Kupituluka mu Bijila
6 “Ino’i yo mbila ne misoñanya ne mutyibilo wa mambo byaletele Yehova mwanda wa kwimufundija, amba mwibilame kitatyi kyomwabukila mu ntanda yomukayata ke yenu, 2 mwanda wa utyine Yehova Leza obe ne kulama bitungo byandi byonso ne mbila yandi byonkusoñanya—abe ne obe mwana ne obe munkana+—mafuku onso a būmi bobe, amba wikale mūmi kitatyi kilampe.+ 3 Kadi a Isalela, wibivwane, ne kwibilama senene amba wikale biyampe ne kwivudija mu ntanda ikuka mabele ne būki, monka mwakulaile Yehova, Leza wa bakulutuba bobe.
4 “Ivwana, a Isalela: Yehova Leza wetu i Yehova umo kete.+ 5 Sanswa Yehova Leza obe na mutyima obe onso, ne muya*+ obe onso, ne na bukomo* bobe bonso.+ 6 Bino binenwa byonkusoñanya dyalelo bifwaninwe kwikala pa mutyima obe, 7 ukebikoma mu* bobe bana,+ ne kwisamba’byo poshikete mu njibo ne poenda mu dishinda, ne polāla ne pobūka pene.+ 8 Ukebikuta pa kuboko kobe bu kivulujo, kadi bikekala bu kabāla pa mpala yobe.*+ 9 Ukebilemba pa ñunji ya njibo yobe ne pa bibelo byobe.
10 “Shi Yehova Leza obe wakutweja mu ntanda yaatyipīle bakulutuba bobe ba Abalahama, Izake, ne Yakoba kukupa’yo+—bibundi bikatampe kadi bilumbuluke byokwaubakilepo,+ 11 mobo mayule bintu biyampe bya miswelo yonso byokwaingidilepo, byumbu byokwakolelepo, ne madimi a mañanza ne impafu yokwakuninepo—kadi shi ubadi ubaikuta,+ 12 tá mutyima kutyina wakelwa Yehova,+ wakutambije mu ntanda ya Edipito, mu njibo ya bupika. 13 Ukatyina Yehova Leza obe,+ ukamwingidila,+ kadi ukatyipa mu dijina dyandi.+ 14 Kufwaninwepo kulonda baleza bakwabo, baleza bonso ba bantu bakujokolokele,+ 15 mwanda Yehova Leza obe udi mu bukata mobe, i Leza usakanga kulamatwa bunka.+ Shi bitupu, bulobo bwa Yehova Leza obe bukakudyendyemukila+ kadi bukakutukija fututu pano pa ntanda.+
16 “Kufwaninwepo kutūla Yehova Leza obe pa ditompo+ na mowamutūdile pa ditompo ku Masa.+ 17 Mukalama na kusumininwa mbila ya Yehova Leza wenu, bivulujo byandi ne misoñanya yandi yawakusoñenye kulama. 18 Ufwaninwe kulonga byoloke ne biyampe ku meso a Yehova, amba wikale biyampe kadi utwele ne kuyata ntanda miyampe yatyipile Yehova kudi bakulutuba bobe,+ 19 ne kupanga balwana nobe bonso ku meso obe, monka mwalaile’kyo Yehova.+
20 “Mwenda mafuku shi obe mwana wakwipangula’mba, ‘Lelo bivulujo, misoñanya ne mutyibilo wa mambo byemusoñenye Yehova Leza wetu bishintulula bika?’ 21 nobe ukalondolola obe mwana’mba, ‘Twaikele bapika ba Felo mu Edipito, ino Yehova wetutambija mu Edipito na kuboko kwa bukomo. 22 Penepo Yehova wadi utuma’nka kutuma ku meso etu biyukeno ne bingelengele bikatampe kadi bya kyonakanya pa Edipito+ ne padi Felo ne pa ba mu njibo yandi yonso.+ 23 Kadi wetutambija’mo mwanda wa kwituleta kuno, etupe ntanda yaatyipīle bakulutuba betu.+ 24 Penepo Yehova wetusoñanya tulonde ino misoñanya yonso ne kutyina Yehova Leza wetu amba twikale biyampe myaka na myaka,+ mwanda wa twikale nyeke bōmi+ na motwikadile dyalelo. 25 Kikashintulula boloke kotudi shi tulame biyampe ino mbila yonso, koku tukōkele kudi* Yehova Leza wetu monka mwaetusoñaninye.’+