Kupituluka mu Bijila

1 Bino’bi byo binenwa byesambile Mosesa na Isalela ense mu ntanda ya Yodano mu ntanda mutuputupu, mu malungu mudi zolē kampalampala na Sufi, pa bukata bwa Palana, Tofele, Lebane, Hazelota ne Dizahaba. 2 I lwendo lwa mafuku 11 tamba ku Holeba kufika ku Kadesha-Balenea+ dya ku dishinda dya Lūlu lwa Seila. 3 Mu mwaka wa 40,+ mu kweji wa 11, mu difuku dibajinji dya kweji’wa, Mosesa wesamba na bene Isalela* mwendele byonso byamulombwele Yehova kwibasapwila. 4 I paapwile kunekenya Shihone+ mulopwe wa bene Amole wadi ushikata mu Heshebone, ne Oka+ mulopwe wa Bashane wadi ushikata mu Ashetalote, mu Edelei.+ 5 Mu ntanda ya Yodano mu Moabu, Mosesa waanza kushintulula bino Bijila’mba:+

6 “Yehova Leza wetu wetulombwele mu Holeba’mba, ‘Mubashikata kyaba kilampe mu ino ntanda ya ngulu.+ 7 Alamukai, mwende mu ntanda ya ngulu ya bene Amole+ ne ku balondakani nabo bonso mu Alaba,+ ntanda ya ngulu, Shefela, Nengeba, ne mbadi ya dijiba,+ ntanda ya bene Kenani, ne Lebanona,*+ kufika ne ku munonga mukatampe, munonga wa Ufalete.+ 8 Talai, natūla ntanda ku meso enu. Katwelei muyate ntanda yatyipile Yehova kudi bashenu, ba Abalahama, Izake+ ne Yakoba,+ kwibapa’yo abo ne lutundu* lwabo lukāya’ko.’+

9 “Ami nami nemulombwele kitatyi’kya amba, ‘Nkibwanyapo kusela bunka kiselwa kya kwimwendeja.+ 10 Yehova Leza wenu wemuvudija, kadi pano kemudi bangi pamo bwa ñenyenye ya mūlu.+ 11 Yehova Leza wa bakulutuba benu emuvudije+ misunsa kanunu kupita ne momwikadile, kadi emwesele monka mwaemulaile.+ 12 Le mbwanya namani kusela bunka kiselwa kyenu kilēma ne lupotopoto lwenu?+ 13 Tongai bana-balume ba tunangu, badyumuke ne ba bwino mu bisaka byenu, ami nami nkebatūla bu mitwe pomudi.’+ 14 Mwaunondolwele amba, ‘Byowetunena kulonga’byo i biyampe.’ 15 Ebiya nami nayata mitwe mu bisaka byenu, bana-balume ba tunangu ne ba bwino nebatūla bu mitwe pomudi, bakata ba tununu, bakata ba tutwa, bakata ba makumi atano, bakata ba dikumi, ne bemaniji ba bisaka byenu.+

16 “Mu kine kitatyi’kya nalombwele batyibi benu amba, ‘Pomuteja mambo a banabenu, mufwaninwe kutyiba mambo na boloke+ pa bukata bwa muntu ne mwanabo nansha ne mweni wa kibundi.+ 17 Kemufwaninwepo kwikala na mboloji mu butyibi.+ Mufwaninwe kuteja mutyetye ne mukatampe mwine muswelo umo.+ Kemufwaninwepo kuzakajibwa na bantu,+ mwanda butyibi i bwa Leza;+ kadi shi mambo abemukomena bininge, mwaundetela’o nami nkeateja.’+ 18 Mu kine kitatyi’kya nemulombwele bintu byonso byomufwaninwe kulonga.

19 “Penepo twataluka ku Holeba twapityila mu yoya ntanda mutuputupu+ mikatampe kadi ilenga moyo yomwamwene mu dishinda dyenda ku ntanda ya ngulu ya bene Amole,+ monka mwetusoñaninye Yehova Leza wetu, kupwa twafika ku Kadesha-Balenea.+ 20 Penepo nemunena’mba, ‘Mubaiya mu ntanda ya ngulu ya bene Amole, yetupa Yehova Leza wetu. 21 Talai, Yehova Leza wenu wemupe ntanda. Kandai, mukeiyate, monka mwemulombwedile+ Yehova, Leza wa bakulutuba benu. Kemwakakwatwai moyo nansha kutuyuka.’

