Bilongwa bya Mafuku wa Bubidi
12 Bulopwe bwa Lehaboma pa kupwa’tu kukomejibwa pototo+ nandi waikala ke mukomo, waleka Bijila bya Yehova,+ ne Isalela yense pamo nandi. 2 Mu mwaka wa butano wa Mulopwe Lehaboma, Shishake+ mulopwe wa Edipito wakanda kulwa na Yelusalema, mwanda beendeje pampikwa kikōkeji kudi Yehova. 3 Wadi na makalo 1 200, ne bakandanga pa tubalwe 60 000, ne bibumbo bya basola kebibadika byaatambile nabyo ku Edipito—bene Libya, bene Sukimi, ne bene Efiopya.+ 4 Wakwata bibundi bikomejibwe bya Yuda, ku mfulo wafika ne ku Yelusalema.
5 Mupolofeto Shemaia+ waiya kudi Lehaboma ne kudi bamfumu ba Yuda badi bebungile ku Yelusalema pa mwanda wa Shishake, penepo webanena’mba: “Yehova wanena namino amba, ‘Byomwandeka, ami nami nemuleka+ mu kuboko kwa Shishake.’” 6 Ponkapo bamfumu ba Isalela ne mulopwe betyepeja,+ kebanena’mba: “Yehova i moloke.” 7 Yehova pa kumona’mba abetyepeja, kinenwa kya Yehova kyaiya kudi Shemaia amba: “Abetyepeja. Nkisapo kwibonakanya,+ kadi panopano ponka nsa kwibakūla. Nkisapo kupungulwila bukalabale bwami pa Yelusalema kupityila kudi Shishake. 8 Inoko bakekala bengidi bandi, mwanda wa bayuke amba kuñingidila amiwa i kwishile na kwingidila balopwe* ba matanda angi.”
9 Ebiya Shishake mulopwe wa Edipito wakanda kulwa na Yelusalema. Wasela byabulēme bya mu njibo ya Yehova+ ne byabulēme bya mu njibo* ya mulopwe. Wasela bintu byonso, ne mangabo a olo alongele Solomone mene.+ 10 Kupwa Mulopwe Lehaboma wapunga mangabo a mukuba a kupingakenya’po, wapa’o bakata ba balami* badi balama pa kibelo kya njibo ya mulopwe. 11 Ponso padi pāya mulopwe ku njibo ya Yehova, balami badi batwela beasela, kupwa badi beajokeja mu kyumba kya balami. 12 Byetyepeje mulopwe, Yehova waleka kumulobela,+ kadi kebonakenyepo fututu.+ Ne kadi mu Yuda mwadi mutanwa bintu bimo biyampe.+
13 Mulopwe Lehaboma waningisha lupusa lwandi mu Yelusalema kadi waendelela kubikala; Lehaboma wadi na myaka 41 paabikele, wabikele myaka 17 mu Yelusalema, kibundi kyatongele Yehova mu bisaka byonso bya Isalela bu kifuko kya kutūla’mo dijina dyandi. Dijina dya inandya mulopwe i Naama mwine Amone.+ 14 Inoko walongele bibi, mwanda kasumininwepo mu mutyima wandi kukimba Yehova.+
15 Ino, mānga ya Lehaboma, tamba ku ngalwilo kutūla ne ku mfulo, mwene i milembwe mu binenwa bya mupolofeto Shemaia+ ne bya Ido+ mumoni wa bimonwa mungya bilembwa bya misuku? Ba Lehaboma ne Yeloboame+ badi belwa mavita kyaba kyonso. 16 Kupwa Lehaboma walādikwa mwanda wa kukōkolokwa na bakulutuba bandi, bamujīka mu Kibundi kya Davida;+ ebiya wandi mwana Abidya+ wabikala pa kyandi kyaba.