalula kibi mu bukata mwenu, kadi Isalela ense ukevwana ne kukwatwa moyo.+
22 “Shi muntu walonga bubi bufwaninwe kutyibilwa nsambu ya lufu kadi waipaibwa,+ ubamuyeyeka ku mutyi,+ 23 umbidi wandi mufwe keukashalapo bufuku bonso ku mutyi.+ Ino ufwaninwe kuta mutyima’mba ajīkwe enka mu difuku’dya, mwanda muntu muyeyekwe i kintu kifingwe kya Leza,+ kufwaninwepo kusubija ntanda yobe ikupa Yehova Leza obe bu bupyani.+