Bilongwa bya Mafuku Umbajinji

5 Bano’ba bo bana ba Lubeni,+ mwana umbedi wa Isalela. Wadi mwana umbedi, ino byaāsubije* butanda bwa shandi,+ lupusa lwandi lwa bu mwana umbedi lwāpelwe bana ba Yosefa+ mwanā Isalela, o mwanda musuku wandi kewalembēlwepo lupusa lwa bu mwana umbedi. 2 Nansha Yuda+ byaadi mutabuke banababo kadi kwadi ye ko kwatambile wa kwikala bu mutangidiji,+ ino lupusa lwa bu mwana umbedi lwadi lwa Yosefa. 3 Bana ba Lubeni mwana umbedi wa Isalela i Hanoki, Palu, Hezelone, ne Kalami.+ 4 Bana ba Yoela i Shemaia wandi mwana, Koka wandi mwana, Shimei wandi mwana, 5 Mika wandi mwana, Leaya wandi mwana, Bāla wandi mwana, 6 ne Beele wandi mwana, mwine waselelwe na Tilate-Pilenese+ mulopwe wa Ashidia bu musungi; wadi mfumu wa bene Lubeni. 7 Banababo mungya bisaka byabo mobalembelwe mungya misuku mwendele lutundu lwabo, mutwe wabo i Yeiele, Zekadia, 8 ne Bela mwanā Azaza mwanā Shēma mwanā Yoela, wadi ushikatanga mu Aloele+ kutūla ne ku Nebo ne Bāla-Meone.+ 9 Washikete kutunduka kutūla ne ku ngalwilo ya mu ntanda mutuputupu ku Munonga wa Ufalete+ mwanda bimunanwa byabo byavudile bininge mu ntanda ya Ngileade.+ 10 Mu mafuku a Solo, balwile divita na bene Hakala banekenibwe ku meso abo, ebiya bashikata mu mapema abo mu ntanda yonso ya kutunduka kwa Ngileade.

11 Ino lutundu lwa Ngade lwashikata kubwipi nabo mu ntanda ya Bashane kutūla ne ku Saleka.+ 12 Yoela ye wadi mutwe, Shafama wa bubidi, ne Yānai ne Shafata mu Bashane. 13 Kadi banababo ba ku mobo a bashabo i Mikaele, Meshulama, Sheba, Yolai, Yakana, Zia, ne Ebelu, bonso i basamba-babidi. 14 Bano’ba bo bana ba Abihaile mwanā Hudi mwanā Yaloa mwanā Ngileade mwanā Mikaele mwanā Yeshishai mwanā Yado mwanā Buza. 15 Ahi mwanā Abedyele mwanā Nguni wadi mutwe wa njibo ya bashabo. 16 Bashikete mu Ngileade,+ mu Bashane+ ne mu bibundi bidi mu bwendeji bwandi* ne mu madyo onso a Shalone kutūla ne koadi alungulukile. 17 Bonso balembelwe mungya bisaka byabo mu mafuku a Yotama+ mulopwe wa Yuda ne mu mafuku a Yeloboame*+ mulopwe wa Isalela.

18 Bene Lubeni, bene Ngade, ne kipindi kya kisaka kya Manase badi na ba bulwi bakomokomo 44 760 mu kibumbo kyabo kya divita badi basela mangabo ne bipete kadi badi belumbile miketo,* ne kadi badi bafundijibwe divita. 19 Balwa divita na bene Hakala,+ na Yetulu, na Nafisha,+ ne na Nodabe. 20 Bakwashibwe pa kulwa nabo, penepo bene Hakala ne bonso bobadi nabo bapānwa mu kuboko kwabo, mwanda baabije Leza mu divita, nandi walondolola ku kuzenza kwabo ke-pantu badi bamukulupile.+ 21 Bakwete bimunanwa byabo—bangamedia 50 000, mikōko 250 000, ne bampunda 2 000—pamo ne bantu* 100 000. 22 Bavule baponene batapwe, mwanda Leza wa bine ye walwile divita.+ Penepo bashikata pa kifuko kyabo kufika ne pobaselelwe bu misungi.+

23 Lutundu lwa kipindi kya kisaka kya Manase+ lwashikete mu ntanda’ya tamba ku Bashane kufika ne ku Bāla-Helemone ne ku Senila ne ku Lūlu lwa Helemone.+ Badi bangi bininge. 24 Bano’ba yo mitwe ya mobo a bashabo: Efela, Ishi, Ediele, Azidiele, Yelemia, Hodavia, ne Yadiele; badi ba bulwi bakomokomo, bana-balume batumbe, kadi mitwe ya mobo a bashabo. 25 Ino balongele bintu pampikwa kikōkeji kudi Leza wa bakulutuba babo, balongele busekese na baleza ba bantu ba ntanda’ya,+ bene batukijibwe na Leza ku meso abo. 26 O mwanda Leza wa Isalela watunwine mushipiditu wa Pūla mulopwe wa Ashidia+ (ko kunena’mba Tilate-Pilenese+ mulopwe wa Ashidia) wasela bu misungi bene Lubeni, bene Ngade, ne kipindi kya kisaka kya Manase, waenda nabo ku Halaha, Habole, Hala, ne ku munonga wa Ngozane+ kwine kobashikete kufika ne dyalelo’di.