Samwele Umbajinji

31 Ino bene Fidishitia badi balwa na Isalela.+ Penepo bantu ba Isalela banyema ku meso a bene Fidishitia, kadi bavule bapona batapwe pa Lūlu lwa Ngidiboa.+ 2 Bene Fidishitia badi benda batyinya Solo ne bandi bana, kadi bene Fidishitia baipaya Yonafane,+ Abinadaba, ne Maleki-Shua, bana ba Solo bana-balume.+ 3 Bulwi bwananina Solo bininge, kadi belanga miketo bamumona, ne kadi boba belanga miketo bamutapa bilonda bibibibi.+ 4 Ponkapo Solo wanena kyabuta wandi amba: “Somona kipete kyobe unsabakanye nakyo, kutyina’mba bano bantu ba kubulwa kutwela kwisao+ bakāya kunsabakanya ne kunonga bintu pampikwa kafuku.”* Ino kyabuta wandi wapela, mwanda wakwetwe moyo bininge. Penepo Solo wasela kipete waponena’po.+ 5 Kyabuta wandi pa kumona’mba Solo wafu,+ nandi waponena pa kipete kyandi wafwa pamo nandi. 6 Enka nenki Solo, ne bandi bana basatu, ne kyabuta wandi, ne bantu bandi bonso bafwa pamo mu dine difuku’dya.+ 7 Bantu ba Isalela badi mu ntanda ya ku musanza* ne mu ntanda ya ku Yodano pa kumona’mba bantu ba Isalela abanyema ne amba Solo ne bandi bana abafu, bashilula kushiya bibundi kebanyema;+ penepo bene Fidishitia baiya bashikata’mo.

8 Difuku dilonda’ko, paile bene Fidishitia kuvūla bantu batapwe byobadi nabyo, batana Solo ne bandi bana basatu balēle pa Lūlu lwa Ngidiboa.+ 9 Ebiya bamuketa mutwe, bamuvūla byabulwi byandi kupwa batuma musapu mu ntanda yonso ya bene Fidishitia mwanda wa kusambakanya myanda+ mu mobo* a bilezaleza+ byabo ne mu bantu. 10 Kupwa batūla byabulwi byandi mu njibo ya bankishi ba Ashetolete, babambila ngitu yandi mifwe ku lubumbu lwa Bete-Shane.+ 11 Bekadi ba Yabeshe-Ngileade+ pa kwivwana byobalongele Solo kudi bene Fidishitia, 12 bantu bonso ba bulwi bataluka baenda bufuku bonso, batalula umbidi wa Solo ne imbidi ya bandi bana ku lubumbu lwa Bete-Shane. Bajokela ku Yabeshe bebasōkela kwine’kwa. 13 Kupwa basela mikupa+ yabo beijīka munshi mwa mutyi wa tamadise mu Yabeshe,+ kupwa bashikilwa na nzala mafuku asamba-abidi.