Kudi Bene Fidipai
3 Shi ke pano, banwe banabetu, sangalai nyeke mudi Mfumwetu.+ Ami kebinkambakanyapo kwimulembela myanda imo yonka, ne kadi i mwanda wa kwimukinga.
2 Dyumukai bambwa; dyumukai bantu balonga bibibibi; dyumukai boba baketaketa ngitu.+ 3 Mwanda batwe bo badi na disao dya binebine,+ batwe bengila mingilo ikola na mushipiditu wa Leza ne kwitumbija mudi Kidishitu Yesu+ kadi ketukulupilepo mu ngitu, 4 nansha shi kudi udi na bubinga bwa kukulupila mu ngitu nankyo i ami.
Shi muntu mukwabo ulanga’mba udi na bubinga bwa kukulupila mu ngitu, ami ye mwine: 5 mutwejibwe kwisao difuku dya mwānda,+ wa ku muzo wa Isalela, wa ku kisaka kya Benjemani, Muhebelu mubutulwe na Bahebelu;+ mu bijila namo, nadi Mufadiseo;+ 6 mu kupyasakana namo, nadi mpangapanga kipwilo;+ mu boloke bwa pa bijila namo, nadi muntu wampikwa kutopekwa. 7 Ino, bintu byonadi mwena’mo, nebimone bu bijimine* pa mwanda wa Kidishitu.+ 8 Ne kadi, bine namone ne bintu byonso bu bijimine pa mwanda wa mvubu mikatampe mpata ya buyuki bwa Kidishitu Yesu Mfumwami. Pa mwanda wandi naitabija kujimija bintu byonso ne kwibimona bu bya busala,* amba mwene’mo Kidishitu 9 ne kutanwa mu bumo nandi, ke pa mwandapo wa boloke bwami bwa kulonda bijila, aa, ino i pa mwanda wa boloke bwa pa lwitabijo+ mudi Kidishitu,+ boloke butamba kudi Leza bwimanine pa lwitabijo.+ 10 Kitungo kyami i kumuyuka aye ne bukomo bwa lusangukilo lwandi+ kadi ne kususuka pamo nandi,+ kwitabija lufu pamo bwa lwandi,+ 11 kumona shi bibwanika kufikila ku lusangukilo lwa bafwe lukabadikila.+
12 Ke kunenapo amba kendi mutambule’kyo kala nansha amba kendi mufikijibwe kala ku bubwaninine, aa, ino ami neelelanga’ko bininge+ ntale shi mbwanya ne kukwata kine kyauntongēle* Kidishitu Yesu.+ 13 A banabetu, nkyemwene bwa ami kemukwate’kyo; ino kintu kimo i kino: Kwilwa bintu bya kunyuma+ ne kobokela ku bintu bya kumeso,+ 14 neelelanga’ko bininge kufikila pa kitungo kya kutambula mpalo+ ya lwito+ lwa mūlu lwitwityile Leza kupityila kudi Kidishitu Yesu. 15 Nanshi boba batame mu bukata mwetu+ bekale na uno mulangilo, kadi shi milangwe yenu ilēmenene kukwabo mu mwanda kampanda, nabya Leza ukemusokwela mulangilo onanena’u. 16 Inoko, nansha shi tubaendelela namani, twendei nyeke kumeso mu ndudi mu uno muswelo umo onka.
17 A banabetu, ngiulei+ banwe bonso pamo kadi tadijai boba banangila mu muswelo ukwatañene na kimfwa kyotwemushidile. 18 Mwanda kudi bavule bene—nadi nebatelanga divule ino pano nebatela ne impolo ponka—bananga bu balwana na mutyi wa masusu* wa Kidishitu. 19 Mfulo yabo i bonakani, leza wabo i difu dyabo, ntumbo yabo na bubine i bumvu, kadi batele mityima yabo ku bintu bya pano panshi.+ 20 Ino bu mwanā kibundi bwetu+ budi mūlu,+ kadi tutengele na kipyupyu umpandiji wa momwa mūlu, ke Mfumwetu Yesu Kidishitu+ kadi, 21 mwine ukalamuna umbidi wetu muzoze wikale pamo bwa* umbidi wandi wa ntumbo+ kupityila ku bukomo bwandi bukatampe bumukwashanga atūle bintu byonsololo munshi mwandi.+