Kupituluka mu Bijila
16 “Lama kweji wa Abibu,* ne kusoba Pashika kudi Yehova Leza obe,+ mwanda mu kweji wa Abibu, Yehova Leza obe wakutambije mu Edipito bufuku.+ 2 Kadi ukatapa kyamulambu kya Pashika kudi Yehova Leza obe,+ mu mikōko ne mu bañombe,+ mu kifuko kitonga Yehova kwikala’po dijina dyandi.+ 3 Kufwaninwepo kudya’kyo na kintu kyo-kyonso kya kiyujo;+ mu mafuku asamba-abidi ukadya mikate yampikwa kiyujo, mikate ya malwa, mwanda mwatambile mu ntanda ya Edipito lubilolubilo.+ Longa namino mwanda wa kuvuluka difuku dyowatambile mu ntanda ya Edipito ponso podi mūmi.+ 4 Kukatanwapo na mukama usosoma mu ntanda yobe yonso mu mafuku asamba-abidi,+ kadi kekukekalapo mwita nansha umo okalambula bu kitapwa kyolwa kya difuku dibajinji ukashala bufuku bonso butuntulu kufika ne lubanga.+ 5 Kukekalapo na lupusa lwa kutapila kyamulambu kya Pashika mu kibundi kyo-kyonso kya mu bibundi bikupa Yehova Leza obe. 6 Ino kikatapilwa pa kifuko kitonga Yehova Leza obe kwikala’po dijina dyandi. Ukatapa kyamulambu kya Pashika kyolwa pa kupona kwa dyuba,+ pa kitatyi kitungwe kyowatambile mu Edipito. 7 Ufwaninwe kosha’kyo ne kwikidīla+ pa kifuko kikatonga Yehova Leza obe,+ kupwa ukajokela ku mapema obe lubanga. 8 Mu mafuku asamba, ukadya mikate yampikwa kiyujo, ino mu difuku dya busamba-bubidi kukekala kitango kikola kudi Yehova Leza obe. Kufwaninwepo kwingila mwingilo nansha umo.+
9 “Ukabala mayenga asamba-abidi. Ukashilwila kubala mayenga asamba-abidi tamba kitatyi kyopityija dibajinji kikwakwa ku miseke ya mu budimi.+ 10 Penepa ukasoba Masobo a Mayenga kudi Yehova Leza obe+ na kyamulambu kya kwilanga kya ku kuboko kobe, ukekileta mungya madyese akwesela Yehova Leza obe.+ 11 Ukasangala ku meso a Yehova Leza obe, abe ne obe mwana mwana-mulume, ne obe mwana mwana-mukaji, ne umpika obe mwana-mulume, ne umpika obe mwana-mukaji, ne mwine Levi udi mu bibundi* byobe, ne mweni wa kibundi, ne mwana wampikwa shandi,* ne mukaji wa kishala, badi mu bukata mobe, mu kifuko kitonga Yehova Leza obe kwikala’po dijina dyandi.+ 12 Vuluka’mba waikele umpika mu Edipito,+ kadi lama ino misoñanya ne kwiilonda.
13 “Ukasoba Masobo a Bitanda*+ mafuku asamba-abidi pokongakanya bya pa kipūdilo kyobe ne bya mu kyengelo kyobe kya māni ne kya vinyu. 14 Sangala kitatyi kya masobo obe,+ abewa ne obe mwana mwana-mulume, ne obe mwana mwana-mukaji, ne umpika obe mwana-mulume, ne umpika obe mwana-mukaji, ne mwine Levi, ne mweni wa kibundi, ne mwana wampikwa shandi, ne mukaji wa kishala, badi mu bibundi byobe. 15 Ukasoba masobo+ kudi Yehova Leza obe mafuku asamba-abidi mu kifuko kitonga Yehova, mwanda Yehova Leza obe ukesela mwangulo obe ne byonso byolonga,+ kadi abe ukekala enka na nsangaji yonkayonka.+
16 “Misunsa isatu ku mwaka, bana-balume bobe bonso bakamweka ku meso a Yehova Leza obe mu kifuko kyatonga: pa Masobo a Mikate Yampikwa Kiyujo,+ Masobo a Mayenga,+ ne Masobo a Bitanda,*+ kadi i kutupu nansha umo mobadi ukamweka ku meso a Yehova makasa bitupu. 17 Kyabuntu kisela muntu ne muntu kikakwatañana na madyese akwesele Yehova Leza obe.+
18 “Ukatūla’ko batyibi+ ne bemaniji ba kisaka ne kisaka mu bibundi byobe byonso* bikupa Yehova Leza obe, kadi bakatyibila bantu mambo na boloke. 19 Kufwaninwepo kunyengakanya butyibi,+ nansha kwikala na mboloji,+ nansha kwitabija kutyibwa milomo, mwanda kutyibwa milomo kusabanga meso a bantu ba tunangu+ ne kunyengakanya binenwa bya bantu boloke. 20 Boloke—bine ufwaninwe kulondalonda boloke,+ amba ushale mūmi ne kuyata ntanda ikupa Yehova Leza obe.
21 “Kufwaninwepo kushimika mutyi wa muswelo o-onso bu kipanda kikola*+ kubwipi na kisōkelo kya Yehova Leza obe kyowilongēle.
22 “Nansha kwishimikila kikomo kikola,+ kintu kishikilwe Yehova Leza obe.