Ñimbo ya Mitōto
Kudi mukulu wa bañomba. Lwimbo lwa Davida.
64 A Leza, ivwana diwi dyami pongabija.+
Lama būmi bwami ku moyo wa walwana.
2 Nkinge ku bitumba bifyame bya bantu babi,+
Ku kibumbo kya banonga-bibi.
3 Banona ludimi lwabo pamo’nka bwa kipete;
Batunga binenwa byabo bileta lufu pamo bwa miketo,
4 Mwanda wa kwasa wampikwa mambo mu bifuko mobafyeme;
Abamwase mu kitulumukila, kwampikwa moyo.
5 Balamete ku mulangwe wabo mubi;*
Besamba mwa kufīla bidiba byabo.
Kebanena’mba: “I ani ukebimona?”+
6 Bakimbakimba mashinda mapya a kulonga bibi;
Bakuta mu bufyafya nkuku yabo ya bukosoke;+
Milangwe idi mu mutyima wa muntu ne muntu keiyukibwapo.
7 Ino Leza ukebāsa;+
Bakatapibwa na muketo mu kitulumukila.
8 Ludimi lwabo lukebaponeja abo bene;+
Boba bonso batala bakapuka mitwe yabo.
9 Penepo bantu bonso bakakwatwa moyo,
Kadi bakasapula byobya byalonga Leza,
Kadi bakamona bujinguludi mu bilongwa byandi.+