Bilongwa bya Mafuku wa Bubidi
26 Penepo bantu bonso ba Yuda basela Uzia,+ wadi na myaka 16, bamubikika pa kyaba kya shandi Amazia.+ 2 Waubakulula kibundi kya Elote+ ne kwikijokeja ku Yuda kupwa kwa mulopwe* kulādikwa mwanda wa kukōkolokwa na bakulutuba bandi.+ 3 Uzia+ wadi na myaka 16 paabikele, wabikele myaka 52 mu Yelusalema. Dijina dya inandi i Yekodia wa ku Yelusalema.+ 4 Wadi ulonga nyeke byoloke ku meso a Yehova, na mwalongēle shandi Amazia.+ 5 Kadi wadi ukimba’nka kukimba Leza mu mafuku a Zekadia, mwine wamufundije kutyina Leza wa bine. Kitatyi kyonso kyawadi ukimba Yehova, Leza wa bine nandi wamwikadije biyampe.+
6 Waenda kukalwa na bene Fidishitia,+ watubula lubumbu lwa Ngata,+ ne lubumbu lwa Yabene,+ ne lubumbu lwa Ashedoda.+ Kupwa waubaka bibundi mu ntanda ya Ashedoda ne mu bene Fidishitia. 7 Leza wa bine wamukweshe nyeke alwe na bene Fidishitia, ne bene Alabia+ badi bashikata mu Ngulebala, ne na bene Meunime. 8 Bene Amone+ baanza kulambula Uzia. Ntumbo yandi yasambakana bityebitye kufika ne ku Edipito, mwanda waikele ke mukomo bininge. 9 Kadi Uzia waubakile biteba+ mu Yelusalema dya ku Kibelo kya Difinko,+ ne Kibelo kya Musanza,+ ne dya ku Ditungi, kupwa webikomeja. 10 Waubaka ne biteba+ mu ntanda mutuputupu, wakola* byumbu bingi (mwanda wadi na bimunanwa bivule); kadi walonga namino ne mu Shefela ne mu dilungu.* Wadi na babidimye ne bengidi ba mu madimi a mañanza mu ngulu ne mu Kalamela, mwanda wadi usenswe kudima.
11 Kadi Uzia waikala na kibumbo kya divita kiteakanibwe mwanda wa kulwa. Badi ba kwenda mu bulwi, balongololwe mu bibumbo. Babadilwe ne kulembwa+ na Yeiele mulembi+ ne Maaseya mwimaniji, bendejibwa na Hanania, mfumu wa mulopwe. 12 Bungi bwa mitwe yonso ya mobo a bashabo badi batangidile bano ba bulwi bakomokomo i bantu 2 600. 13 Basola belumbile byabulwi bobadi bendeja i bantu 307 500 beteakanye kulwa, kibumbo kikomo kya basola kya kukwasha mulopwe ku walwana.+ 14 Uzia wapele kibumbo kyonso kya divita mangabo, mikobe,+ bilama mutwe, makotyi a byuma,+ mata a miketo, ne mabwe a topito.+ 15 Kadi walongeje mu Yelusalema bipungwa bya bulwi na bantu ba bwino; batūdilwe pa biteba+ ne ku mafinko a mumbu, kadi badi ba kwela miketo ne mabwe makatampe. Penepo ntumbo yandi yasambakana bininge, mwanda bamukweshe bininge kadi waikala mukomo.
16 Inoko, aye pa kwikala mukomo, mutyima wandi washilula kwizunzula pa mwanda wa musala wa aye mwine, kadi walongela Yehova Leza wandi bintu pampikwa kikōkeji, watwela mu tempelo ya Yehova kusōka ensense pa kisōkelo kya ensense.+ 17 Ponkapo kitobo Azadia ne babitobo bakwabo ba Yehova bakankamane 80 bakamulonda’mo. 18 Baimanina Mulopwe Uzia midindi ibidi kebamunena’mba: “Abe Uzia kufwaninwepo kusōka ensense kudi Yehova!+ I enka babitobo bo bafwaninwe kusōka ensense mwanda i lutundu lwa Alone,+ bene bapandwilwe. Tamba panja pa kipandulwe, mwanda ubalonga bintu pampikwa kikōkeji, kadi Yehova Leza kasapo kukutumbija pa mwanda wa kino.”
19 Ino Uzia, wadi na kya kusōkela’mo ensense mu kuboko kwandi, wakalabala;+ kadi aye ukidi mukalabēle babitobo, makopo+ amutamba mu mpala ku meso a babitobo mu njibo ya Yehova kubwipi na kisōkelo kya ensense. 20 Azadia kitobo mukulu ne babitobo bonso pa kumutala, bamona’mba makopo abamukwata mu mpala yandi! Ebiya bamutambija’mo bukidibukidi, nandi watamba panja lubilo, mwanda Yehova wamukupile.
21 Mulopwe Uzia waikala nyeke wa makopo kufika ne difuku dyaafwile, kadi wadi ushikete na makopo+ andi mu njibo ya kufula, mwanda wapangilwe mu njibo ya Yehova. Wandi mwana Yotama wadi uludika njibo* ya mulopwe, utyibila bantu ba ntanda’ya mambo.+
22 Kadi myanda mikwabo ya mānga ya Uzia, tamba ku ngalwilo kutūla ne ku mfulo, yalembelwe na mupolofeto Isaya+ mwanā Amoze. 23 Kupwa Uzia walādikwa mwanda wa kukōkolokwa na bakulutuba bandi, bamujīka na bakulutuba bandi, inoko bamujīkile mu budimi bwa balopwe bwa kujīka’mo, mwanda banenene amba: “I wa makopo.” Ebiya wandi mwana Yotama+ wabikala pa kyandi kyaba.