Kudi Bene Fidipai

1 Ami Polo ne Temote, bapika ba Kidishitu Yesu, kudi bajila bonso badi mu bumo na Kidishitu Yesu badi mu Fidipai,+ pamo ne batadi ne bengidi ba mingilo:+

2 Kanye ka ku buntu bitupu ne ndoe bitamba kudi Leza Tata wetu ne kudi Mfumwetu Yesu Kidishitu bikale nenu.

3 Mfwijanga’ko Leza wami mafuku onso ponemuvulukanga 4 mu kuzenza kwami konso konzenzanga mu milombelo pa mwanda wenu banwe bonso. Kuzenza konso nzenzanga’ko na nsangaji,+ 5 mwanda wa kukwasha komwakweshe ku* myanda miyampe tamba difuku dibajinji kufika ne pano pene. 6 Mwanda nkulupile kino’ki amba, yewa washilwile mwingilo muyampe momudi ukeuvuija+ kufika ne ku difuku dya Kidishitu Yesu.+ 7 I kyendele’mo’tu kondi kulanga namino pa mwanda wenu banwe bonso, mwanda ngidi nenu mu mutyima wami, banwe bapelwe pamo nami kanye ka ku buntu bitupu ponkutyilwe mu kifungo+ ne pondwila myanda miyampe+ ne kuningija’yo ku meso a ba lupusa.

8 Mwanda Leza i kamoni wami uyukile mongabidila bininge kwimona nenu banwe bonso na kisanso kya ku mutyima pamo na kyokya kidi na Kidishitu Yesu. 9 Kadi kino ye kyonombanga nyeke, amba buswe bwenu buvule’nka kuvula+ na buyuki bwa binebine+ ne kusansanya kukatampe;+ 10 amba mujingulule bintu bya mvubu mikatampe,+ mwanda wa mwikale ba kubulwa kakoba ne bampikwa kukukaja bakwabo+ kufika ne ku difuku dya Kidishitu; 11 ne amba muyulwe bipa byoloke, bīya kupityila kudi Yesu Kidishitu,+ mwanda wa ntumbo ne mitendelo ya Leza.

12 Pano nsaka muyuke banwe banabetu amba, myanda yaumfikīle bine ibaalamuka keikwasha kwendeja myanda miyampe kumeso, 13 amba kukutwa kwami mu kifungo+ pa mwanda wa Kidishitu kubayukana+ mu Balami ba Mulopwe bonso ne bantu bakwabo bonso. 14 Pano banabetu bavule mudi Mfumwetu abaikala na kikulupiji pa mwanda wa kukutwa konkutyilwe mu kifungo, kadi abalombola bukankamane bukatampe bwa kwisamba mwanda wa Leza pampikwa moyo.

15 Bine, bamo basapulanga Kidishitu na mukao ne kwitāka, ino bakwabo na mutyima muyampe. 16 Bano ba mfulo’ba basapulanga Kidishitu na buswe, mwanda bayukile amba natongelwe kulwila myanda miyampe;+ 17 ino boba babajinji basapulanga na lupotopoto, ke na milangwepo miyampe, mwanda basakanga kundetela makambakano mu kifungo monkutyilwe. 18 Penepo bibafule namani? Mu miswelo yonso, nansha mu buzazangi nansha mu bubine, Kidishitu usapulwanga kadi nsangalanga pa kino. I bine, nsa kusangala’nka kusangala, 19 mwanda ndyukile amba kino kikafula ku lupandilo lwami pa mwanda wa kuzenza komuzenza mu milombelo+ ne pa bukwashi bwa mushipiditu wa Yesu Kidishitu.+ 20 Kino i kikwatañane na kutengela kontengēle na kipyupyu ne lukulupilo lwami amba nkikafwijibwapo bumvu nansha dimo, ino amba ami ponena pampikwa kafinda, Kidishitu usa kutumbijibwa pano, monka mwatumbijibwanga mafuku onso nyeke, kupityila ku umbidi wami, shi pa būmi shi pa lufu.+

21 Mwanda kondi ami, kwikala mūmi i Kidishitu,+ kufwa nako i kamweno.+ 22 Ino wivwane ñendelele kwikala mūmi mu ngitu, nabya i bipa bya mwingilo wami; ino kine kya kutonga nkidipo mwa kulombwela’kyo. 23 Ndwanga na mifutu ibidi, mwanda nsakanga kunyongololwa ne kwikala pamo na Kidishitu,+ na bubine kino kyo kintu kitabukile buya.+ 24 Inoko, i biyampe mpata ami kwikala mu ngitu pa mwanda wenu. 25 O mwanda, byonkulupile namino, ndyukile amba nsa kwikala’ko ne kushikata nenu nyeke banwe bonso mwanda wa mwendelele kumeso ne mwanda wa nsangaji ya lwitabijo lwenu, 26 amba kusepelela kwenu kuvudile’ko mpata mudi Kidishitu Yesu pa mwanda wami ponsa kwikala nenu dikwabo.

27 Ino kintu kimo, mwiendejei* mu muswelo mufwaninwe myanda miyampe ya Kidishitu,+ amba, nansha ngiye kwimumona nansha nkiilepo, ngivwane myanda yenu ne kuyuka’mba mwimanije pototo mu mushipiditu umo, mwielela’ko banwe bonso pamo na muya umo*+ pa mwanda wa lwitabijo lwa myanda miyampe, 28 ne kutuyulwa na bakinkwa nenu nansha dimo mpika. Kino’ki kilombola patōka’mba abo bakonakanibwanga,+ ino banwe mukapandanga;+ kadi kino i kitambe kwa Leza. 29 Mwanda mwi bapebwe dyese pa mwanda wa Kidishitu, ke’nkapo dya kwikala na lwitabijo mwadi, ino i ne kususuka pa mwanda wandi.+ 30 Mwanda banwe mulwanga bulwi bumo bonka bomwaumwene ndwa,+ bomwivwana pano amba nakilwa’bo.