Bilongwa bya Mafuku wa Bubidi
21 Penepo Yehoshafata walādikwa mwanda wa kukōkolokwa na bakulutuba bandi, wajīkwa na bakulutuba bandi mu Kibundi kya Davida; ebiya wandi mwana Yeholama wabikala pa kyandi kyaba.+ 2 Banababo, bana ba Yehoshafata bana-balume, i Azadia, Yehiele, Zekadia, Azadia, Mikaele, ne Shefatia; bano bonso i bana ba Yehoshafata mulopwe wa Isalela. 3 Kadi shabo webapele byabuntu bivule bya ndalama ne olo, ne bintu bya bulēme, pamo ne bibundi bikomejibwe bya mu Yuda;+ ino wapa Yeholama+ bulopwe, mwanda ye wadi umbedi.
4 Yeholama pa kubikala bulopwe bwa shandi, wakomeje kitenta kyandi na kwipaya banababo+ bonso na kipete, ne bamfumu bamo ba Isalela. 5 Yeholama wadi na myaka 32 paabikele, wabikele myaka mwānda mu Yelusalema.+ 6 Wanangīle mu dishinda dya balopwe ba Isalela,+ enka mwalongēle bantu ba mu njibo ya Ahaba, mwanda mwanā Ahaba ye waikele ke wandi mukaji;+ kadi wadi ulonga nyeke bibi ku meso a Yehova. 7 Ino Yehova kadipo usaka konakanya njibo ya Davida pa mwanda wa kipwano kyaasambile na Davida,+ mwanda wamulaile kumupa kinanu aye ne bandi bana nyeke ne nyeke.+
8 Mu andi mafuku Edoma watombokela Yuda,+ webikikila aye mwine mulopwe.+ 9 Ebiya Yeholama ne bakata bandi baabuka na makalo andi onso, wabūka bufuku wanekenya bene Edoma badi bamujokolokele ne bakata ba makalo. 10 Ino Edoma waendelela kutombokela Yuda kufika ne dyalelo. Dibena+ nandi wamutombokela mu kine kitatyi’kya, mwanda walekele Yehova Leza wa bakulutuba bandi.+ 11 Walongele ne mitenta+ pa ngulu ya Yuda mwanda wa kulongeja bekadi ba Yelusalema busekese bwa ku mushipiditu, kadi wasāsukija Yuda.
12 Mwenda mafuku mupolofeto Ediya+ wamutumina mukanda amba: “Yehova Leza wa mukulutuba obe Davida wanena namino amba, ‘Kunangilepo mu mashinda a shobe Yehoshafata+ nansha mu mashinda a Asa+ mulopwe wa Yuda. 13 Ino abe unangilanga mu dishinda dya balopwe ba Isalela+ ne kulongeja Yuda ne bekadi ba Yelusalema busekese bwa ku mushipiditu+ pamo bwa busekese bwa njibo ya Ahaba,+ kadi waipaile’nka ne banabenu,+ ba mu njibo ya shobe badi bayampe kukupita. 14 O mwanda, Yehova wakupila bantu bobe kikupilwa kikatampe, ne bobe bana ne bobe bakaji ne bintu byobe byonso. 15 Kadi usa kubela misongo mingi, ne misongo ya milá, kufika ne bitamba milá yobe panja mwanda wa misongo, difuku ne difuku.’”
16 Ebiya Yehova watunwina+ Yeholama bene Fidishitia*+ ne Balabu+ badi kubwipi na bene Efiopya amba bamulwe. 17 Penepo batamba Yuda, batwela’mo ku bukomo, kupwa basela bintu byonso byobatene mu njibo* ya mulopwe,+ ne bandi bana, ne bandi bakaji; ino wandi mwana umo kete washele i Yehoahaze,*+ mukala wandi. 18 Kupwa bino byonso, Yehova wamumwesha malwa na misongo keipu mu milá yandi.+ 19 Mwenda mafuku, myaka ibidi mituntulu pa kupita’po, milá yandi yatamba panja mwanda wa misongo yandi, kupwa wafwa na misongo yandi mikatampe; kadi bantu bandi kebamwakijijepo mudilo na mobaakijije’o bakulutuba bandi.+ 20 Wadi na myaka 32 paabikele, wabikele myaka mwānda mu Yelusalema. I kutupu nansha umo wealakenye paafwile. Ebiya bamujīka mu Kibundi kya Davida,+ ino ke mu ntandapo ijīkwanga’mo balopwe.+