Bilongwa bya Mafuku wa Bubidi

20 Kupwa bene Moabu+ ne bene Amone,+ pamo ne bene Amonime* bamo, baiya kulwa divita na Yehoshafata. 2 Ebiya basapwila Yehoshafata’mba: “Kibumbo kikatampe kibaiya kulwa nobe kitamba ku ntanda ya dijiba,* ku Edoma,+ badi mu Hazazona-Tamala, ko kunena’mba Ene-Ngedi.”+ 3 Pa kino Yehoshafata wakwatwa moyo, wasumininwa* kukimba Yehova.+ Ebiya waela lubila’mba bantu bonso ba Yuda bashikilwe na nzala. 4 Penepo bantu ba Yuda bebungila pamo mwanda wa kwipangula Yehova,+ batambile ku bibundi byonso bya Yuda mwanda wa kwipangula Yehova.

5 Ebiya Yehoshafata waimana mu kipwilo kya Yuda ne Yelusalema mu njibo ya Yehova ku meso a kipango kipya, 6 kanena’mba:

“A Yehova Leza wa bakulutuba betu, mwene abe wi Leza wa mūlu;+ mwene ubikele pa malopwe onso a mizo?+ Mu kuboko kobe mudi lupusa ne bukomo, kadi i kutupu nansha umo ubwanya kukukomena.+ 7 A Leza wetu, mwene wapangile bekadi ba ino ntanda ku meso a bantu bobe bene Isalela kupwa wapa’yo lutundu* lwa Abalahama mulunda nobe+ bu kintu kya myaka na myaka? 8 Baikele’mo, bakūbakila’mo ne kipandulwe mwanda wa dijina dyobe,+ kebanena’mba, 9 ‘Shi kimpengele kibetuponena, ekale na kipete, na butyibi bubi, na kipupo kya misongo, nansha na kipupo kya nzala, nabya twimane ku meso a ino njibo ne ku meso obe (mwanda dijina dyobe didi mu ino njibo)+ kadi tukwabije witukwashe mu tusua twetu, nobe witwivwane ne kwitupandija.’+ 10 Pano tala bantu ba Amone, ne Moabu, ne ntanda ya ngulu ya Seila,+ bokwalekelepo bene Isalela batwele’mo pobadi batamba mu ntanda ya Edipito. Bebakongolokele kadi kebebatukijepo fututu.+ 11 Pano kebetulubwila na kwiya kwitupanga mu kintu kyobe kyowetupele bu bupyani.+ 12 A Leza wetu, ubulwepo kufikidija butyibi pobadi?+ Mwanda ketudipo na bukomo ku meso a kino kibumbo kikatampe kīya kwitulwa, kadi ketuyukilepo kya kulonga,+ ino meso etu adi kodi.”+

13 Kine kitatyi’kya, bantu bonso ba Yuda badi bemene ku meso a Yehova, pamo ne babo bana batyetye, ne babo bakaji, ne babo bana.*

14 Penepo mu bukata mwa kipwilo, mushipiditu wa Yehova waiya padi Yahaziele mwanā Zekadia mwanā Benaya mwanā Yeiele mwanā Matania mwine Levi wa mu bana ba Asafa. 15 Wanena’mba: “Banwe bantu bonso ba Yuda ne bekadi ba Yelusalema ne Mulopwe Yehoshafata tejai! Yehova wemunena namino amba, ‘Kemwakikwatwai moyo nansha kutuyuka pa mwanda wa kino kibumbo kikatampe, ke-pantu bulwi ke bwenupo ino i bwa Leza.+ 16 Kesha tūkai mukebatambe. Basa kukanda mu kashinda ka Zize, kadi musa kwibatana ku mfulo kwa musanza* kampalampala na mu ntanda mutuputupu ya Yeluele. 17 Kemusapo kulwa buno bulwi. Imanai, imanai kujina mpika,+ mumone lupandilo lwa Yehova pomudi.*+ A Yuda ne Yelusalema, kemwakikwatwai moyo nansha kutuyuka.+ Kesha endai mukebatambe, Yehova ukekala nenu.’”+

18 Ponkapo Yehoshafata wafukata, mpala yandi pa nshi, kadi bantu bonso ba Yuda ne bekadi ba Yelusalema bapona panshi ku meso a Yehova kebatōta Yehova. 19 Penepo bene Levi lutundu lwa bene Kohata+ ne bene Kola baimana kebatendela Yehova Leza wa Isalela na diwi dikatampe bininge.+

20 Dya kesha babūka lubanga bwē baenda mu ntanda mutuputupu ya Tekoa.+ Abo benda, Yehoshafata waimana kanena’mba: “A Yuda ne bekadi ba Yelusalema ngivwanei! Ikalai na lwitabijo mudi Yehova Leza wenu amba mubwanye kwimanija pototo.* Ikalai na lwitabijo mudi bapolofeto bandi,+ musa kunekenya.”

