Bene Kodinda Umbajinji
3 Nanshi, a banabetu, nkyadipo mbwanya kwisamba nenu pamo bwa banwe bantu ba ku mushipiditu,+ ino i pamo bwa bantu ba ku ngitu, bwa bana batyetye+ mudi Kidishitu. 2 Nemutomeje mabele, ke bidibwapo bikomo, mwanda mwadi kemwaikele na bukomo senene. Na bubine, ne pano pene kemwaikele na bukomo senene,+ 3 mwanda mukidi ba ku ngitu.+ Mu bukata mwenu byomukidi mukao ne lupotopoto, mwene mwi ba ku ngitu+ kadi munañanga munangilanga bantu? 4 Mwanda shi muntu unena’mba, “Ami ne wa Polo,” ino ungi nandi amba, “Ami ne wa Apolosa,”+ le kemuloñangapo bintu pamo bwa bantu bitupu?
5 Penepo, le Apolosa i ani? Bine, le Polo i ani? I bengidi+ bemukweshe mwitabije, monka mobapedile muntu ne muntu kudi Mfumwetu. 6 Ami nakunine,+ Apolosa nandi wasangila,+ ino Leza ye wadi utamija’byo, 7 nanshi yewa ukuna kadipo na mwanda ne yewa usangila mwine, ino i Leza utamija’byo.+ 8 Penepa yewa ukuna ne yewa usangila i umo,* ino muntu ense ukatambulanga mpalo yandi mwendele mingilo yandi.+ 9 Mwanda twi bengidi bengila pamo na Leza. Banwe mwi budimi bwa Leza bukidimwa, kyūbakwa kya Leza.+
10 Mwendele kanye ka ku buntu bitupu ka Leza konapelwe, naadile kyalwilo+ pamo bwa mūbaki mukatampe wa bwino,* ino kudi muntu ungi ūbaka’po. Inoko muntu ne muntu atadije mwaubakila’po. 11 Mwanda i kutupu ubwanya kwala kyalwilo kikwabo kishīle na kyokya kyadilwe kala, ke Yesu Kidishitu kadi.+ 12 Nanshi shi muntu waubaka pa kyalwilo na olo,* ndalama, mabwe malēme, mityi, biyombo, nansha na nsono, 13 mwingilo wa muntu ne muntu ukamweka patōka mowikadile,* mwanda difuku dikalombola’o patōka, ke-pantu ukasokolwa na mudilo,+ kadi mudilo mwine ukalombola mwikadile mwingilo waubakile muntu ne muntu. 14 Shi mwingilo ūbakile’po muntu ubashala, ukapalwanga mpalo; 15 shi mwingilo wa muntu ubatēma, ukajimija, aye mwine’ko ukapanda; ino shi i nankyo, i pamo’nka bwa kopoka mu mudilo.
16 Le kemuyukilepo amba banwe mwi tempelo ya Leza,+ ne amba mushipiditu wa Leza wikele momudi?+ 17 Shi muntu onakanye tempelo ya Leza, Leza nandi ukamonakanyanga; mwanda tempelo ya Leza i ijila, kadi banwe yo ino tempelo.+
18 Kekwakikala wa kwiongola aye mwine: Shi muntu mu bukata mwenu ulanga’mba i wa tunangu mu ino ngikadilo ya bintu,* nabya ekale mulembakane, amba ekale wa tunangu. 19 Mwanda tunangu twa ino ntanda i bulembakane kudi Leza, ke-pantu i kilembwe amba: “Ukwatanga ba tunangu mu budyumuku bwabo.”+ 20 Ne amba: “Yehova* uyukile amba milangwe ya bantu ba tunangu i ya bitupu.”+ 21 Nanshi kekwakikala wa kwitumbija mu bantu; mwanda bintu byonsololo i byenu, 22 ekale Polo, nansha Apolosa nansha Kefasa*+ nansha ntanda nansha būmi nansha lufu nansha bintu bidi’ko pano nansha bintu bikāya’ko, bintu byonsololo i byenu; 23 ne kadi banwe mwi ba Kidishitu;+ Kidishitu nandi i wa Leza.