Bene Kodinda Umbajinji

11 Ngiulei ami, monka mongiwila Kidishitu.+

2 Nemwanya mwanda mumvulukanga mu bintu byonso kadi mulamine bishi monka monemushidile’byo. 3 Ino nsaka muyuke amba mutwe wa mwana-mulume ense i Kidishitu;+ ne mutwe wa mwana-mukaji i mwana-mulume;+ ne kadi mutwe wa Kidishitu i Leza.+ 4 Mwana-mulume ense ulombela nansha kunena bupolofeto koku wipūtyile kintu ku mutwe ufwijanga mutwe wandi bumvu; 5 ino mwana-mukaji ense ulombela nansha kunena bupolofeto+ ne kwipūta ku mutwe mpika ufwijanga mutwe wandi bumvu, mwanda i pamo ponka na aye mwana-mukaji mutendwe lupole. 6 Mwanda shi mwana-mukaji kepūtyilepo, nabya atendeje nywene; ino shi i kya bumvu mwana-mukaji kutendeja nywene nansha kutendwa lupole, nankyo epūte.

7 Mwanda mwana-mulume kafwaninwepo kwipūta ku mutwe, ke-muntu aye i kyelekejo+ ne ntumbo ya Leza, ino mwana-mukaji i ntumbo ya mwana-mulume. 8 Mwanda mwana-mulume kātambilepo kudi mwana-mukaji, ino mwana-mukaji ye wātambile kudi mwana-mulume.+ 9 Ne kadi, mwana-mulume kāpangilwepo pa mwanda wa mwana-mukaji, ino mwana-mukaji ye wāpangilwe pa mwanda wa mwana-mulume.+ 10 O mwanda mwana-mukaji ufwaninwe kwikala na kiyukeno kya lupusa ku mutwe wandi, mwanda wa bamwikeulu.+

11 Ne kadi mudi Mfumwetu, mwana-mukaji kakokejapo kwikala’ko pampikwa mwana-mulume ne mwana-mulume nandi kakokejapo kwikala’ko pampikwa mwana-mukaji. 12 Mwanda monka mwātambīle mwana-mukaji kudi mwana-mulume,+ mo monka ne mwana-mulume nandi kupityila kudi mwana-mukaji; ino bintu byonso i bitambe kudi Leza.+ 13 Tyibai’o banwe bene: Lelo i kyendele’mo mwana-mukaji kulombela Leza pampikwa kwipūta ku mutwe? 14 Lelo kipangila kine kekimufundijangapo amba nywene milampe idi bumvu ku mwana-mulume, 15 ino shi mwana-mukaji udi na nywene milampe, i ntumbo kwadi? Mwanda i bamupe nywene pa kyaba kya kintu kya kwipūta. 16 Inoko, nansha shi muntu usaka kupatanya mwanda wa kubingija kibidiji kikwabo, ketudipo na kibidiji kikwabo, ne bipwilo bya Leza bine kebidipo nakyo.

17 Ino ponemulombola bino, nkimwanyangapo, mwanda mwibungilanga pamo, ke mwandapo wa bilumbuluke, ino i mwanda wa bibi. 18 Mwanda dibajinji bidi, ngivwananga’mba pomwitananga pamo mu kipwilo, mwilalululanga mu bukata mwenu; kadi nami naitabija’byo bityetye. 19 Mwanda na bubine mukekalanga ne tubitango mu bukata mwenu,+ amba boba betabijibwe momudi basokokele patōka.

20 Pomwitana mu kifuko kimo, bine ke mwandapo wa kudya Bidibwa bya Kyolwa bya Mfumwetu.+ 21 Mwanda pomudyanga’byo, muntu ne muntu udyanga bidi bidibwa byandi bya kyolwa, penepa umo wikele na nzala mukwabo nandi mukolwe. 22 Le kemudipo na mobo kwa kudīla ne kwa kutomena? Le mufutulwile kipwilo kya Leza ne kufwija bumvu boba kebadipo na kintu? Le nemunene namani? Lelo nemwanye’ni? Pa kino’ko nkimwanyapo.

23 Mwanda natambwile kudi Mfumwetu kino kyonemushidile ne banwe, amba Mfumwetu Yesu mu bufuku+ bobamwabile, watekwine mukate, 24 kadi, pa kupwa kufwija’ko, weutyumuna kanena’mba: “Uno welekeja umbidi wami,+ usa kupānwa pa mwanda wenu. Longai nyeke namino ke pa kumvulukila.”+ 25 Ne kitomeno+ nakyo monka na monka, abo pa kupwa kudya bidibwa bya kyolwa, wanena’mba: “Kino kitomeno kyelekeja kipwano kipya+ kya pa mashi ami.+ Longai nyeke namino, kyaba kyonso kyomutoma’kyo, ke pa kumvulukila.”+ 26 Mwanda kyaba kyonso kyomudya uno mukate ne kutoma kino kitomeno, musapulanga nyeke lufu lwa Mfumwetu, enka ne byaiya.

27 Nanshi yewa ense udya mukate nansha kutoma kitomeno kya Mfumwetu pampikwa kufwaninwa ukapya mambo pa mwanda wa umbidi ne mashi a Mfumwetu. 28 Dibajinji muntu ebandaule shi i mufwaninwe,+ penepa kādi ku mukate ne kutoma ku kitomeno. 29 Mwanda yewa udya ne kutoma kwampikwa kujingulula umbidi, udyanga kya kwidya ne kutoma kya kwitoma kya kumuponeja aye mwine. 30 O mwanda bavule mu bukata mwenu i bazoze ne kubela, kadi bavule ke balāle mu tulo twa lufu.*+ 31 Ino shi twibandaule motwikadile batwe bene, ketukatyibilwapo mambo. 32 Inoko, shi tutyibilwe mambo, tubalemununwa na Yehova,*+ kutyina’mba twakaponejibwa na ino ntanda.+ 33 Shi ke pano, banwe banabetu, shi mubetana pamo kudya’byo, mwikungilai. 34 Shi kudi udi na nzala, adye kwabo, kutyina’mba pomwitana pamo, ke mwandapo wa kutyibilwa mambo.+ Inoko myanda yashala’ko nsa kwiya kōlola’yo shi nafika kwako.