Kupituluka mu Bijila
14 “Mwi bana ba Yehova Leza wenu. Kemwakiketaketai+ nansha kutenda lupole* mu mpala yenu pa mwanda wa muntu mufwe.+ 2 Mwanda banwe mwi bantu bajila+ ba Yehova Leza wenu, kadi Yehova i mwimutonge mwikale bantu bandi, kintu kyandi kya pa bula* mu bantu bonso badi pano pa ntanda.+
3 “Kemufwaninwepo kudya kintu kyo-kyonso kya munyanji.+ 4 Bano’ba bo banyema bomukokeja kudya:+ ñombe, mukōko, mbuji, 5 kasha kalume, kasha, ntengu, mbuji wa ntanda, ngulungu, mukōko wa ntanda, ne mbaji. 6 Mubwanya kudya nyema ense wa mikono milale pabidi kadi utyikula. 7 Inoko, kemufwaninwepo kudya bano banyema batyikula nansha ba mikono milale: ngamedia, kalulu, ne dama, mwanda batyikulanga ino kebadipo na mikono milale. I ba disubi komudi.+ 8 Ne ngulube mwine mwanda udi na mikono milale ino katyikulangapo. I wa disubi komudi. Kemufwaninwepo kudya mwita wabo nansha kutenga ngitu yabo mifwe.
9 “Ku bintu byonso byūmi bidi mu mema, mubwanya kudya’ko bino’bi: Kintu kyonso kya nsānga* ne mapalu, mubwanya kwikidya.+ 10 Ino kemufwaninwepo kudya kintu kyonso kekidipo na nsānga* ne mapalu. I kya disubi komudi.
11 “Mubwanya kudya kyoni kyonso kyampikwa disubi. 12 Ino kemufwaninwepo kudya bino’bi: mukebo, nkolenko, dikubi difīta,+ 13 nshiku, kalela, kikolwe kya muswelo o-onso, 14 kinkombe kya muswelo o-onso, 15 dikolongo, kitungu, lupupila, kibemba kya muswelo o-onso, 16 katungutungu, katungu-nsengo, kalālejiba, 17 diomba, dikubi, musofi, 18 kakumbi, lukongwe lwa muswelo o-onso, kapungulu, ne mudima. 19 Bipangwa byonso bya masala byenda kitānda nabyo i bya disubi komudi. Kebifwaninwepo kudibwa. 20 Kipangwa kyonso kitumbuka kyampikwa disubi mubwanya kwikidya.
21 “Kemufwaninwepo kudya nyema ense mwifwile.+ Mubwanya kupa’ye mweni wa kibundi ushikete mu byenu bibundi,* aye ubwanya kudya’ye, kadi ubwanya kupotolojibwa kudi mweni. Mwanda mwi bantu bajila kudi Yehova Leza wenu.
“Kemufwaninwepo kutēka kana ka mbuji mu mabele a inako.+
22 “Ufwaninwe binebine kuleta kipindi kimo kya pa bipindi dikumi* bya mu bintu byonso bilupula nkunwa yobe mu budimi mwaka ne mwaka.+ 23 Ukadya kipindi kimo kya pa bipindi dikumi bya miseke yobe, vinyu yobe mipya, māni obe, ne kilala-ndá kya mu bañombe bobe ne mikōko yobe ku meso a Yehova Leza obe mu kifuko kyatonga kwikala’po dijina dyandi,+ amba wifunde kutyina Yehova Leza obe mafuku onso.+
24 “Ino shi lwendo lubakulepela bininge kadi kubwanyapo kuselela’byo ku kifuko kitonga Yehova Leza obe bu kifuko kya dijina dyandi+ mwanda i kulampe bininge na kodi (mwanda Yehova Leza obe ukakwesela), 25 nabya ubwanya kushinta’byo ku lupeto, kadi ukenda na lupeto lobe mu kuboko, ku kifuko kikatonga Yehova Leza obe. 26 Penepo ubwanya kupota na lupeto’lwa kintu kyonso kyosaka*—bañombe, mikōko, bambuji, vinyu ne bitomibwa bikolwañana, ne kintu kyonso kikusangaja;* kadi ukadīla kwine’kwa ku meso a Yehova Leza obe ne kusangala, abewa ne ba mu njibo yobe.+ 27 Kadi kokelwa mwine Levi udi mu bibundi byobe,+ mwanda aye kapelwepo kipindi nansha bupyani pamo nobe.+
28 “Ku mfulo kwa myaka isatu yonso, ukayata kipindi kimo kituntulu kya pa bipindi dikumi kya mu byangulwa byobe bya mu mwaka’wa, ne kwikitūla mu bibundi byobe.+ 29 Penepo mwine Levi, mwine kapelwepo kipindi nansha bupyani pamo nobe, ne mweni wa kibundi, ne mwana wampikwa shandi,* ne mukaji wa kishala badi mu bibundi byobe, bakāya kudya ne kwikuta,+ amba Yehova Leza obe akwesele mu byonso byolonga.+