22 “Ino banwe bonso mwaumfwenene kemunena’mba, ‘Tubadikijei’ko bana-balume baketutadile ntanda’ya kupwa bāye betulombole i dishinda’ka dyotufwaninwe kwenda ne i bibundi bya muswelo’ka byotukatana.’+ 23 Namwene mulangwe’wa bu muyampe, ebiya natonga mu bukata mwenu bana-balume 12, umo ku kisaka ne kisaka.+ 24 Bataluka bakanda ku ntanda ya ngulu,+ bafika ne ku Musanza* wa Eshekole beibela. 25 Basela’ko ne bipa bya ntanda’ya betuletela’byo, kadi baiya betulombola’mba, ‘Ntanda yetupa Yehova Leza wetu i miyampe.’+ 26 Ino mwapelele kukanda’ko, mwatombokela musoñanya wa Yehova Leza wenu.+ 27 Mwadi mwiuningauninga mu mapema enu kemunena’mba, ‘Yehova wetushikilwe, o mwanda wetulupwile mu ntanda ya Edipito kwitupāna ku bene Amole betutukije fututu. 28 Lelo i ku kifuko kya muswelo’ka kotwenda? Banabetu abetutyumuna mutyima*+ pobanena’mba, “I bantu bakatampe kadi balampe kwitupita, bibundi byabo i bikatampe kadi bikomejibwe kufika ne mūlu,*+ twamwene’ko ne bana ba bene Anaki.”’+

29 “Ebiya nemunena’mba, ‘Kemwakebazakalai nansha kwibakwatwa moyo kwine.+ 30 Yehova Leza wenu ukemutangidila kumeso kadi ukemulwila,+ monka mwaalongele mu Edipito mu meso enu.+ 31 Kadi mwamwene mu ntanda mutuputupu muswelo wemuselele Yehova Leza wenu monka muselelanga muntu wandi mwana, konso komwadi mwenda enka ne byomwafikile ku kino kifuko kino’ki.’ 32 Ino nansha nankyo, kemwaikelepo na lwitabijo mudi Yehova Leza wenu,+ 33 mwine wadi wimutangidile mu dishinda, kwimubelela kifuko kya kutūla’po nkambi. Wadi umweka mu mudilo bufuku, ne mu dikumbi dyuba mwanda wa kwimulombola dishinda dya kwenda’mo.+

34 “Kyaba kyonso Yehova wadi wivwana byomwadi munena, nandi wafītwa mutyima watyipa’mba,+ 35 ‘Kekudipo nansha umo pa bano bantu ba luno lukongo lubi ukamona ntanda miyampe yonatyipile kupa bashenu,+ 36 poso Kalebu mwanā Yefune. Aye ukeimonanga, kadi nkamupa aye ne bandi bana ntanda yawaendele’mo, mwanda walondele Yehova na mutyima onso.*+ 37 (Yehova waundobēle enka ne ami mwine pa mwanda wenu, waunena’mba, “Ne abe mwine kukatwela’mopo.+ 38 Yoshua mwanā Nuna, wimene ku meso obe,+ ye ukatwela mu ntanda’ya.+ Mukomeje*+ mwanda aye ye ukapyanika’yo Isalela.”) 39 Ne kadi, benu bana bomwanena’mba basa kwikala bu kitūtwa,+ ne benu bana bana-balume kebayukilepo kiyampe ne kibi dyalelo, abo bakatwela’mo kadi nkebapa’yo ke yabo.+ 40 Ino banwe, jokai, mwende mu ntanda mutuputupu dya ku dishinda dya ku Dijiba Dityila.’+

41 “Ponkapo mwaunena’mba, ‘Tubapi Yehova mambo. Pano tusa kukanda kukalwa, monka mwetusoñaninye Yehova Leza wetu!’ Penepa muntu ne muntu mu bukata mwenu wavwala byabulwi byandi, kemulanga’mba i bipēla kukanda ku lūlu.+ 42 Ino Yehova waunena’mba, ‘Wibasapwile’mba: “Kemwakikandai kukalwa, mwanda nkikekalapo nenu.+ Shi mukande, balwana nenu bakemunekenya.”’ 43 Penepo nemusapwila, ino kemwaungivwenepo. Ino banwe mwatombokela musoñanya wa Yehova kemusake kukanda ku lūlu na ditatu.* 44 Ebiya bene Amole badi bashikatanga mu lūlu’lwa batamba kwimusambakana ne kwimupanga lubilo pamo bwa nyuki, kadi bemupalakanya mu Seila kufika ne ku Holama. 45 Penepo mwajoka kemudila ku meso a Yehova, ino Yehova kemwivwenepo nansha kwimuta mutyima kwine. 46 O mwanda mwaikele’nka mu Kadesha kitatyi kilampe nabya.