21 Aye pa kupwa kukala ñeni na bantu, watonga bana-balume ba kwimbila+ Yehova ne kutendela bavwele bivwalwa bya dyangi bijila pobadi benda kumeso kwa bana-balume bavwele byabulwi, amba: “Fwijai’ko Yehova, mwanda buswe bwandi bwa ndamatyidile bulādilanga nyeke.”+

22 Pobashilwile kwimba mitendelo na nsangaji, Yehova wajikila bana-balume ba Amone, ba Moabu, ne ba ntanda ya ngulu ya Seila batwelele mu Yuda, kebeipaya abo bene na bene.+ 23 Ebiya bene Amone ne bene Moabu baalamuka kebalu na bekadi ba ntanda ya ngulu ya Seila+ mwanda wa kwibonakanya ne kwibatukija fututu; abo pa kupwa kutukija bekadi ba Seila, kebeonakanya abo bene na bene.+

24 Ino Yuda pa kwiya ku kiteba kya mulami kya mu ntanda mutuputupu,+ watala kibumbo, bamona’ko imbidi yabo mifwe ilēle pa nshi;+ kekwadipo nansha umo wapandile. 25 Ebiya Yehoshafata ne bantu bandi baiya kwibasela bitūtwa, batana mu bukata mwabo bintu bivule, ne bisandi, ne bintu bilumbuluke, byobebavūdile kufika ne byobakomenwe kwibisela.+ Baselele bitūtwa mu mafuku asatu, mwanda byadi bingi. 26 Bebungila pamo mu Musanza* wa Belaka mu difuku dya buná, mwanda batendele’mo* Yehova. O mwanda baityile kifuko’kya bu Musanza wa Belaka*+—kufika ne dyalelo.

27 Penepo Bana-balume bonso ba Yuda ne Yelusalema, batangidilwe na Yehoshafata, bajokela ku Yelusalema na nsangaji, mwanda Yehova webasangeje pa balwana nabo.+ 28 Penepa batwela mu Yelusalema na byombanwa bya myonji, na nsense,+ ne na bimpungidi,+ baenda ku njibo ya Yehova.+ 29 Kityino kya Leza kyaponena malopwe onso a matanda pobaivwene amba Yehova walwile na balwana na Isalela.+ 30 Ebiya bulopwe bwa Yehoshafata kebwakambakanibwepo, kadi Leza wandi wamupēle nyeke kukōkolokwa ku mitamba yonso.+

31 Penepo Yehoshafata waendelela kubikala pa Yuda. Wadi na myaka 35 paabikele, wabikele myaka 25 mu Yelusalema. Dijina dya inandi i Azuba mwanā Shidi.+ 32 Wadi unangila’nka mu dishinda dya shandi Asa.+ Kasāsukile’mopo, walongele byoloke ku meso a Yehova.+ 33 Inoko mitenta keyafundwilwepo,+ kadi bantu badi kebateakenye mityima yabo pa mwanda wa Leza wa bakulutuba babo.+

34 Myanda mikwabo ya mānga ya Yehoshafata, tamba ku ngalwilo kutūla ne ku mfulo, i milembwe mu binenwa bya Yehu+ mwanā Hanani,+ byatwejibwe mu Mukanda wa Balopwe ba Isalela. 35 Kupwa Yehoshafata mulopwe wa Yuda wasamba kipwano na Ahazia mulopwe wa Isalela, muntu wadi ulonga bibi.+ 36 Ebiya wapwana nandi kebapunga byombo bya kwenda ku Talashishi,+ kadi balonga byombo mu Eziona-Kebele.+ 37 Inoko, Ediezela mwanā Dodawahu wa ku Malēsha wanenena Yehoshafata bupolofeto bubi, amba: “Byowasamba kipwano na Ahazia, Yehova usa konakanya mingilo yobe.”+ Ebiya byombo byaoneka,+ byakomenwa kwenda ku Talashishi.