Bilongwa bya Mafuku wa Bubidi
15 Penepo mushipiditu wa Leza watūkila Azadia mwanā Odeda. 2 Ebiya watamba kukasambakana Asa kamunena’mba: “A Asa ne Yuda ense ne Benjemani, ntejei! Yehova udi nenu kitatyi kyonso kyomudi nandi;+ kadi shi mumukimbe, ukesokwela komudi,+ ino shi mumuleke, nandi ukemuleka.+ 3 Mu kitatyi kilampe* Isalela kadipo na Leza wa bine, kadipo na kitobo ufundija, kadi kadipo ne na kijila kine.+ 4 Ino mu tusua twabo, pobajokēle kudi Yehova Leza wa Isalela kebamukimbe, wesokwedile kobadi.+ 5 Mu bine bitatyi’bya i kutupu nansha umo wadi unanga ku matwi talala,* mwanda kwadi tuvutakanya tukatampe mu bekadi bonso ba matanda’a. 6 Muzo wadi usonsakanibwa na muzo mukwabo ne kibundi nakyo na kibundi kikwabo, mwanda Leza webalekele mu kavutakanya na tusua twa miswelo yonso.+ 7 Ino banwe, mwikomejei, kemwakityumukwai mityima,*+ mwanda mwingilo wenu ukemupadilwa mpalo.”
8 Asa pa kwivwana’tu bino binenwa ne bupolofeto bwa mupolofeto Odeda, wakankamana, wafundula ne bilezaleza bya mukenye mu ntanda yonso ya Yuda+ ne ya Benjemani ne mu bibundi byonso byaakwete ku ntanda ya ngulu ya Efelaimi, walongolola ne kisōkelo kya Yehova kyadi kumeso kwa kibidi kya pa kibelo kya Yehova.+ 9 Penepo wakongakanya pamo Yuda ense ne Benjemani ne beni ba kibundi bene kumo batambile ku Efelaimi ne Manase ne Shimioni,+ mwanda bantu bavule mpata batambile ku Isalela banyemena kwadi pobamwene amba Yehova Leza wandi udi nandi. 10 Ebiya bebakongakenya pamo ku Yelusalema mu kweji wa busatu mu mwaka wa 15 wa bulopwe bwa Asa. 11 Mu dine difuku’dya balambula bitapwa kudi Yehova bya mu bitūtwa byobaselele, bañombe 700 ne mikōko 7 000. 12 Ne kadi, batwela mu kipwano kya kukimba Yehova Leza wa bakulutuba babo na mutyima wabo onso ne na muya* wabo onso.+ 13 Muntu ense kadipo ukimba Yehova Leza wa Isalela wadi wipaibwa, ekale mutyetye nansha mukatampe, mwana-mulume nansha mwana-mukaji.+ 14 Ebiya batyipila Yehova mutyipo na diwi dikatampe, na nsadi ya tusepo, ne na bimpungidi ne masengo. 15 Penepo Yuda ense wasangala pa mwanda wa mutyipo’wa, mwanda batyipile mutyipo na mutyima wabo onso kadi bamukimbile na kipyupyu, aye nandi wesokwela kobadi,+ kadi Yehova webapa kukōkolokwa ku mitamba yonso.+
16 Mulopwe Asa wafundwile’nka ne nkambo wandi Maka+ pa kyaba kyandi kya bu ina mfumu,* mwanda walongele kilezaleza kya kiboja mwanda wa kutōta kipanda kikola.*+ Asa watyumuna kilezaleza kyandi kya kiboja’kya wekivingakanya ne kwikisōkela mu Musanza wa Kidelone.+ 17 Inoko mitenta keyafundwilwepo+ mu Isalela.+ Nansha nankyo, mutyima wa Asa wadi mubwane* mu būmi bwandi bonso.*+ 18 Kadi watwejeje mu njibo ya Leza wa bine bintu byaapandwile ne byapandwile shandi—ndalama, olo, ne bipungwa palapala.+ 19 Kekwaikelepo divita kufika ne mu mwaka wa 35 wa bulopwe bwa Asa.+