Bilongwa bya Mafuku Umbajinji

14 Hilama+ mulopwe wa Tyila watuma mikendi kudi Davida, pamo ne mityi ya sedele, ne basōnga mabwe,* ne basendwe ba mityi mwanda wa kumūbakila njibo.*+ 2 Davida wayukile amba Yehova wamukomeje pototo bu mulopwe pa Isalela,+ kadi wazunzwile bulopwe bwandi pa mwanda wa bantu Bandi bene Isalela.+

3 Davida waikele na bakaji bakwabo+ mu Yelusalema, kadi Davida wabutwila’ko bana bakwabo bana-balume ne bana-bakaji.+ 4 Ano o majina a bana bamubutwidilwe mu Yelusalema:+ Shamua, Shobabe, Natana,+ Solomone,+ 5 Ibale, Edishua, Elepelete, 6 Noka, Nefeke, Yafia, 7 Edishama, Bediada, ne Edifelete.

8 Bene Fidishitia pa kwivwana’mba Davida washingwa māni ke mulopwe pa Isalela yense,+ bene Fidishitia bonso bakanda kukimba Davida.+ Davida pa kwivwana’o, waenda kukalwa nabo. 9 Kupwa bene Fidishitia batwela, kebatambe’dyo’nka kutamba Musanza* wa Lefaime.+ 10 Davida waipangula Leza amba: “Le nkande kukalwa na bene Fidishitia? Lelo ukebapāna mu kuboko kwami?” Yehova nandi wamulondolola’mba: “Kanda, na bubine nsa kwibapāna mu kuboko kobe.”+ 11 Ebiya Davida wakanda ku Bāla-Pelazimi,+ kadi webepaya kwine’kwa. Kupwa Davida wanena’mba: “Leza wa bine wasabe kipunzu mu balwana nami na kuboko kwami pamo bwa kipunzu kyatubulwa na mema.” O mwanda bainikile kifuko’kya bu Bāla-Pelazimi.* 12 Bene Fidishitia bashiya baleza babo kwine’kwa, ebiya Davida waleta musoñanya, nabo basōkwa mu mudilo.+

13 Mwenda mafuku bene Fidishitia batamba’dyo monka bantu mu musanza.*+ 14 Davida waipangula monka Leza, ino Leza wa bine wamulondolola’mba: “Kokikandidila kobadi. Ino wibalamuke dya kunyuma, kupwa iya wibatambe’dyo kampalampala na bimuna bya baka.+ 15 Ino shi ubaivwana ku nsongo ya bimuna bya baka lunwa lwa bantu benda, shilula bulwi, mwanda Leza wa bine usa kwenda ku meso obe kutapa kibumbo kya divita kya bene Fidishitia.”+ 16 Ebiya Davida walonga enka mwamusoñaninye’kyo Leza wa bine,+ kadi batapa kibumbo kya divita kya bene Fidishitia tamba ku Ngibeone kufika ne ku Ngezele.+ 17 Ntumbo ya Davida yasambakana mu matanda onso, kadi Yehova walengeja mizo yonso imutyine.+