Kusokwelwa Kudi Yoano
19 Bino’bi pa kupita’po naivwene bwa diwi dikatampe dya kibumbo kikatampe mūlu. Kebanena’mba: “Tendelai Yah!*+ Lupandilo ne ntumbo ne bukomo i bya Leza wetu, 2 mwanda butyibi bwandi i bwa bine kadi boloke.+ Mwanda wafikidija butyibi padi ndumba mukatampe, mwine waonene ntanda na busekese* bwandi, kadi Leza wamulubwila kinongo kya mashi a bapika bandi adi mu maboko andi.”*+ 3 Ponkapo banena musunsa wa bubidi amba: “Tendelai Yah!*+ Kadi mwishi ufituka ku Babiloni ukandanga nyeke ne nyekeke.”+
4 Penepo bakulumpe 24+ ne bipangwa byūmi biná+ bapona panshi kebatōta Leza ushikete pa lupona, kebanena’mba: “Amena! Tendelai Yah!”*+
5 Kadi, diwi dyatamba ku lupona kedinena’mba: “Tendelai Leza wetu, banwe bapika+ bandi bonsololo bamutyina, batyetye ne bakatampe bene.”+
6 Kadi naivwene pamo bwa diwi dya kibumbo kikatampe ne bwa lupumo lwa mema mangi ne bwa kukungula kwa mikungulo mikomo. Kebanena’mba: “Tendelai Yah,*+ mwanda Yehova* Leza wetu, Mwinē Bukomo Bonso,+ ke mwanze kubikala bu mulopwe!+ 7 Tusangalei ne kusepelela bikatampe ne kumutumbija ntumbo, mwanda butundaile bwa Kana ka Mukōko bubafika ne mukajandi nandi ke mwilongolole. 8 Bine, wapebwa lupusa lwa kuvwala bukonge bulumbuluke, bukelema kadi bwampikwa biko—mwanda bukonge bulumbuluke byo bilongwa byoloke bya bajila.”+
9 Ebiya waunombola’mba, “Lemba’mba: Ba nsangaji i boba betyilwe ku bidibwa bya kyolwa bya butundaile bwa Kana ka Mukōko.”+ Kadi waunombola’mba: “Bino’bi i binenwa bya bine bya Leza.” 10 Penepo napona ku maulu andi kumutōta. Ino aye waunombola’mba: “Tadija! Kokilonga nankyo!+ Amiwa ne umpika’tu pamo bwa abe ne bwa banabenu badi na mwingilo wa kusapula bukamoni bwa Yesu.+ Tōta Leza!+ Mwanda kusapula bukamoni bwa Yesu ko kwine kulengeje bupolofeto.”+
11 Namwene diulu dyashituka, na’mba ntale! kabalwe katōka tō.+ Ne mwine wadi utentamine’po witwanga bu Mukōkele+ kadi wa Bine,+ kadi utyibanga mambo ne kulwa divita na boloke.+ 12 Meso andi i lubimbi lwa mudilo,+ kadi pa mutwe wandi padi bankaka* bangi. Udi na dijina dilembe kediyukilepo muntu nansha umo poso aye mwine, 13 kadi uvwele kivwalwa kya pangala kilambakane* mashi, kadi witwanga dijina dya bu Kinenwa+ kya Leza. 14 Kadi, bibumbo bya mūlu byadi bimulonda pa tubalwe tutōka tō, badi bavwele ne bukonge bulumbuluke, butōka kadi bwampikwa biko. 15 Mu kyakanwa kyandi namo mutambanga kipete kya bui, kilampe+ kya kukupila nakyo mizo ya bantu, kadi ukebakumba na mukombo wa kyuma.+ Ne kadi, upondanga mu kyengelo kya vinyu kya bulobo bwa bukalabale bwa Leza Mwinē Bukomo Bonso.+ 16 Pa kivwalwa kyandi kya pangala, bine, pa ditangatanga dyandi, i palembe dijina’mba, Mulopwe wa balopwe ne Mfumwandya bamfumu.+
17 Kadi namwene ne mwikeulu wimene mu dyuba, waela lubila na diwi dikatampe kanena byoni byonso bilelemba mu bukata mwa mūlu* amba: “Iyai kuno, mwibungilei ku bidibwa bivulevule bya kyolwa bya Leza,+ 18 amba mudye mwita wa balopwe ne mwita wa bakulu ba basola ne mwita wa bantu bakomo+ ne mwita wa tubalwe ne wa boba batentamine’po,+ ne mwita wa bonsololo, banapabo ne bapika, batyetye ne bakatampe bene kumo.”
19 Kadi namwene kinyema kya ntanda ne balopwe ba pano pa ntanda ne bibumbo byabo bibungīle pamo kukalwa divita na yewa ushikete pa kabalwe ne na kibumbo kyandi.+ 20 Penepo kinyema kya ntanda’kya kyakwatwa, pamo ne mupolofeto+ wa bubela wadi ulonga biyukeno ku meso akyo, bine byaadi ongola nabyo boba batambwile kayukeno ka kinyema kya ntanda+ ne boba batōta kyelekejo kyakyo.+ Baelelwe bōmi abo bonso bubidi mu dijiba dya mudilo utēma na bibidikityi.+ 21 Ino boba bashele’ko baipailwe na kipete kilampe kyadi kitamba mu kyakanwa kya yewa wadi ushikete pa kabalwe.+ Penepo byoni byonso byaikuta mwita wabo.+