Kusokwelwa Kudi Yoano
13 Kadi waimene* nkū pa musenga wa dijiba.
Kadi namwene kinyema kya ntanda+ kivubuka pa dijiba,+ kya masengo dikumi ne mitwe isamba-ibidi, kadi pa masengo akyo padi bankaka* dikumi, ino pa mitwe yakyo padi majina a kutuka Leza. 2 Ino kinyema kya ntanda kyonamwene’kya kyadi bwa ngé, ino maulu akyo adi bwa a uluse, kadi kyakanwa kyakyo kyadi bwa kyakanwa kya ntambo. Penepo mpumina+ wapa kinyema’kya bukomo bwakyo ne lupona lwakyo ne lupusa lukatampe.+
3 Namona’mba mutwe wakyo umo wadi umweka bwa mutapwe bya lufu, inoko kilonda kyakyo kya lufu’kya kyakoma,+ penepo bantu ba ntanda yonso kebalonda kinyema kya ntanda ne kwana baana. 4 Kebatōta mpumina mwanda wapēle kinyema kya ntanda lupusa, kadi kebatōta ne kinyema kya ntanda na bino binenwa’mba: “Le i ani udi bwa kino kinyema kya ntanda, ne ukokeja kulwa nakyo i ani le?” 5 Kyapebwa kyakanwa kya kunena bintu bikatampe ne mutonko, kyapebwa ne lupusa lwa kwingila mu myeji 42.+ 6 Ebiya kyaasama kyakanwa na mutonko wa kutuka Leza,+ kutuka dijina dyandi ne kīkalo kyandi, enka ne boba bashikete mūlu bene.+ 7 Kyapelwe kishima kya kulwa divita na boba bajila ne kwibanekenya,+ kadi kyapelwe lupusa pa bisaka byonso ne bantu ne ndimi ne mizo. 8 Boba bonso bashikete pa ntanda nabo bakekitōta. Tamba ku ñanjilo ya ntanda, mu bano’ba i mutupu wa dijina dyandi dilembelwe mu muvungo wa būmi+ wa Kana ka Mukōko katapilwe.+
9 Shi kudi udi na matwi, evwane.+ 10 Shi kudi wa kuselwa bu musungi, ukendanga mu bu musungi. Shi kudi ukepayañana na kipete,* ufwaninwe kwipaibwa na kipete.+ Pano po palomba bajila+ bekale na kūminina+ ne lwitabijo.+
11 Penepo namwene kinyema kikwabo kya ntanda kilupuka panshi, kyadi na masengo abidi bwa kana ka mukōko, ino kyashilula kwisamba pamo bwa mpumina.+ 12 Kingidijanga lupusa lonso lwa kinyema kya ntanda+ kibajinji mu meso akyo. Kadi kilengejanga ntanda ne bekadi bayo batōte kinyema kibajinji kya ntanda’kya, kyokya kyadi na kilonda kya lufu kyakomene’kya.+ 13 Kadi kiloñanga biyukeno bikatampe, kitūkija’nka ne mudilo mūlu wapona panshi mu meso a bantu.
14 Kyongolanga boba bekele pa ntanda, mwanda wa biyukeno byokyapelwe kulonga mu meso a kinyema kya ntanda, koku kilombola boba bashikete pa ntanda balonge kyelekejo+ kya kinyema kya ntanda kyatapilwe kipete inoko kyaikala monka kyūmi.+ 15 Kadi kyapelwe kishima kya kupa kyelekejo kya kinyema kya ntanda umpuya,* amba kyelekejo kya kinyema kya ntanda’kya kīsambe ne kwipaija boba bonso bapela kutōta kyelekejo kya kinyema kya ntanda.
16 Kiningilanga bantu bonso—batyetye ne bakatampe, bampeta ne balanda, banapabo ne bapika—amba bafwaninwe kutūlwa kayukeno pa kuboko kwabo kwa lundyo nansha pa mpala yabo,+ 17 ne amba i kutupu ubwanya kupota nansha kupoteja poso yewa udi na kayukeno, dijina+ dya kinyema kya ntanda nansha kibalwa kya dijina dyakyo.+ 18 Pano po palomba tunangu: Yewa udi na bujinguludi abale kibalwa kya kinyema kya ntanda, mwanda i kibalwa kya muntu,* ne kibalwa kyakyo i 666.+