Kupituluka mu Bijila
18 “Babitobo bene Levi, ne kisaka kyonso kya Levi kine, kebakapebwapo kipindi nansha na bupyani pamo na Isalela. Bakadya ku byamulambu byelwe na mudilo kudi Yehova, bupyani bwandi.+ 2 Kebakekalapo na bupyani mu bukata mwa banababo. Yehova ye bupyani bwabo, monka mwaebalombwedile.
3 “Kino’ki kyo kikekala kyepelo kya babitobo mu bantu: Muntu ense ulambula kitapwa, ekale ñombe nansha mukōko, ukapa kitobo kidyoma kya kuboko, bibanga, ne kifu. 4 Ukamupa byangulwa bibajinji bya miseke yobe, vinyu yobe mipya, māni obe ne myoya mibajinji itendelwe ku luombe lobe.+ 5 Yehova Leza obe i mumutonge aye ne bandi bana mu bisaka byenu byonso amba bengile mu dijina dya Yehova mafuku onso.+
6 “Ino shi mwine Levi wataluka mu kibundi kimo kya mu bibundi byenu mu Isalela mwaadi ushikete,+ kadi aye* wasake kwenda ku kifuko kitongele* Yehova,+ 7 ubwanya kwingila kwine’kwa mu dijina dya Yehova Leza wandi pamo bwa banababo bonso bene Levi, bemene’ko ku meso a Yehova.+ 8 Ukatambula kipindi kya byakudya kimo kyonka pamo nabo,+ kutentekela pa byobya byatambulanga shi wapoteja bintu bya bankambo wandi.
9 “Shi ubatwela mu ntanda ikupa Yehova Leza obe, kufwaninwepo kwifunda kwiula bilongwa bya munyanji bya yoya mizo.+ 10 Kekukatanwapo mobe muntu upityija wandi mwana mwana-mulume nansha wandi mwana mwana-mukaji mu mudilo,+ muntu ubuka lubuko,+ nansha ulonga bya maleñanya,+ nansha wa mitāmu,+ nansha wa majende,+ 11 muntu uloa bakwabo, ne wipangula babuka na bibanda+ nansha kilumbu,+ nansha wipangula bafwe.+ 12 Mwanda muntu ense ulonga bino bintu i wa munyanji kudi Yehova, kadi i pa mwanda wa bino bilongwa bya munyanji wiipangila Yehova Leza obe ku meso obe. 13 Ufwaninwe kwikala wampikwa kutopekwa ku meso a Yehova Leza obe.+
14 “Mwanda ino mizo yopanga yadi ivwananga boba balonga bya maleñanya+ ne lubuko,+ ino Yehova Leza obe kakupelepo lupusa lwa kulonga kintu kyo-kyonso pamo bwa kino. 15 Yehova Leza obe ukakulupwila mu banabenu mupolofeto pamo bwa ami. Mufwaninwe kumwivwana.+ 16 I mwendele byobya byowalombele kudi Yehova Leza obe mu Holeba mu difuku dya kitango*+ powanenene amba, ‘Kokandeka monka ngivwane diwi dya Yehova Leza wami nansha kumona uno mudilo mukatampe, kutyina’mba nakafwa.’+ 17 Penepo Yehova waunena’mba, ‘Byobanena’byo i biyampe. 18 Nkebalupwila mu bukata mwa banababo mupolofeto pamo bwa abe,+ kadi nkatūla binenwa byami mu kyakanwa kyandi,+ nandi ukesamba nabo byonso byomusoñanya.+ 19 Na bubine, nkalandula yewa muntu ense kakevwanapo binenwa byami byakesamba mu dijina dyami.+
20 “‘Shi mupolofeto wisamba na ditatu* mu dijina dyami kinenwa kyonkimusoñenyepo kwisamba nansha shi wisamba mu dijina dya baleza bakwabo, yao mupolofeto ufwaninwe kufwa.+ 21 Ino, padi ubwanya kunena mu mutyima obe amba: “Le tukayuka namani amba Yehova kesambilepo kino kinenwa?” 22 Shi mupolofeto wesambe mu dijina dya Yehova, ino kinenwa’kya kekifikidilepo nansha kulongeka, nabya Yehova kesambilepo kinenwa’kya. Mupolofeto’wa wesambe na ditatu.* Kufwaninwepo kumutyina.’