Kusokwelwa Kudi Yoano
22 Kadi waunombwele munonga wa mema a būmi,+ atōka tō pamo bwa dibwe dya kidisale,* ukuka utamba mu lupona lwa Leza ne lwa Kana ka Mukōko+ 2 utūkila mu bukata mwa kipito kyakyo kikatampe. Ku mitamba yonso ibidi ya munonga kwadi mityi ya būmi ilupula bipa misunsa 12, ipa bipa byayo kweji ne kweji. Kadi mani a ino mityi adi a kundapa nao mizo.+
3 Kekukekalapo dikwabo mafingo nansha amo. Ino lupona lwa Leza ne lwa Kana ka Mukōko+ lukekala mu kibundi’mwa, kadi bapika bandi bakamwingidila mingilo ikola; 4 kadi bakamonanga mpala yandi,+ dijina dyandi nadyo dikekalanga pa mapala abo.+ 5 Ne kadi, bufuku kebukekala’kopo dikwabo,+ kadi kebakasakilwapo kitōkeji kya kinanu nansha mwinya wa dyuba, mwanda Yehova* Leza ukebamunikila kitōkeji,+ kadi bakabikalanga bu balopwe nyeke ne nyekeke.+
6 Waunena’mba: “Bino binenwa i bya binebine* kadi bya bine;+ i amo, Yehova,* Leza mwine wapele bapolofeto mushipiditu,+ watumine mwikeulu wandi kulombola bapika bandi bintu bifwaninwe kulongeka panopano ponka. 7 Tala! Yao ngiya bukidibukidi.+ Wa nsangaji i yewa ulama binenwa bya bupolofeto bya mu uno muvungo.”+
8 Bine, ami Yoano ye wadi wivwana ne kumona bino bintu. Ponebivwene ne kwibimona, napona panshi kutōta ku maulu a mwikeulu mwine wadi unombola bino bintu. 9 Ino aye waunena’mba: “Tadija! Kokilonga nankyo! Amiwa ne umpika’tu pamo bwa abe ne bwa banabenu bapolofeto ne boba balama binenwa bya mu uno muvungo. Tōta Leza.”+
10 Kadi waunena monka’mba: “Kokalamika kiyukeno pa binenwa bya bupolofeto bya uno muvungo, mwanda kitatyi kitungwe kibafwena pabwipi. 11 Yewa mukondame endelele mu bukondame; yewa wa busala nandi endelele mu busala bwandi; ino yewa moloke endelele mu boloke, kadi yewa ujila nandi endelele mu buujila.
12 “‘Tala! Yao ngiya bukidibukidi, ne mpalo ya kupāna ngidi nayo, ya kupala muntu ne muntu mwendele mwingilo wandi.+ 13 Amiwa ne Alefa kadi ne Omeka,*+ mubajinji ne wa mfulo, ngalwilo ne mfulo. 14 Ba nsangaji i boba bakenda minkukumba yabo,+ amba bekale na lupusa lwa kwenda ku mityi ya būmi+ ne amba batwele mu kyokya kibundi pa bibelo byakyo.+ 15 Panja padi bambwa* ne boba balongalonga bya majende ne ba busekese* ne bantapañani ne batōta bilezaleza ne yewa ense usenswe bubela ne ubepabepa.’+
16 “‘Ami Yesu, natumine mwikeulu wami kwimusapwila bukamoni bwa bino bintu pa mwanda wa bipwilo. Ami ne muji kadi lutundu lwa Davida,+ ne mutumbwe wa lubanga ukelema.’”+
17 Kadi mushipiditu ne mutundaile+ banenanga’nka kunena’mba, “Iya!” kadi yewa wivwana anene amba, “Iya!” ne yewa udi na kyumwa nandi āye;+ yewa usaka nandi ayate mema a būmi ku bitupu.+
18 “Ami nasapwila bukamoni muntu ense wivwana binenwa bya bupolofeto bya mu uno muvungo amba: Shi muntu wabweja ku bino bintu,+ Leza nandi ukamubweja’ko mpupo ilembelwe mu uno muvungo;+ 19 kadi shi muntu wapatula kantu ku binenwa bya mu muvungo wa buno bupolofeto, Leza nandi ukamuyata kyepelo kyandi kya ku mityi ya būmi+ ne kya mu kibundi kijila,+ bintu bilembelwe mu uno muvungo.
20 “Yewa mwine usapula bukamoni bwa bino bintu wanena’mba, ‘Bine, yao ngiya bukidibukidi.’”+
“Amena! Iya, a Mfumwetu Yesu.”
21 Kanye ka ku buntu bitupu ka Mfumwetu Yesu kekale na bajila.