Bilongwa bya Mafuku Umbajinji
17 Davida pa kushikata’tu mu yandi njibo,* wanena mupolofeto Natana+ amba: “Ami yeu nshikete mu njibo ya mityi ya sedele+ inoko sanduku wa kipwano kya Yehova wikele munshi mwa pema.”+ 2 Natana nandi watentulula Davida amba: “Longa byonso bidi mu mutyima obe, mwanda Leza wa bine udi nobe.”
3 Mu bwine bufuku’bwa, kinenwa kya Leza kyaiya kudi Natana amba: 4 “Enda kasapwile mwingidi wami Davida amba, ‘Yehova wanena namino amba: “Ke abepo wa kungubakila njibo ya kushikata’mo.+ 5 Mwanda nkyashikete mu njibo tamba difuku dyonātambije Isalela mu Edipito kufika ne dyalelo, ino nadi ñenda nyeke mu yeu pema ke mu yeu ne mu kyoki kipema ke mu kyoki.*+ 6 Kitatyi kyonso kyonadi ñenda na Isalela ense, le kashā kendi munene nansha’tu kinenwa kimo ku mutyibi umo wa mu batyibi ba Isalela bonatongele kukumba bantu bami, amba, ‘Mwanda waka kungubakilepo njibo ya mityi ya sedele?’”’
7 “Shi ke pano lombola mwingidi wami Davida amba, ‘Yehova wa bibumbo wanena namino amba: “Nakutambije ku madyo, kowadi ulonda luombe, amba wikale mutangidiji pa bantu bami bene Isalela.+ 8 Nkekala nobe konso koenda,+ kadi nkepaya* balwana nobe bonso ku meso obe;+ nkakulongela dijina pamo bwa dijina dya bantu bakatampe ba pano pa ntanda.+ 9 Nkatongela bantu bami bene Isalela kifuko ne kwibashikatyija’mo, nabo bakekala’mo kadi kebakakambakanibwapo monka; ne bantu babi nabo kebakebamweshapo malwa* dikwabo mobadi bebalongela mafuku kunyuma,+ 10 tamba difuku dyonatongele batyibi pa bantu bami bene Isalela.+ Nkanekenya balwana nobe bonso.+ Ne kadi, nakulombola’mba, ‘Yehova ukakūbakila njibo.’*
11 “‘“Shi mafuku obe abafule kadi ubaenda kukekala pamo na bakulutuba bobe, penepa nkemika lutundu* lobe lukāya’ko, ke umo wa mu bobe bana kadi,+ nkakomeja pototo bulopwe bwandi.+ 12 Aye ye ukangubakila njibo,+ kadi nkakomeja pototo lupona lwandi nyeke.+ 13 Nkekalanga shandi, nandi ukekalanga wami mwana.+ Nkikatalulapo buswe bwami bwa ndamatyidile kwadi+ monatalwidile’bo kudi yewa wakubadikidile.+ 14 Nkamwimika mu njibo yami ne mu bulopwe bwami nyeke,+ kadi lupona lwandi lukalādila nyeke.”’”+
15 Natana wasapwila Davida bino binenwa byonso ne kino kimonwa kyonso kituntulu.
16 Ponkapo Mulopwe Davida watwela, washikata ku meso a Yehova kanena’mba: “Le ami ne ani, a Yehova Leza? Ne njibo yami mine i njibo’ka byowamfikija kuno konso?+ 17 Ulanga’mba bino kebibwenepo, a Leza, ubesambila kadi ne njibo ya mwingidi obe kufika ne ku kitatyi kya kumeso bininge,+ ne kadi ubantale wita’mba ne muntu ufwaninwe kuzunzulwa bininge,* a Yehova Leza. 18 Le mwingidi obe Davida ubwanya kukusapwila kadi bika pa bulēme bumpelwe byoyukile kala mwingidi obe senene?+ 19 A Yehova, pa mwanda wa mwingidi obe ne mungya bisaka mutyima obe,* ubalonga bino bintu byonso bikatampe pa kusokola bukatampe bobe.+ 20 A Yehova, kekudipo nansha umo udi bwa abe,+ kekudipo Leza mukwabo poso’nka abe;+ byonso byotwaivwene na matwi etu bibingija kino. 21 Le i muzo’ka mukwabo pano pa ntanda udi pamo bwa bantu bobe bene Isalela?+ Leza wa bine wāendele wēbakūla ke bantu bandi.+ Wēlongele abe mwine dijina na kwibalongela bilongwa bikatampe kadi bilenga nzuba,+ wāpanga mizo ku meso a bantu bobe+ bowākūdile mu Edipito. 22 Wālongele bantu bobe bene Isalela ke bantu bobe kitatyi kyonso;+ kadi abe, a Yehova, waikele kodi Leza wabo.+ 23 Shi ke pano, a Yehova, mulao owalaa padi mwingidi obe ne njibo yandi wikale wa binebine kitatyi kyonso, kadi longa enka mowalaila’mo.+ 24 Dijina dyobe dilādile* ne kuzunzulwa+ nyeke, amba bantu banene amba, ‘Yehova wa bibumbo, Leza wa Isalela, i Leza kudi Isalela,’ kadi njibo ya mwingidi obe Davida ikomejibwe pototo ku meso obe.+ 25 Mwanda abe, a Leza wami, ubasokwela mwingidi obe mpango yobe ya kumūbakila njibo.* O mwanda mwingidi obe waikala na bukankamane bwa kulombela ino milombelo kodi. 26 Shi ke pano, a Yehova, wi Leza wa bine, kadi ubalaa bino bintu biyampe pangala pa mwingidi obe. 27 Loelelwa’po kwesela njibo ya mwingidi obe, kadi yendelele nyeke ku meso obe, mwanda abe, a Yehova, ubaesela, nayo ibaeselwa nyeke.”